મુંબઈઃ ગયા અઠવાડિયે એક સાથે ચાર ફિલ્મ થિયેટરોમાં રિલીઝ કરવામાં આવી છે. ‘ગદર 2’ (હિન્દી), ‘ઓ માય ગોડ 2’ (હિન્દી), ‘જેલર’ (તામિલ) અને ‘ભોલા શંકર’ (તેલુગુ). ઉદ્યોગના વર્તુળોમાં આ ચાર ફિલ્મો ચાલવા અંગે શંકા પ્રવર્તતી હતી, પરંતુ એમની શંકા ખોટી નિવડી છે અને ફિલ્મોએ બોક્સ ઓફિસને પહેલા જ સપ્તાહાંતમાં જબ્બર કમાણી કરાવી આપી છે.
પ્રોડ્યૂસર્સ ગિલ્ડ ઓફ ઈન્ડિયા અને મલ્ટીપ્લેક્સ એસોસિએશન ઓફ ઈન્ડિયા સંસ્થાઓએ આનંદ સાથે જાહેરાત કરી છે કે ઓગસ્ટ 11-13નું વીકએન્ડ ખૂબ જ વ્યસ્ત રહ્યું હતું અને ભારતીય ફિલ્મ ઉદ્યોગના 110-વર્ષના ઈતિહાસમાં આ વીકએન્ડ થિયેટરોને સૌથી વધારે કમાણી કરાવી આપનાર બન્યું છે. ગત સપ્તાહાંતે આ ચાર ફિલ્મોએ સહિયારી કરાવી આપેલી કમાણીનો આંક રૂ. 390 કરોડને પાર ગયો હતો.
