અમદાવાદઃ સપ્તાહના પ્રારંભે ઘરેલુ શેરબજારોમાં તેજી થઈ હતી. સપ્તાહ એક સપ્તાહના ઊંચા સ્તરે પહોંચ્યું હતું. નિફ્ટી 25,100ને પાર પહોંચ્યો હતો. નિફ્ટી બેન્ક 50 અને 100 DMAના ઉપરના સ્તરે બંધ થવામાં સફળ રહ્યો હતો. રોકાણકારોની સંપત્તિમાં રૂ. 1.50 લાખ કરોડનો વધારો થયો હતો.
વૈશ્વિક બજારોમાં અને એશિયન બજારોમાં મિશ્ર પ્રવાહ હતો. BSE સેન્સેક્સ 592 પોઇન્ટ ઊછળીને 81,970ના સ્તરે બંધ આવ્યો હતો, જ્યારે નિફ્ટી 50 164 પોઇન્ટ ઊછળીને 25,128ના મથાળે બંધ થયો હતો. નિફ્ટી બેન્ક 645 પોઇન્ટની તેજી સાથે 51,817ના સ્તરે બંધ આવ્યો હતો. નિફ્ટી મિડકેપમાં પણ તેજી થઈ હતી, પણ ઊંચા મથાળે પ્રોફિટ બુકિંગ જોવા મળતું હતું. નિફ્ટી મિડકેપ ઇન્ડેક્સ 258 પોઇન્ટ સુધર્યો હતો. ઇન્ડેક્સ નીચલા સ્તરેથી 450 પોઇન્ટ સુધર્યો હતો.હવે બજારમાં રોકાણકારોની નજર વ્યાજદરોમાં સંભવિત કાપની શક્યતા ચકાસી રહ્યા છે, એ માટે તેઓની ઘરેલુ ફુગાવાના આંકડા પર નજર છે. આ સાથે બજારની નજર આજે અગ્રણી કંપની RIL, HCL ટેક્, એન્જલ વન, આલોક ઇન્ડસ્ટ્રીઝ અને ગોપાલ સ્નેક્સ તેમ જ અન્ય કંપનીઓના સપ્ટેમ્બર ત્રિમાસિક પરિણામો પર છે.
NSEના ડેટા મુજબ 11 ઓક્ટોબરે વિદેશી રોકાણકારો ચોખ્ખા વેચવાલ રહ્યા હતા. તેમણે શુક્રવારે રૂ. 4162.66 કરોડની વેચવાલી કરી હતી, જ્યારે સ્થાનિક સંસ્થાકીય રોકાણકારોએ રૂ. 3730 કરોડની ચોખ્ખી લેવાલી કરી હતી.
BSE એક્સચેન્જ પર કુલ 4195 શેરોમાં કામકાજ થયાં હતાં, જેમાં 2066 શેરો તેજીની સાથે બંધ થયા હતા. આ સાથે 1977 શેરો નરમ બંધ રહ્યા હતા, જ્યારે 152 શેરો સપાટ બંધ રહ્યા હતા. આ સિવાય 432 શેરોએ 52 સપ્તાહની નવી ઊંચી સપાટી સર કરી હતી, જ્યારે 223 શેરોએ 52 સપ્તાહની નીચલી સપાટીએ પહોંચ્યા હતા.
