મુંબઈ: વાનખેડે સ્ટેડિયમ ખાતે રવિવારે મુંબઈ ઈન્ડિયન્સની વાર્ષિક ‘એજ્યુકેશન એન્ડ સ્પોર્ટ્સ ફોર ઓલ’ (ESA) મેચ યોજાઈ હતી. રિલાયન્સ ફાઉન્ડેશન અને મુંબઈ ઈન્ડિયન્સના સંયુક્ત ઉપક્રમે યોજાયેલી આ ખાસ મેચ દરમિયાન આખું સ્ટેડિયમ ૨૦,૦૦૦થી વધુ બાળકોના ઉત્સાહ અને ચિચિયારીઓથી ગુંજી ઉઠ્યું હતું અને સમગ્ર સ્ટેડિયમ જાણે ‘બ્લુ સમંદર’માં ફેરવાઈ ગયું હતું.
નીતા મુકેશ અંબાણીના વિઝન હેઠળ શરૂ કરાયેલી આ પહેલમાં મહારાષ્ટ્રભરમાંથી આવેલા વંચિત, પ્રજ્ઞાચક્ષુ (વિઝ્યુઅલી ઈમ્પેરડ) અને દિવ્યાંગ બાળકોએ સ્ટેડિયમમાં લાઈવ મેચની મજા માણી હતી.
“બાળકો ઘણી બધી સુંદર યાદો લઈને ઘરે પાછા ફરે તેવી આશા” – નીતા અંબાણી
બાળકોના અદભુત ઉત્સાહ વિશે વાત કરતા રિલાયન્સ ફાઉન્ડેશનના સ્થાપક અને ચેરપર્સન નીતા એમ. અંબાણીએ જણાવ્યું હતું કે, “સૌથી પહેલા તો બાળકોના ચહેરા પરનો આનંદ જુઓ. અહીંનો ઉત્સાહ અનુભવવો એ ખૂબ જ અદભુત છે. મુંબઈ ઈન્ડિયન્સ પરિવાર માટે આ ખૂબ જ અમૂલ્ય દિવસ છે. અમે ૧૬ વર્ષ પહેલાં રિલાયન્સ ફાઉન્ડેશન દ્વારા ESAની શરૂઆત કરી હતી અને સમાનતા તથા સર્વસમાવેશકતા (inclusion) હંમેશા અમારી વિચારધારાનો હિસ્સો રહ્યા છે.”
આ વર્ષે પ્રથમ વખત નેશનલ એસોસિએશન ફોર ધ બ્લાઈન્ડના ૧૦૦ પ્રજ્ઞાચક્ષુ બાળકો પણ ‘હિયરિંગ બડીઝ’ (સાંભળવામાં મદદ કરતા સાથીદારો) સાથે મેચ જોવા આવ્યા હતા. આ અંગે એક જૂની યાદ તાજી કરતા નીતા અંબાણીએ કહ્યું, “હું છેલ્લા ૨૦ વર્ષથી પ્રજ્ઞાચક્ષુ બાળકો સાથે કામ કરી રહી છું. આ આઈ.પી.એલ. સીઝન શરૂ થઈ તે પહેલાં બાળકોએ મને વિનંતી કરી હતી કે, શું અમે મુંબઈ ઈન્ડિયન્સની મેચ જોવા આવી શકીએ? અમે ક્યારેય સ્ટેડિયમ નથી જોયું અને અમારે લાઈવ મેચનો રોમાંચ અનુભવવો છે.’ એટલે જ આજે આ ૧૦૦ બાળકો અહીં હાજર છે. મને આશા છે કે તેઓ અહીંથી જીવનભર યાદ રહે તેવી સ્મૃતિઓ લઈને જશે.”
ભારતને ઓલિમ્પિક સુધી લઈ જવાનું એક અબજ ભારતીયોનું સપનું
ઇન્ટરનેશનલ ઓલિમ્પિક કમિટી (IOC)ના સભ્ય નીતા અંબાણીએ રિલાયન્સ ફાઉન્ડેશનના રમતગમતના વ્યાપક વિઝન વિશે વાત કરતા ઉમેર્યું કે, “અમે રમતગમત અને શિક્ષણની વિવિધ પહેલો દ્વારા ભારતના ૨૮ રાજ્યોના ૨.૯ કરોડ (૨૯ મિલિયન)થી વધુ બાળકો સુધી પહોંચ્યા છીએ. અમે ૫ વર્ષની નાની ઉંમરથી લઈને ગ્લોબલ સ્ટેજ સુધીના બાળકોને કોચિંગ, સ્પોર્ટ્સ સાયન્સ અને પ્રેક્ટિસની સુવિધાઓ આપીએ છીએ. અમારું અને દેશના એક અબજ લોકોનું સમાન સપનું છે કે એક દિવસ ભારત પોતાના દેશમાં ઓલિમ્પિક ગેમ્સનું આયોજન કરે.”
આયોજનની મુખ્ય વિગતો
-
બાળકોની સહભાગિતા: મહારાષ્ટ્રના અંતરિયાળ વિસ્તારો જેવા કે સતારા, નાસિક, ઇગતપુરી અને વલસાડ સહિતની ૪૦થી વધુ પ્રખ્યાત એનજીઓ (NGO) ભાગીદારોના બાળકો આ મેચના સાક્ષી બન્યા હતા. જેમાં ૨૦૦થી વધુ દિવ્યાંગ અને ૧૦૦ પ્રજ્ઞાચક્ષુ બાળકો સામેલ હતા.
-
વાહનવ્યવહાર: બાળકોને સુરક્ષિત લાવવા અને લઈ જવા માટે ૫૫૦થી વધુ બેસ્ટ (BEST) બસોની વ્યવસ્થા કરવામાં આવી હતી.
-
સ્વયંસેવકો અને સ્ટાફ: સમગ્ર ઈવેન્ટને સફળ બનાવવા માટે રિલાયન્સ, ધીરુભાઈ અંબાણી ઈન્ટરનેશનલ સ્કૂલ અને એનજીઓ તરફથી ૨,૪૦૦થી વધુ સ્વયંસેવકો અને ૧૦૦થી વધુ મેડિકલ સ્ટાફ ખડેપગે રહ્યો હતો. બાળકો માટે ૯૨,૦૦૦ ફૂડ બોક્સની વ્યવસ્થા કરાઈ હતી.
-
પોલીસ બંદોબસ્ત: ટ્રાફિક અને સુરક્ષા વ્યવસ્થા જાળવવા મુંબઈ પોલીસના ૫૫૦ ટ્રાફિક ઓફિસર્સ અને ૪૫૦થી વધુ પોલીસ કર્મચારીઓ તૈનાત કરવામાં આવ્યા હતા.
સુરત (Surat) ખાતે સૌરાષ્ટ્ર પટેલ સેવા સમાજ દ્વારા નિર્મિત ‘જમનાબા વિદ્યાર્થી ભવન’ના લોકાર્પણ કાર્યક્રમમાં હાજરી આપવા મુખ્યમંત્રી ભૂપેન્દ્ર પટેલ અને કેન્દ્રીય મંત્રી મનસુખ માંડવીયા ગાંધીનગરથી સુરત સુધી ‘વંદે ભારત એક્સપ્રેસ’ ટ્રેન (Train) માં મુસાફરી કરીને આવ્યા હતા. કોઈ વિશેષ વીઆઈપી પ્રોટોકોલ વિના સામાન્ય મુસાફરોની જેમ જાહેર પરિવહનનો ઉપયોગ કરીને બંને નેતાઓએ જનતા સમક્ષ પ્રેરણાદાયી ઉદાહરણ પૂરું પાડ્યું હતું.
અમેરિકા અને ઈરાન વચ્ચેના તણાવને કારણે મધ્ય-પૂર્વ એશિયામાં ઊભી થયેલી વૈશ્વિક ઇંધણ કટોકટી વચ્ચે દેશવાસીઓને ઇંધણનો બિનજરૂરી વપરાશ ટાળવા અને જાહેર પરિવહન અપનાવવાનો સંદેશ આપવામાં આવી રહ્યો છે. એવા સમયમાં મુખ્યમંત્રીની આ મુસાફરી માત્ર એક પ્રવાસ નહીં, પરંતુ ઊર્જા બચત, સાદગી અને જવાબદાર જીવનશૈલીનો જીવંત સંદેશ બની રહી હતી.
વંદે ભારત (Vande Bharat Train) જેવી આધુનિક ટ્રેનમાં સામાન્ય નાગરિકોની જેમ સફર કરીને બંને આગેવાનોએ બતાવ્યું કે જાહેર પરિવહન માત્ર સુવિધાજનક જ નહીં, પરંતુ રાષ્ટ્રહિતમાં જવાબદાર પસંદગી પણ બની શકે છે.
મણીબેન ચોક ખાતે નિર્માણ પામેલા આ ભવ્ય સંકુલમાં ૧૦૦૦ વિદ્યાર્થીઓ (students) માટે નિવાસ અને અભ્યાસની સુવિધા સાથે AI રિસર્ચ લેબ, આધુનિક લાઈબ્રેરી અને અદ્યતન શિક્ષણ વ્યવસ્થા ઉભી કરવામાં આવી છે. કેન્દ્રીય મંત્રી મનસુખ માંડવીયા (Mansukh Mandviya) અને રાજ્યસભા સાંસદ ગોવિંદભાઈ ધોળકિયા (Govindbhai Dholakiya) ના હસ્તે સ્વ. કેશુભાઈ પટેલ ઓડિટોરિયમનું ઉદ્ઘાટન પણ કરવામાં આવ્યું હતું.
મુખ્યમંત્રી ભૂપેન્દ્ર પટેલે જણાવ્યું હતું કે પાટીદાર સમાજે ખેતીથી લઈને ઉદ્યોગ, શિક્ષણ, આરોગ્ય, પંચાયત અને પાર્લામેન્ટ સુધી દરેક ક્ષેત્રમાં પોતાની મહેનતથી આગવી ઓળખ ઊભી કરી છે. સુરતને ડાયમંડ, ટેક્સ્ટાઈલ અને કન્સ્ટ્રક્શન હબ બનાવવામાં પણ પાટીદાર સાહસિકોનો મોટો ફાળો રહ્યો છે. શિક્ષણને પ્રાથમિકતા આપનાર સમાજ હંમેશાં પ્રગતિના નવા શિખરો સર કરે છે એમ તેમણે ઉમેર્યું હતું.
તેમણે વડાપ્રધાન નરેન્દ્ર મોદીના વિકસિત ભારત-૨૦૪૭ના સંકલ્પનો ઉલ્લેખ કરી પાણી, વીજળી, પેટ્રોલ અને સોનાના વિવેકપૂર્ણ ઉપયોગને જીવનશૈલી બનાવવાનો અનુરોધ કર્યો હતો.
હર્ષ સંઘવી (Harsh Sanghvi)એ જણાવ્યું હતું કે સૌરાષ્ટ્ર અને ગ્રામ્ય વિસ્તારોમાંથી સુરતમાં ભણવા આવતા સામાન્ય પરિવારોના વિદ્યાર્થીઓ માટે જમનાબા ભવન આશીર્વાદરૂપ બનશે. અહીં વિદ્યાર્થીઓને ઘર જેવી સંસ્કારસભર વ્યવસ્થા મળશે. તેમણે મોબાઈલના વધતા પ્રભાવ વચ્ચે દાદા-દાદીઓને બાળકોને મેદાન અને મંદિર તરફ દોરી જવાની અપીલ પણ કરી હતી.
મહિલા સુરક્ષાના મુદ્દે તેમણે કહ્યું કે કોઈ દીકરી મુશ્કેલીમાં ફસાય ત્યારે સમાજે ટીકા કરતાં તેને હિંમત અને સહયોગ આપવો જોઈએ. અસામાજિક તત્વો સામે કડક કાર્યવાહી માટે સમાજે પોલીસ અને સરકારને સાથ આપવો જરૂરી છે.
મનસુખ માંડવીયાએ જમનાબા વિદ્યાર્થી ભવનને સંસ્કાર અને જ્ઞાનનું કેન્દ્ર ગણાવી જણાવ્યું કે જ્ઞાનશક્તિ અને સમાજશક્તિના સમન્વયથી સમાજના ઉત્થાનનું લક્ષ્ય સાકાર થઈ રહ્યું છે.
કાર્યક્રમમાં કૃષિ મંત્રી જીતુ વાઘાણી, રાજ્ય મંત્રી કૌશિક વેકરિયા, પ્રફુલ પાનશેરિયા સહિત અનેક મહાનુભાવો, ઉદ્યોગપતિઓ, વિદ્યાર્થીઓ અને વાલીઓ ઉપસ્થિત રહ્યા હતા.