નવી દિલ્હીઃ રાહત પેકેજની આશાએ સ્થાનિક શેરબજારમાં લાલચોળ તેજી થઈ હતી. હેલ્થકેરને બુસ્ટર ડોઝ મળવાની અપેક્ષાએ અમેરિકા બજારોમાં ભારે તેજી થઈ હતી. ડાઉ જોન્સ 780 પોઇન્ટ તેજી સાથે બંધ થયો હતો અનમે એશિયન બજારોમાં પણ તેજીની આગેકૂચ રહી હતી. જેથી સેન્સેક્સ 1266 પોઇન્ટ ઊછળીને 31,000ની સપાટી કુદાવીને 31,160ના મથાળે બંધ રહ્યો હતો. નિફ્ટી ઇન્ડેક્સ પણ 363 પોઇન્ટ ઊછળીને 9,000 સપાટીને કુદાવીને 9,111.90ના મથાળે બંધ રહ્યો હતો.
પાછલા ચાર દિવસોમાં નિફ્ટી 1000 પોઇન્ટ ઊછળ્યો
વીકલી એક્સપાયરીને દિવસે બજારમાં જોરદાર તેજી જોવા મળ્યો હતો. નિફ્ટીએ ચાર ટકા વધીને 9,000ની સપાટી કુદાવી હતી. રિલાયન્સ એચડીએફસીની આગેવાની હેઠળ શેરોમાં તેજી થઈ હતી. ઓટો શેરોમાં પણ ભારે તેજી થઈ હતી. એમ એન્ડ એમ 17 ટકા અને મારુતિ 13 ટકા ઊછળ્યો હતો. લોકડાઉનમાં પણ રોકાણકારોએ ફાર્મા, મેટલ, ફાઇનાન્શિયલ, કેમિકલ, પેપર અને લિકર શેરોમાં ભારે તેજી થઈ હતી. સેન્સેક્સના 30માંથી 26 શેરો અને નિફ્ટીના 50માંથી 44 શેરોમાં તેજી થઈ હતી. બેન્ક નિફ્ટીના 12માંથી નવ શેરોમાં તેજી થઈ હતી.
રૂ. એક લાખ કરોડના રાહત પેકેજની અપેક્ષા
રોકાણકારોએ આશા છે કે સરકાર બહુ જલદી મોટા રાહત પેકેજની જાહેરાત કરશે. કોરોના વાઇરસના સંક્રમિત દર્દીઓની સંખ્યામાં વધારામે પગલે રાહત પેકેજ જાહેર થવામાં વિલંબ થઈ રહ્યો છે. બજારને રૂ. એક લાખ કરોડ પેકેજની અપેક્ષા છે.
એફઆઇઆઇની લેવાલી
માર્ચ મહિનામાં બજારમાંથી રૂ. 60,000 કરોડ પરત ખેંચ્યા પછી વિદેશી રોકાણકારોએ લાંબા સમય પછી સ્થાનિક શેરબજારોમાં ચોખ્ખી લેવાલી કરી હતી. પાછલા બે સેશનમાં તેમણે રૂ. 2,600 કરોડની ચોખ્ખી લેવાલી કરી હતી. જોકે એપ્રિલમાં તેમણે રૂ. 400 કરોડની વેચવાલી કરી હતી.
