Home Blog Page 370

બોલીવુડ અભિનેત્રી શિલ્પા શેટ્ટીના મુંબઈ સ્થિત નિવાસસ્થાન ઈન્કમટેક્સની રેડ પડી

December 18, 2025

ગુરુવારે આવકવેરા વિભાગે બોલીવુડ અભિનેત્રી શિલ્પા શેટ્ટીના મુંબઈ સ્થિત નિવાસસ્થાન પર દરોડા પાડ્યા. આ કાર્યવાહી તેમના બાસ્ટિયન રેસ્ટોરન્ટ સાથે સંબંધિત નાણાકીય વ્યવહારો અને કથિત કર ગેરરીતિઓની તપાસના ભાગ રૂપે કરવામાં આવી રહી છે. સૂત્રોના જણાવ્યા અનુસાર, આવકવેરા વિભાગની વિવિધ ટીમો સવારથી શિલ્પા શેટ્ટીના ઘર અને તેની સાથે સંકળાયેલા સ્થળોએ દસ્તાવેજોની તપાસ કરી રહી છે.

મુંબઈ ઉપરાંત, બેંગલુરુમાં પણ દરોડા પાડવામાં આવ્યા છે, જ્યાં રેસ્ટોરન્ટ અને તેની સાથે સંકળાયેલી કંપનીઓના નાણાકીય રેકોર્ડની તપાસ કરવામાં આવી રહી છે. આવકવેરા વિભાગને હોટલ વ્યવસાયમાં રોકાણ, આવક અને કર ચૂકવણીમાં અનિયમિતતા હોવાની શંકા છે. હાલમાં, શિલ્પા શેટ્ટી કે તેના પરિવાર દ્વારા કોઈ સત્તાવાર નિવેદન જારી કરવામાં આવ્યું નથી. તપાસ પૂર્ણ થયા પછી જ આગળની કાર્યવાહી સ્પષ્ટ થશે.

બુધવારે, બેંગલુરુ પોલીસે બાસ્ટિયન સહિત બે રેસ્ટોરન્ટ સામે નિર્ધારિત સમય કરતાં વધુ કામ કરવા બદલ કેસ દાખલ કર્યો હતો. શિલ્પા શેટ્ટી પાસે બાસ્ટિયન ગાર્ડન સિટી રેસ્ટોરન્ટમાં 50 ટકા હિસ્સો હોવાનું કહેવાય છે. આ પછી, અભિનેત્રી શિલ્પા શેટ્ટીએ ચર્ચ સ્ટ્રીટ પર સ્થિત બાસ્ટિયન ગાર્ડન સિટી સામે દાખલ કરેલા કેસનો જવાબ આપ્યો.

શિલ્પા શેટ્ટીએ ઇન્સ્ટાગ્રામ પર એક નિવેદન જારી કરીને આરોપોને સ્પષ્ટપણે નકારી કાઢ્યા. તેણીએ લખ્યું કે તેના પરના આરોપો સંપૂર્ણપણે પાયાવિહોણા અને પ્રેરિત છે. શિલ્પાએ ઉમેર્યું કે જે મુદ્દાઓ ઉઠાવવામાં આવી રહ્યા છે તે કોઈપણ કાનૂની આધાર વિના તેમને ગુનાહિત બનાવવાનો પ્રયાસ છે.

રણજીત કુન્દ્રાએ રેસ્ટોરન્ટ શરૂ કરી

નોંધનીય છે કે બાસ્ટિયન ગાર્ડન સિટી રેસ્ટોરન્ટ બાસ્ટિયન હોસ્પિટાલિટી દ્વારા સંચાલિત છે, જેની સ્થાપના ઉદ્યોગપતિ રણજીત બિન્દ્રા દ્વારા કરવામાં આવી હતી. અહેવાલો અનુસાર, શિલ્પા શેટ્ટીએ 2019 માં આ સાહસમાં રોકાણ કર્યું હતું. દરમિયાન, આવકવેરા વિભાગે ચર્ચ સ્ટ્રીટ પર બાસ્ટિયન પબ પર પણ દરોડા પાડ્યા હતા. જો કે, આ કાર્યવાહીની વિગતો હજુ સુધી જાહેર કરવામાં આવી નથી. હવે એવું જાણવા મળ્યું છે કે શિલ્પાના મુંબઈ સ્થિત ઘરે પણ દરોડા પાડવામાં આવ્યા છે.

હિજાબ વિવાદ વચ્ચે CM નીતિશ કુમારની સુરક્ષા વધારી દેવામાં આવી

December 18, 2025

બિહારના મુખ્યમંત્રી નીતિશ કુમારની સુરક્ષા અંગે એક મોટો નિર્ણય લેવામાં આવ્યો છે. હિજાબ વિવાદ બાદ મળેલા ગુપ્ત માહિતીના આધારે, મુખ્યમંત્રીની સુરક્ષા વધુ કડક કરવામાં આવી છે. સૂત્રોના જણાવ્યા અનુસાર, ગુપ્તચર એજન્સીઓએ ચિંતા વ્યક્ત કરી છે કે કેટલાક અસામાજિક અને ગુનાહિત તત્વો નીતિશ કુમારને નુકસાન પહોંચાડવાનો પ્રયાસ કરી શકે છે, જેના કારણે વહીવટીતંત્રને હાઇ એલર્ટ પર રાખવામાં આવ્યું છે.

સૂત્રો કહે છે કે બિહારના ડીજીપી અને એડીજી (એસએસજી સુરક્ષા) ના સ્તરે મુખ્યમંત્રીની સુરક્ષા વ્યવસ્થાની સમીક્ષા કરવામાં આવી છે. આ સમીક્ષા બાદ, સ્પેશિયલ સિક્યુરિટી ગ્રુપ (એસએસજી) ના સુરક્ષા ઘેરાને કડક બનાવવાના નિર્દેશો જારી કરવામાં આવ્યા છે. ફક્ત હાઇ-પ્રોફાઇલ અને પસંદગીના વ્યક્તિઓને જ મુખ્યમંત્રી નીતિશ કુમારની નજીક જવાની મંજૂરી આપવામાં આવશે. તેમના કાર્યક્રમો, નિવાસસ્થાન અને હિલચાલ દરમિયાન સુરક્ષા પ્રોટોકોલ વધુ મજબૂત બનાવવામાં આવ્યા છે.

અહેવાલ છે કે તમામ જિલ્લાઓના એસએસપી અને એસપીને પણ ખાસ તકેદારી રાખવા સૂચના આપવામાં આવી છે. ખાસ કરીને સંવેદનશીલ વિસ્તારોમાં વધારાની પોલીસ દળ તૈનાત અને દેખરેખ વધારવામાં આવી રહી છે. સૂત્રોના જણાવ્યા અનુસાર, તાજેતરના દિવસોમાં સોશિયલ મીડિયા દ્વારા મુખ્યમંત્રીને ધમકીઓ મળી રહી હોવાની માહિતી સામે આવી છે. આ માહિતીને ગંભીરતાથી લેતા, સુરક્ષા એજન્સીઓએ ધમકી અંગે ચિંતા વ્યક્ત કરી છે અને તે મુજબ સુરક્ષા વ્યવસ્થામાં સુધારો કર્યો છે.

નોકરીયાત લોકો માટે એક મોટી રાહતભરી જાહેરાત કરવામાં આવી

December 18, 2025

કર્મચારી ભવિષ્ય નિધિ સંગઠન (EPFO) તરફથી નોકરીપેશા લોકો અને તેમના પરિવાર માટે એક મોટી રાહતભરી જાહેરાત સામે આવી છે. EPFOએ EDLI (Employees’ Deposit Linked Insurance) સ્કીમને લઈને લાંબા સમયથી ચાલી રહેલી ગૂંચવણ પર સ્પષ્ટતા કરી છે. નવા સ્પષ્ટીકરણ મુજબ, એક નોકરી છોડીને બીજી નોકરી જોડવામાં જો માત્ર શનિવાર, રવિવાર અથવા જાહેર રજાઓ આવે છે, તો તેને હવે ‘સેવામાં બ્રેક’ ગણવામાં નહીં આવે.

EPFO દ્વારા 17 ડિસેમ્બર 2025ના રોજ જારી કરાયેલા સર્ક્યુલર અનુસાર, આ નિર્ણયનો મુખ્ય હેતુ સતત સેવા (Continuous Service)ને લઈને થતા ગેરસમજ અને તેના કારણે નકારવામાં આવતા EDLI ક્લેમ્સને રોકવાનો છે. અત્યાર સુધી અનેક કેસોમાં જોવામાં આવ્યું હતું કે બહુ નાનો ગેપ હોવા છતાં તેને બ્રેક માનવામાં આવતો હતો, જેના કારણે કર્મચારીના પરિવારને ઇન્શ્યોરન્સનો સંપૂર્ણ લાભ મળતો નહોતો.

એક મહત્વપૂર્ણ કેસનો ઉલ્લેખ કરતાં EPFOએ જણાવ્યું કે એક કર્મચારીએ શુક્રવારે પોતાની જૂની નોકરી છોડી હતી અને સોમવારે નવી EPF-કવર્ડ કંપનીમાં જોડાયો હતો. વચ્ચે માત્ર શનિવાર અને રવિવાર આવ્યા હતા, છતાં તેને બ્રેક ઇન સર્વિસ માનવામાં આવ્યો અને પરિવારનો EDLI ક્લેમ રદ થઈ ગયો. આવા અનેક કિસ્સાઓ સામે આવ્યા બાદ EPFOએ આ સ્પષ્ટતા જરૂરી માની.

નવી ગાઇડલાઇન અનુસાર, જો બે નોકરીઓ વચ્ચેનો ગેપ માત્ર સાપ્તાહિક રજા, રાષ્ટ્રીય રજા, રાજપત્રિત રજા, રાજ્ય સરકાર દ્વારા જાહેર કરાયેલી રજા અથવા પ્રતિબંધિત રજાના કારણે હોય, તો તે સમયગાળો સતત સેવામાં જ ગણાશે. એટલે કે શુક્રવારે નોકરી છોડીને સોમવારે નવી નોકરી જોડનાર કર્મચારીની EDLI પાત્રતા પર હવે કોઈ અસર નહીં પડે.

EPFOએ વધુમાં જણાવ્યું છે કે અલગ-અલગ EPF હેઠળ આવતી સંસ્થાઓમાં કામ કરતા કર્મચારીઓ માટે પણ રાહત આપવામાં આવી છે. જો બે નોકરીઓ વચ્ચે 60 દિવસ સુધીનો ગેપ હોય, તો તેને પણ હવે સતત સેવા માનવામાં આવશે. આ નિર્ણય ખાસ કરીને એવા કર્મચારીઓ માટે ફાયદાકારક છે, જેમણે નોકરી બદલતી વખતે થોડો સમયનો બ્રેક લીધો હોય.

આ ઉપરાંત, EDLI સ્કીમ હેઠળ તાજેતરમાં કેટલાક અન્ય મહત્વપૂર્ણ ફેરફારો પણ અમલમાં મૂકવામાં આવ્યા છે. હવે એવા કર્મચારીઓના આશ્રિતોને પણ ઓછામાં ઓછા ₹50,000નો લાભ મળશે, જેમણે સતત 12 મહિના સેવા આપી નથી અને જેમનો સરેરાશ PF બેલેન્સ ₹50,000થી ઓછો રહ્યો છે. આ પગલાથી ઓછા પગારવાળા કર્મચારીઓના પરિવારને મોટી સુરક્ષા મળશે.

EPFOએ એ પણ સ્પષ્ટ કર્યું છે કે જો કોઈ કર્મચારીનું અવસાન તેના છેલ્લાં PF યોગદાનના છ મહિનાની અંદર થાય છે અને તે હજી પણ કંપનીના રેકોર્ડમાં નોંધાયેલ હોય, તો તેના પરિવારને EDLI લાભ મળશે. અગાઉ આવી પરિસ્થિતિઓમાં પણ ક્લેમ નકારવામાં આવતા હતા, પરંતુ હવે નિયમો વધુ માનવિય બનાવવામાં આવ્યા છે.

નિષ્ણાતોના મત અનુસાર, EPFOનો આ નિર્ણય લાખો કર્મચારીઓ અને તેમના પરિવાર માટે મોટો સહારો બનશે. ખાસ કરીને અચાનક મૃત્યુ જેવી દુર્ભાગ્યપૂર્ણ પરિસ્થિતિમાં પરિવારને આર્થિક મદદ સમયસર મળી શકશે. સરકાર અને EPFOનો પ્રયાસ છે કે સામાજિક સુરક્ષા યોજનાઓનો લાભ ખરેખર જરૂરિયાતમંદ સુધી પહોંચે.

ભારત અને ઓમાન વચ્ચે મુક્ત વેપાર સમજૂતી

December 18, 2025

નવી દિલ્હીઃ ભારત અને ઓમાને મુક્ત વેપાર સમજૂતી પર હસ્તાક્ષર કર્યા હતા. આ કરાર હેઠળ ઓમાનમાં ભારતના 98 ટકા નિકાસને ડ્યુટી-ફ્રી પ્રવેશ મળશે, જેમાં કાપડ, કૃષિ અને ચામડાંનાં ઉત્પાદનો સામેલ છે. બીજી તરફ ઓમાનમાંથી આવતા ખજૂર, માર્બલ અને પેટ્રોકેમિકલ ઉત્પાદનો પર ભારત શૂલ્કમાં ઘટાડો કરશે. આ સમજૂતી આગામી નાણાકીય વર્ષની પ્રથમ ત્રિમાસિકી (Q1FY27)થી અમલમાં આવવાની શક્યતા છે. આ કરાર એવા સમયે થયો છે જ્યારે ભારતને તેના સૌથી મોટા નિકાસ બજાર અમેરિકાથી 50 ટકા સુધીના ઊંચા ટેરિફનો સામનો કરવો પડી રહ્યો છે.

આ સમજૂતી પર વાણિજ્ય અને ઉદ્યોગ મંત્રી પીયૂષ ગોયલે અને ઓમાનના વાણિજ્ય, ઉદ્યોગ અને રોકાણ પ્રોત્સાહન મંત્રી કૈસ બિન મહમ્મદ અલ યુસુફે વડા પ્રધાન નરેન્દ્ર મોદીની હાજરીમાં હસ્તાક્ષર કર્યા હતા.

98 ટકા ટેરિફ લાઇન પર ઓમાનની ઝીરો-ડ્યુટી ઓફર

ઓમાને તેની 98 ટકા કરતાં વધુ ટેરિફ લાઇન્સ (અથવા ઉત્પાદન શ્રેણીઓ) પર શૂન્ય શુલ્કની ઓફર કરી છે, જેને કારણે ઓમાનમાં ભારતની કુલ નિકાસના 99.38 ટકા ભાગને આવરી લેવામાં આવશે. આથી રત્ન અને આભૂષણ, કાપડ, ચામડાં, ફૂટવેર, રમતોનો સામાન, પ્લાસ્ટિક, ફર્નિચર, કૃષિ ઉત્પાદનો, એન્જિનિયરિંગ ઉત્પાદનો, ફાર્માસ્યુટિકલ્સ, મેડિકલ ડિવાઇસિસ અને ઓટોમોબાઇલ જેવાં તમામ મુખ્ય શ્રમ-આધારિત ક્ષેત્રોને સંપૂર્ણ ટેરિફ છૂટ મળશે. આમાંથી 97.96 ટકા ઉત્પાદન શ્રેણીઓ પર તરત જ ટેરિફ હટાવી દેવામાં આવશે.

Under the leadership of PM @narendramodi ji, India and Oman have inked a landmark Free Trade Agreement (FTA), delivering zero-tariff access across several labour-intensive and manufacturing sectors.

The agreement provides significant benefits to sectors such as gems and… pic.twitter.com/dbP2S3MRFV

— Dept of Commerce, GoI (@DoC_GoI) December 18, 2025

ભારત તરફથી પણ શૂલ્કમાં રાહત

ભારત તેની કુલ 12,556 ટેરિફ લાઇન્સમાંથી 77.79 ટકા પર શૂલ્કમાં રાહત આપશે, જે મૂલ્યની દ્રષ્ટિએ ઓમાનમાંથી ભારતના 94.81 ટકા આયાતને આવરી લે છે. ઓમાનના નિકાસ હિતવાળા અને ભારત માટે સંવેદનશીલ ઉત્પાદનો—જેમ કે ખજૂર, માર્બલ અને પેટ્રોકેમિકલ ઉત્પાદનો—માટે ભારતે ટેરિફ-રેટ ક્વોટા (TRQ) આધારિત રિયાયત આપવાની ઓફર કરી છે.

સંવેદનશીલ ઉત્પાદનો FTAથી બહાર

ભારતે પોતાનાં હિતોની રક્ષા માટે કેટલાંક સંવેદનશીલ ઉત્પાદનોને આ સમજૂતીમાંથી બહાર રાખ્યાં છે. તેમાં કૃષિ ઉત્પાદનો (ડેરી, ચા, કોફી, રબર, તમાકુ), સોનું-ચાંદીના બુલિયન, આભૂષણ, ફૂટવેર, રમતોનો સામાન અને ઘણા બેઝ મેટલ્સનો સ્ક્રેપ સામેલ છે. હાલ ઓમાનમાં શ્રમ-આધારિત ઉત્પાદનો પર આશરે પાંચ ટકા આયાત શૂલ્ક લાગે છે.

પૂર્વોત્તરને અલગ કરવાની પોકળ ધમકી આપનાર હસનત અબદુલ્લા છે કોણ?

December 18, 2025

ઢાકાઃ શેખ હસીના સરકારના તખતાપલટ પછીથી ભારત અને બાંગ્લાદેશ વચ્ચેના સંબંધોમાં કડવાશ આવી છે. સમયાંતરે બાંગ્લાદેશના નેતાઓ ભારતવિરોધી નિવેદનો આપી દ્વિપક્ષી સંબંધોને વધુ નુકસાન પહોંચાડતા આવ્યા છે. આ કડીમાં હવે હસનત અબદુલ્લાનું નામ જોડાયું છે. હસનત બાંગ્લાદેશની નેશનલ સિટિઝન પાર્ટી (NCP)ના નેતા છે. ભારતનાં પૂર્વોત્તર રાજ્યો અંગે તેમના ભડકાઉ અને આપત્તિજનક નિવેદન પર ભારતમાં તીવ્ર પ્રતિક્રિયા જોવા મળી રહી છે. આસામના CM હિમંતા બિસ્વા સરમા સહિત ભાજપના અનેક નેતાઓએ હસનતના નિવેદન પર કડક પ્રતિક્રિયા આપી છે.

એ દરમિયાન ઢાકા સહિત બાંગ્લાદેશમાં આવેલા ભારતીય રાજદૂતની સુરક્ષા અંગે ચિંતા વ્યક્ત કરવા માટે નવી દિલ્હીએ બુધવારે બાંગ્લાદેશના રાજદૂતને બોલાવ્યા હતા.

હસનતે શું કહ્યું?

હસનત અબદુલ્લાએ તાજેતરમાં ધમકી આપતાં કહ્યું હતું કે જો બાંગ્લાદેશ અસ્થિર થશે તો તે ભારતના પૂર્વોત્તર (સેવન સિસ્ટર્સ) રાજ્યોને અલગ કરવાની દિશામાં પગલાં લેશે અને આ સાત રાજ્યોના અલગાવવાદીઓને બાંગ્લાદેશમાં આશ્રય આપશે. ભારતના પૂર્વોત્તરના આ સાત રાજ્ય છે – અરુણાચલ પ્રદેશ, આસામ, મણિપુર, મેઘાલય, મિઝોરમ, નાગાલેન્ડ અને ત્રિપુરા. તેમાંના આસામ, મેઘાલય, ત્રિપુરા અને મિઝોરમની બાંગ્લાદેશ સાથે લાંબી સરહદ છે.

બાંગ્લાદેશમાં ભારતે બંધ કર્યું વિઝા સેન્ટર

ઢાકામાં સુરક્ષા પરિસ્થિતિ ખરાબ થતાં ભારતે જમુના ફ્યુચર પાર્કમાં આવેલા ઇન્ડિયન વિઝા એપ્લિકેશન સેન્ટરને અસ્થાયી રીતે બંધ કરી દીધું છે. આ બાંગ્લાદેશનું સૌથી મોટું વિઝા પ્રોસેસિંગ હબ છે અને રાજધાનીમાંથી આવતી મોટા ભાગની ભારતીય વિઝા અરજીઓ અહીંથી સંભાળવામાં આવે છે.

🚨Bangladesh trying to provoke India again ‼️

National Citizen Party (NCP) leader Hasnat Abdullah threatens to separate India’s Seven Sisters by sheltering militants in Bangladesh and providing them with training and weapons. pic.twitter.com/KpnFwJzehe

— Amitabh Chaudhary (@MithilaWaala) December 16, 2025

હેલ્થકેર સંકટ વધી શકે

સસ્તી અને આધુનિક તબીબી સારવાર માટે બાંગ્લાદેશી દર્દીઓ લાંબા સમયથી ભારત પર નિર્ભર રહ્યા છે. કેન્સર સારવાર, હૃદય સર્જરીથી લઈને અંગ પ્રત્યારોપણ સુધી દર મહિને હજારો બાંગ્લાદેશી દર્દીઓ ભારતીય હોસ્પિટલોનો સહારો લે છે. વિઝા સેન્ટર બંધ થતાં આ મહત્વપૂર્ણ જીવનરેખા અસરગ્રસ્ત બની છે.

વેપાર પર પણ અસર

ભારત અને બાંગ્લાદેશ દક્ષિણ એશિયાના સૌથી મજબૂત દ્વિપક્ષી વેપારી સંબંધો ધરાવે છે. કાચા માલની ખરીદી, કરાર ચર્ચા, ટ્રેડ ફેરમાં ભાગ લેવા અને સપ્લાય ચેઇન જાળવવા માટે બાંગ્લાદેશી વેપારીઓ વારંવાર ભારત આવે છે. વિઝા સેવાઓ બંધ થવાથી આવી વ્યાવસાયિક મુસાફરીમાં નોંધપાત્ર ઘટાડો થવાની શક્યતા છે.

GBUના વિદ્યાર્થીઓએ ગર્ભાશયમાં ગર્ભ ટકાવી રાખનારી mRNA ટેકનોલોજી વિકસાવી

December 18, 2025

ગાંધીનગર: ગુજરાત બાયોટેકનોલોજી યુનિવર્સિટી (GBU)ના વિદ્યાર્થીઓએ તબીબી વિજ્ઞાનના ક્ષેત્રમાં એક સીમાચિહ્નરૂપ સિદ્ધિ હાંસલ કરી છે. નિઃસંતાન દંપતીઓ માટે આશાનું કિરણ ગણાતી આઈ.વી.એફ. (IVF) પદ્ધતિમાં વારંવાર મળતી નિષ્ફળતાને રોકવા માટે આ વિદ્યાર્થીઓએ mRNA-આધારિત એક અદ્યતન થેરાપી વિકસાવી છે. આ નવતર સંશોધન બદલ અમદાવાદ સ્થિત વિક્રમ સારાભાઈ કોમ્યુનિટી સાયન્સ સેન્ટર (VASCSC) દ્વારા આજે આયોજિત ‘WAAH સાયન્સ લોરિએટ એવોર્ડ્સ ૨૦૨૫’માં ‘યંગ લોરિએટ’ કેટેગરીમાં પ્રથમ સ્થાન પ્રાપ્ત થયું છે. આ ટીમમાં ટીમ લીડર તરીકે પ્લાન્ટ બાયોટેકનોલોજીના અરિન જૈન તેમજ મેડિકલ બાયોટેકનોલોજીની સંસ્કૃતિ તથા મેડિકલ બાયોટેકનોલોજીના ભૂતપૂર્વ વિદ્યાર્થિની શુભાંગી ઝાનો સમાવેશ થાય છે.

શું છે સમસ્યા અને કેવી રીતે ભવિષ્યમાં ઉકેલ આવશે ?

આજકાલ અનેક દંપતીઓ ગર્ભધારણ માટે IVF જેવી આધુનિક પ્રક્રિયાનો સહારો લે છે, પરંતુ આંકડા દર્શાવે છે કે પ્રથમ પ્રયાસમાં લગભગ ૪૦ થી ૫૦ ટકા કિસ્સાઓમાં નિષ્ફળતા મળે છે. તેનું મુખ્ય કારણ ‘રિકરન્ટ ઇમ્પ્લાન્ટેશન ફેલ્યોર’ (RIF) છે, જેમાં ભ્રૂણ ગર્ભાશયની દીવાલ સાથે સફળતાપૂર્વક જોડાઈ શકતું નથી. આ પડકારને પહોંચી વળવા GBUની ‘ટીમ ઇમ્મુનોસ્ટેટ’ એ એક ખાસ mRNA કન્સ્ટ્રક્ટ તૈયાર કર્યું છે. આ ટેકનોલોજી ગર્ભાશયના આંતરિક સ્તરો (Epithelial અને Stromal layers)ની સ્થિરતામાં નોંધપાત્ર વધારો કરશે અને તેને ગર્ભ ધારણ કરવા માટે વધુ સક્ષમ બનાવશે. આ ક્રાંતિકારી થેરાપીના ઉપયોગથી ભવિષ્યમાં IVFના સફળતાના દરમાં મોટો બદલાવ આવશે તેવી પ્રબળ આશા સેવાઈ રહી છે.

‘સાયન્સ ફોર સોસાયટી’: રાષ્ટ્રીય ફલક પર GBUનો ડંકો
VASCSC દ્વારા આયોજિત સ્પર્ધા ‘સાયન્સ ફોર સોસાયટી’ થીમ પર આધારિત હતી, જેમાં દેશભરની અનેક ટીમો વચ્ચે સ્પર્ધા યોજાઈ હતી. GBUની ટીમે સાબિત કર્યું કે વિજ્ઞાનનો સાચો ઉપયોગ જનસામાન્યની વાસ્તવિક સમસ્યાઓ ઉકેલવા માટે થવો જોઈએ. આ સિદ્ધિ બદલ ટીમને રૂ.૫૦,૦૦૦ની સ્કોલરશિપ અને યંગ લોરિએટ એવોર્ડ એનાયત કરાયો. જ્યારે ડો રોહિણી નાયરને પણ રૂ. ૧૫,૦૦૦/-ની ફેલોશિપ અને પ્રશસ્તિપત્ર આપવામાં આવ્યું હતું.

ટીમ ‘ઇમ્મુનોસ્ટેટ’ને મેડિકલ બાયોટેકનોલોજીના પ્રોફેસર ડૉ. રોહિણી આર. નાયર દ્વારા મૂલ્યવાન માર્ગદર્શન પૂરું પાડવામાં આવ્યું હતું. ડૉ. નાયર પોતે સંશોધન ક્ષેત્રે આંતરરાષ્ટ્રીય સ્તરે નામના ધરાવે છે. તેઓ પ્રતિષ્ઠિત ‘મેરી-ક્યુરી કો-ઇન્વેસ્ટ ફેલોશિપ’ (Marie-Curie Co-Invest Fellowship) અને ‘રામલિંગસ્વામી રી-એન્ટ્રી ફેલોશિપ’ મેળવી ચૂક્યા છે.તાજેતરમાં જ તેમને ‘ગેટ્સ ફાઉન્ડેશન ઇન્ડિયા’ (Gates Foundation India) તરફથી મહત્વપૂર્ણ સંશોધન ગ્રાન્ટ પણ પ્રાપ્ત થઈ છે. ડૉ. રોહિણી નાયરે આ સિદ્ધિ અંગે ગૌરવ વ્યક્ત કરતા જણાવ્યું હતું કે, “આ એવોર્ડ યુનિવર્સિટીમાં વિકસતી મજબૂત સંશોધન સંસ્કૃતિ અને વિદ્યાર્થીઓની બાયોમેડિકલ ક્ષેત્રમાં નવીન અને અસરકારક ઉકેલો રજૂ કરવાની ઉત્કૃષ્ટ ક્ષમતા દર્શાવે છે.

વિકસિત ભારત @ ૨૦૪૭ અને BioE3 નીતિને વેગ

વિદ્યાર્થીઓની આ સિદ્ધિ ભારત સરકારની નવી BioE3 નીતિ (Biotechnology for Economy, Employment and Environment)ના ઉદ્દેશો સાથે સુસંગત છે. સંસ્થાના નાયબ કુલસચિવ અને એકેડમિક વિભાગના વહીવટી વડા વિમલ શાહે આ પ્રસંગે ખુશી વ્યક્ત કરતા જણાવ્યું કે, આખા ગુજરાતમાં GBU એકમાત્ર યુનિવર્સિટી છે જ્યાં ભારતના ૧૭ રાજ્યમાંથી વિદ્યાર્થીઓ શૈક્ષણિક અને સંશોધન કરવા માટે માસ્ટર્સ ડિગ્રી કરવા આવે છે અને આ વિદ્યાર્થીઓને યુનિવર્સિટીના ઇન્ડસ્ટ્રી અને સોસાયટીને મદદરૂપ થઇ શકે એવા સંશોધનો માટે પ્રોત્સાહિત કરવામાં આવે છે. તાજેતરમાં યુનિવર્સિટીમાંથી માસ્ટર્સ થયેલ એક વિદ્યાર્થીને અમેરિકાની પ્રતિષ્ઠિત જ્યોર્જિયા યુનિવર્સિટીમાં પીએચડી કરવા માટે રૂ. એક કરોડની ફેલોશીપ મળેલ છે જે યુનિવર્સિટી માટે ગૌરવની વાત છે.

પ્રોડક્ટ-ઓરિએન્ટેડ સંશોધન દ્વારા ભવિષ્ય માટે બાયોટેક વ્યાવસાયિકો તૈયાર કરવા ગુજરાત બાયોટેકનોલોજી યુનિવર્સિટી (GBU) એ ગુજરાત સરકાર દ્વારા સ્થાપિત, વિશ્વની પ્રથમ સમર્પિત બાયોટેકનોલોજી યુનિવર્સિટી છે. GIFT સિટી પાસે ૨૩ એકરમાં ફેલાયેલી આ યુનિવર્સિટી સ્કોટલેન્ડની યુનિવર્સિટી ઓફ એડિનબર્ગ સાથેના સહયોગથી શરૂ કરવામાં આવી છે.

ગામની વસતિ 1,500, પણ ત્રણ મહિનામાં 27,397 બાળકોના જન્મ, જાણો…

December 18, 2025

નવી દિલ્હીઃ મહારાષ્ટ્રના એક ગામમાં માત્ર ત્રણ મહિનાની અંદર 27,397 જન્મની નોંધણીઓ નોંધવામાં આવી છે. આશ્ચર્યજનક વાત એ નથી કે એટલા જન્મ નોંધાયા, પરંતુ જે આંકડાઓ સામે આવ્યા છે તે સંપૂર્ણપણે અલગ જ વાત કહે છે. જે ગામમાં 27,000થી વધુ જન્મ નોંધાયેલા બતાવવામાં આવ્યા છે, ત્યાંની કુલ વસતિ માત્ર 1500 છે. આ કારણે આ મામલાને મહારાષ્ટ્રના સૌથી મોટા સાયબર ફ્રોડ તરીકે જોવામાં આવી રહ્યો છે. ઘણા લોકો તેને જન્મ પ્રમાણપત્ર કૌભાંડ પણ કહી રહ્યા છે.

આ આખો મામલો યવતમાળ જિલ્લાના અર્ણી તાલુકાની શેદુરુસાણી ગ્રામ પંચાયત સાથે જોડાયેલો છે. હકીકતમાં, સપ્ટેમ્બરથી નવેમ્બર, 2025 દરમિયાન પ્રમાણપત્રોની તપાસ કરવામાં આવી ત્યારે આ ગરબડ બહાર આવી હતી.

તપાસમાં સામે આવ્યું હતું કે સિવિલ રજિસ્ટ્રેશન સિસ્ટમ (CRS)માં જ છેડછાડ કરવામાં આવી હતી. ફરિયાદ મળ્યા બાદ જિલ્લા પરિષદના મુખ્ય કાર્યકારી અધિકારી (CEO)એ એક તપાસ સમિતિની રચના કરી હતી. સમિતિની તપાસમાં સ્પષ્ટ થયું કે 27,397 જન્મ નોંધણીઓ જરૂર કરવામાં આવી હતી, પરંતુ તે આ ગ્રામ પંચાયતની બહારના લોકોની હતી.

હાલમાં પ્રશાસન એ બાબતની તપાસ કરી રહ્યું છે કે CRSની લોગિન ID એટલી મોટી સંખ્યામાં કેવી રીતે કોમ્પ્રોમાઇઝ થઈ. એ સાથે જ એ પણ જાણવાનો પ્રયાસ થઈ રહ્યો છે કે શું ખોટી જન્મ નોંધણી કરાવીને સરકારી યોજનાઓનો લાભ લેવા પ્રયાસ થયો હતો કે નહીં. એ દરમિયાન, ભાજપના વરિષ્ઠ નેતા કિરીટ સોમૈયા જ્યારે ગામની મુલાકાતે પહોંચ્યા, ત્યારે તેમણે દાવો કર્યો કે નોંધાયેલા કેસોમાંથી લગભગ 99 ટકા લોકો પશ્ચિમ બંગાળ અને ઉત્તર પ્રદેશના છે.

લોકસભામાં ભારે હંગામા વચ્ચે વિકસિત ભારત ‘જી રામ જી’ બિલ પાસ

December 18, 2025

નવી દિલ્હીઃ લોકસભાએ ગુરુવારે વિરોધ પક્ષોના ભારે હંગામા વચ્ચે ‘વિકસિત ભારત–જી રામ જી બિલ, 2025’ને મંજૂરી આપી દીધી હતી. ‘રોજગાર અને આજીવિકા મિશન (ગ્રામીણ) (વિકસિત ભારત–જી રામ જી) વિધેયક, 2025’ પર બુધવારે મધરાત બાદ ચર્ચા પૂર્ણ થઈ હતી. આ ચર્ચામાં કુલ 99 સભ્યોએ ભાગ લીધો હતો. આ પ્રસ્તાવિત કાયદો 20 વર્ષ જૂના મહાત્મા ગાંધી રાષ્ટ્રીય ગ્રામીણ રોજગાર ગેરંટી અધિનિયમ (MGNREGA)ની જગ્યા લેશે.

ગ્રામીણ વિકાસ મંત્રી શિવરાજ સિંહ ચૌહાણ દ્વારા વિધેયક પર ચર્ચાનો જવાબ આપ્યા બાદ સંસદે તેને ધ્વનિમતથી પાસ કરી દીધો. વિધેયક પાસ થતાં જ લોકસભા સ્પીકર ઓમ બિરલાએ સંસદની કાર્યવાહી બપોરે 1. 07 કલાકે સ્થગિત કરી હતી, અને શુક્રવારે સવારે 11 વાગ્યા સુધી માટે મુલતવી રાખી.

લોકસભા સ્પીકર ઓમ બિરલાએ મનરેગાની જગ્યાએ સરકાર દ્વારા લાવવામાં આવેલા ‘વિકસિત ભારત–જી રામ જી વિધેયક, 2025’ને વિચારવિમર્શ માટે સંસદીય સમિતિને મોકલવાની વિરોધ પક્ષની માગને ગુરુવારે નામંજૂર કરી દીધી હતી. કોંગ્રેસના સાંસદ કે.સી. વેણુગોપાલે વિધેયકને સંસદની સ્થાયી સમિતિ અથવા સંયુક્ત સંસદીય સમિતિ (JPC)ને મોકલવાની માગ ઉઠાવી હતી.

VIDEO | Parliament Winter Session: After introducing the Viksit Bharat Guarantee for Rozgar and Ajeevika Mission (Gramin) (VB-G RAM G) Bill, 2025 in the Lok Sabha, Union Minister Shivraj Singh Chouhan says, “Mahatma Gandhi ji lives in our hearts. It was the resolve of both Gandhi… pic.twitter.com/AIZoQTneFr

— Press Trust of India (@PTI_News) December 16, 2025

તેમણે કહ્યું, આખા સંસદની ભાવના એ જ છે. સરકાર તેને સંસદીય સમિતિને મોકલે. અમે સહયોગ આપવા તૈયાર છીએ. સ્પીકર ઓમ બિરલાએ કહ્યું હતું કે આ વિધેયક અંગે 99 સભ્યોએ પોતાના વિચારો રજૂ કર્યા છે. મોડી રાત્રિ સુધી ચર્ચા થઈ હતી. તમામ પક્ષોના સભ્યોના અભિપ્રાય આવ્યા. વિરોધ પક્ષની મગ પર મેં ચર્ચાનો સમય પણ વધાર્યો હતો.”

તેમણે વિરોધ પક્ષના સભ્યોને કહ્યું હતું કે આ રીતે વિરોધ કરવો યોગ્ય પરંપરા નથી. ત્યાર બાદ શિવરાજ સિંહ ચૌહાણે વિધેયક પર ચર્ચાનો જવાબ આપવાનું શરૂ કર્યું. તેમણે કહ્યું કે વિરોધ પક્ષનો આ પ્રકારનો વિરોધ મહાત્મા ગાંધીના અહિંસાના સિદ્ધાંતને તાર-તાર કરે છે. આ પછી વિરોધ પક્ષના સભ્યોએ નારેબાજી શરૂ કરી દીધી હતી.

ફ્લાઈટની જેમ ટ્રેનમા પણ વધારે સામાન માટે ચૂકવવો પડશે ચાર્જ

December 18, 2025

ભારતમાં લાખો લોકો દરરોજ ટ્રેનમાં મુસાફરી કરે છે, પરંતુ ઘણા લોકોને ખબર નથી હોતી કે તેઓ કેટલો સામાન લઈ જઈ શકે છે. ભારતીય રેલ્વેએ ફરી એકવાર સ્પષ્ટતા કરી છે કે ટ્રેનોમાં કેટલો સામાન મફતમાં લઈ જવાની મંજૂરી છે અને કેટલી મર્યાદાથી વધુ સામાન માટે મુસાફરોએ વધારાનો ચાર્જ ચૂકવવો પડશે.

ભારતમાં લાખો લોકો દરરોજ ટ્રેનમાં મુસાફરી કરે છે. કેટલાક લોકો નાની બેગ સાથે રાખે છે, જ્યારે કેટલાક પોતાના આખા ઘરને પેક કરે છે. પરંતુ શું તમે જાણો છો કે ટ્રેનોમાં સામાનની મર્યાદા પણ હોય છે? આ મર્યાદા ઓળંગવી તમને મોંઘી પડી શકે છે. તાજેતરમાં, રેલ્વે મંત્રી અશ્વિની વૈષ્ણવે સંસદમાં રેલ્વેના સામાન નિયમો સ્પષ્ટ કર્યા, જેનાથી મુસાફરોને સાવધ રહેવાની પ્રેરણા મળી.

રેલ્વે મંત્રીએ જણાવ્યું હતું કે રેલ્વે પાસે પહેલાથી જ કોચના આધારે મહત્તમ અને મફત સામાન ભથ્થું નક્કી છે. આ નિયમો મુસાફરોની સલામતી, સુવિધા અને અવ્યવસ્થાને રોકવા માટે બનાવવામાં આવ્યા છે. આનો અર્થ એ છે કે “તમે ઇચ્છો તેટલું” ફોર્મ્યુલા હવે ટ્રેનોમાં લાગુ પડશે નહીં.

તમે કેટલો સામાન લઈ જઈ શકો છો?

રેલ્વેના નિયમો અનુસાર, એસી થ્રી-ટાયર અને ચેર કારમાં મુસાફરી કરતા મુસાફરો ચાર્જ વિના વધુમાં વધુ 40 કિલોગ્રામ સામાન લઈ જઈ શકે છે. આ વર્ગો માટે આ મફત મર્યાદા છે. ફર્સ્ટ-ક્લાસ અને એસી ટુ-ટાયર મુસાફરોને 50 કિલોગ્રામ સુધીનો સામાન મફતમાં લઈ જવાની મંજૂરી છે, જ્યારે મહત્તમ 100 કિલોગ્રામ ફી માટે લઈ જઈ શકાય છે. એસી ફર્સ્ટ ક્લાસમાં તમે મુસાફરી કરો છો તો તમને વધુ રાહત મળે છે. આ મુસાફરો 70 કિલોગ્રામ સુધીનો સામાન મફતમાં લઈ જઈ શકે છે અને જો જરૂર પડે તો ચાર્જ ચૂકવી 150 કિલોગ્રામ સુધીનો સામાન લઈ જઈ શકે છે. રેલ્વે નિર્ધારિત મર્યાદા કરતાં વધુ સામાન લઈ જતા કોચમાં ચઢવા બદલ દંડ લાદી શકે છે.

સામાનના કદના નિયમો

માત્ર વજન જ નહીં, સામાનના કદ અંગેના નિયમો પણ કડક છે. રેલવે અનુસાર, સુટકેસ અથવા બોક્સના બાહ્ય પરિમાણો 100 સેમી લંબાઈ, 60 સેમી પહોળાઈ અને 25 સેમી ઊંચાઈથી વધુ ન હોવા જોઈએ. પેસેન્જર ડબ્બામાં આનાથી મોટો સામાન રાખવાની મંજૂરી નથી. આવા સામાનને બ્રેક વાન (SLR) અથવા પાર્સલ વાનમાં બુક કરાવવો આવશ્યક છે. રેલવે મંત્રીએ એ પણ સ્પષ્ટતા કરી હતી કે વ્યક્તિગત મુસાફરીની આડમાં કોચમાં કોમર્શિયલ સામાન લઈ જવાની પરવાનગી નથી. આમ કરવાથી કાર્યવાહી થઈ શકે છે.

1...369370371...5,120 Page 370 of 5,120

Chitralekha Gujarati – 29 December, 2025

બોલીવુડ અભિનેત્રી શિલ્પા શેટ્ટીના મુંબઈ સ્થિત નિવાસસ્થાન ઈન્કમટેક્સની રેડ પડી

હિજાબ વિવાદ વચ્ચે CM નીતિશ કુમારની સુરક્ષા વધારી દેવામાં આવી

નોકરીયાત લોકો માટે એક મોટી રાહતભરી જાહેરાત કરવામાં આવી

ભારત અને ઓમાન વચ્ચે મુક્ત વેપાર સમજૂતી

પૂર્વોત્તરને અલગ કરવાની પોકળ ધમકી આપનાર હસનત અબદુલ્લા છે કોણ?

GBUના વિદ્યાર્થીઓએ ગર્ભાશયમાં ગર્ભ ટકાવી રાખનારી mRNA ટેકનોલોજી વિકસાવી

ગામની વસતિ 1,500, પણ ત્રણ મહિનામાં 27,397 બાળકોના જન્મ, જાણો…

લોકસભામાં ભારે હંગામા વચ્ચે વિકસિત ભારત ‘જી રામ જી’ બિલ પાસ

ફ્લાઈટની જેમ ટ્રેનમા પણ વધારે સામાન માટે ચૂકવવો પડશે ચાર્જ

For Advertizing

Tech Support

FOLLOW US

.tdi_67{color:#ffffff}.tdi_67:hover{color:#ffffff;cursor:auto;-webkit-text-fill-color:unset;background:transparent;transition:none}Tech Support

FOLLOW US

Tech Support