નવપરિણીત યુગલ બોલીવુડ અભિનેતા રણદીપ હુડ્ડા અને મણિપુરનિવાસી લિન લૈશરામે 11 ડિસેમ્બર, સોમવારે મુંબઈમાં એમનાં લગ્નના રિસેપ્શનનું આયોજન કર્યું હતું, જેમાં ફિલ્મ ઉદ્યોગમાંના એમનાં મિત્રો તથા ખાસ મીડિયાકર્મીઓએ હાજરી આપી હતી. બંને લાંબા સમયથી એકબીજાનાં પ્રેમમાં હતાં અને ગઈ 29 નવેમ્બરે મણિપુરના ઈમ્ફાલ શહેરમાં મૈતઈ સમાજના રિવાજો અનુસાર લગ્ન કર્યાં હતાં. લિનથોઈંગમ્બી ‘લિન’ લૈશરામ 37 વર્ષની છે અને મોડેલ, અભિનેત્રી તથા બિઝનેસવુમન છે. એણે ‘મેરી કોમ’ ફિલ્મમાં કામ કર્યું હતું. 47 વર્ષીય રણદીપ હુડ્ડા હરિયાણાના રોહતનો મૂળ વતની છે. તેની જાણીતી ફિલ્મો છેઃ ‘સાહેબ બીવી ઔર ગેંગસ્ટર’, ‘કોકટેલ’, ‘હાઈવે’, ‘સરબજીત’, ‘લવ આજ કલ’. આવતા વર્ષે તેની ‘સ્વાતંત્ર્ય વીર સાવરકર’ ફિલ્મ રિલીઝ થવાની છે.
