સુરત: શહેરના સચિન વિસ્તારમાં પાંચ માળની ઈમારત ધરાશાયી થતા કાટમાળ નીચે ૧૦ જેટલા લોકો દબાયા હોવાની આશંકા છે. ફાયર અને પોલીસની ટીમ ઘટના સ્થળે પહોંચી છે. જે.સી.બી.ની મદદથી કાટમાળ હટાવવાની કામગીરી ચાલી રહી છે.
આ બિલ્ડિંગમાં ૧૫ જેટલા લોકો રહેતા હોવાની પ્રાથમિક માહિતી મળી છે. જે ઈમારત ધરાશાયી થઈ છે તે જર્જરિત હોવાની માહિતી પણ સામે આવી છે. મહત્વની વાત એ છે કે આ બિલ્ડીંગ સાત વર્ષ પહેલા જ બની હોવાની વાતો પણ સામે આવી છે. જો આ સત્ય હોય તો આ ઈમારત બનાવવામાં હલકી કક્ષાનો માલ સામાન વપરાયો હોવાનું ફલિત થાય છે.
દુર્ઘટનાની જાણ થતાં સુરત જિલ્લા કલેક્ટર, પોલીસ કમિશનર, ફાયરની ટીમ, સ્થાનિક નેતાઓ સહિત અધિકારીઓ ઘટના સ્થળે દોડી આવ્યા હતા. સમગ્ર ઘટનાક્રમ વચ્ચે કાટમાળ નીચે દબાયેલી એક મહિલાને ફાયર વિભાગના જવાનો દ્વારા સુરક્ષિત બહાર કાઢવામાં આવી છે. મહિલાની બચાવવા માટેની બૂમો સાંભળી તાત્કાલિક બહાર કાઢવામાં આવી અને સારવાર અર્થે હોસ્પિટલ ખસેડવામાં આવી છે. હજુ પણ બિલ્ડીંગના કાટમાળ નીચે અન્ય લોકો દબાયા હોવાની આશંકા છે.
ચોકીદાર પાસેથી મળેલી પ્રાથમિક માહિતી અનુસાર, 30 ફ્લેટમાંથી ચાર-પાંચ ફ્લેટમાં જ લોકો રહેતા હતા. અંદર એક જ પરિવાર હતો બાકી બધાં લોકો કામ માટે બહાર ગયા હતા. બચાવ કામગીરી હાલ ચાલી રહી છે.
(અરવિંદ ગોંડલિયા – સુરત)
