Home Blog Page 34

રેશન સ્કીમના આધુનિકીકરણ માટે મંજૂર થયું રૂ. 25,530 કરોડનું બજેટ

દેશના ગરીબ અને મધ્યમ વર્ગના પરિવારોને દર મહિને મળતા સરકારી અનાજ વિતરણને લઈને કેન્દ્ર સરકારે એક અત્યંત મહત્વનો અને ઐતિહાસિક નિર્ણય લીધો છે. પ્રધાનમંત્રી ગરીબ કલ્યાણ યોજના હેઠળ સરકાર દ્વારા દર મહિને દેશના આશરે 80 કરોડ જરૂરિયાતમંદ લોકોને મફત રેશન આપવામાં આવે છે. હવે આ યોજનાને વધુ વ્યવસ્થિત, સુરક્ષિત અને કોઈ પણ પ્રકારની ગેરરીતિ વગર ચલાવવા માટે કેન્દ્રીય કેબિનેટે ‘SARTHAK PDS’ યોજનાને ચાલુ રાખવાની મંજૂરી આપી દીધી છે. આ અંતર્ગત રેશનિંગ વ્યવસ્થામાં 3 મોટા અને ક્રાંતિકારી સુધારા અમલમાં મૂકવામાં આવ્યા છે, જે રેશનની ચોરી અટકાવવાથી લઈને ગરીબો સુધી સમયસર અનાજ પહોંચાડવામાં મોટી ભૂમિકા ભજવશે. કેન્દ્રીય મંત્રી અશ્વિની વૈષ્ણવે કેબિનેટના નિર્ણયો અંગે મીડિયાને માહિતી આપતા જણાવ્યું હતું કે, આ યોજનાનો મુખ્ય હેતુ દેશની પબ્લિક ડિસ્ટ્રિબ્યુશન સિસ્ટમ (PDS) એટલે કે રેશન વ્યવસ્થાને વધુ આધુનિક, હાઈટેક અને પારદર્શક બનાવવાનો છે. આ માટે કેન્દ્ર સરકાર દ્વારા રૂ. 25,530 કરોડના તોતિંગ કેન્દ્રીય ભંડોળને (સેન્ટ્રલ એલોકેશન) મંજૂરી આપવામાં આવી છે.

રેશનિંગ વ્યવસ્થાને બદલી નાખશે આ 3 મોટા સુધારા:

1. રાજ્યોને અનાજ પરિવહન (ટ્રાન્સપોર્ટેશન) માં આર્થિક મદદ

કેન્દ્રીય મંત્રીએ જણાવ્યું કે કેબિનેટના પ્રથમ મોટા નિર્ણય હેઠળ હવે રાજ્યોની સરકારી એજન્સીઓને આર્થિક સહાય પૂરી પાડવામાં આવશે. આ અંતર્ગત અનાજને રાજ્યની અંદર મોટા સરકારી ગોદામોથી લઈને છેવાડાના ગામડાઓમાં આવેલી રેશનની દુકાનો સુધી પહોંચાડવા માટે થતો પરિવહન ખર્ચ કેન્દ્ર સરકાર ભોગવશે. ટ્રાન્સપોર્ટ કોસ્ટ ઓછી થવાને કારણે રાજ્યો પરનું આર્થિક ભારણ ઘટશે અને અંતરિયાળ તેમજ દુર્ગમ વિસ્તારોમાં વસતા ગરીબો સુધી સમયસર અનાજનો જથ્થો પહોંચાડી શકાશે.

 

2. ફેર પ્રાઇસ શોપ (રેશનની દુકાનો) ને સપોર્ટ

લાંબા સમયથી દેશભરના રેશન ડીલરો અને દુકાનદારો દ્વારા આર્થિક મદદ અને કમિશન વધારવાની માંગ કરવામાં આવી રહી હતી, જે અત્યાર સુધી ખૂબ જ ઓછી હતી. હવે સરકાર રેશનની દુકાનોને મજબૂત કરવા માટે સીધો સપોર્ટ આપશે. આ સુધારા હેઠળ રેશન ડીલરોને આધુનિક ડિજિટલ ઉપકરણો, અનાજ સાચવવા માટે બહેતર સ્ટોરેજ સુવિધા અને દુકાનના સંચાલન માટે નાણાકીય સહાય આપવામાં આવશે. આ પગલાથી રેશન દુકાનદારોની કાર્યશૈલી સુધરશે અને અનાજ વિતરણ દરમિયાન થતી ગરબડો પર લગામ કસાશે.

3. રેશનિંગ સિસ્ટમનું સંપૂર્ણ આધુનિકીકરણ (Modernization)

કેબિનેટ દ્વારા મંજૂર કરાયેલો ત્રીજો અને સૌથી મહત્વનો સુધારો રેશનિંગ વ્યવસ્થાને ટેકનોલોજી આધારિત બનાવવાનો છે. સરકાર આખી સિસ્ટમનું ડિજિટલાઈઝેશન કરવા જઈ રહી છે. જેમાં અનાજના જથ્થાનું ઓટોમેશન, ડિજિટલ ટ્રેકિંગ, ઓનલાઈન લાઈવ મોનિટરિંગ, સ્માર્ટ ડિવાઈસ અને ટ્રાન્સપેરન્સી ટૂલ્સનો ઉપયોગ કરવામાં આવશે. ગોદામમાંથી અનાજ નીકળ્યાથી લઈને ગ્રાહકના હાથમાં પહોંચે ત્યાં સુધીની તમામ વિગતો ઓનલાઈન ટ્રેક થશે. આ ટેકનોલોજીના કારણે રેશનની ચોરી અને બ્લેક માર્કેટિંગ (કાળાબજારી) નાબૂદ થશે અને હકદાર ગરીબોને તેમનો હક સીધો જ મળશે.

‘વન નેશન-વન રેશન કાર્ડ’ બનશે વધુ અસરકારક

કેન્દ્ર સરકારનો અંતિમ ઉદ્દેશ્ય દેશમાં લાગુ કરાયેલી ‘વન નેશન-વન રેશન卡ર્ડ’ (One Nation-One Ration Card) વ્યવસ્થાને વધુ સીમલેસ અને મજબૂત બનાવવાનો છે. આ નવી ટેકનોલોજી અને સુધારાઓ લાગુ થવાથી દેશના કોઈ પણ ખૂણે રહેતો શ્રમિક કે નાગરિક પોતાના હકનું અનાજ અત્યંત પારદર્શક રીતે મેળવી શકશે. સરકારના આ ડિજિટલ પ્રહારથી રેશનિંગ માફિયાઓ પર સંપૂર્ણપણે રોક લાગી જશે.

From Graphic Design to Acting: Mehul Buch’s 40-Year Journey

 

આસારામની આજીવનની સજા યથાવત્: સરન્ડર કરવા આદેશ

અમદાવાદઃ સગીર સાથે દુષ્કર્મ કેસમાં આસારામ બાપુને મોટો આંચકો લાગ્યો છે. રાજસ્થાન હાઇકોર્ટે બુધવારે તેમની આજીવન કારાવાસની સજા યથાવત્ રાખી છે. એ સાથે જ કોર્ટે 2018માં નીચલી કોર્ટે આપેલા દોષિત ઠેરવવાના અને સજાના ચુકાદા સામે દાખલ કરાયેલી તેમની અપીલ ફગાવી દીધી છે. જોકે હાઇકોર્ટે તેમને સામૂહિક બળાત્કાર અને આપરાધિક કાવતરાના આરોપોમાંથી રાહત આપતાં બરી કર્યા છે. કોર્ટે આસારામને આત્મસમર્પણ કરવાનો આદેશ પણ આપ્યો છે. હાલમાં તેઓ તબીબી કારણોસર વચગાળાના જામીન પર બહાર છે.

આ ચુકાદો જસ્ટિસ અરુણકુમાર મોંગા અને જસ્ટિસ યોગેન્દ્રકુમાર પુરોહિતની ડિવિઝન બેન્ચે આસારામ તેમ જ તેમના સહઆરોપી શરતચંદ્ર અને શિલ્પી દ્વારા દાખલ અપીલો પર સંભળાવ્યો હતો. આસારામની આજીવન કેદની સજા રદ કરવાની અરજી ફગાવતાં બેન્ચે માન્યું હતું કે ભારતીય દંડ સંહિતા હેઠળ બળાત્કાર, પોક્સો અધિનિયમ હેઠળ યૌન શોષણ અને કિશોર ન્યાય અધિનિયમ હેઠળના ગુનાઓ સાબિત થયા છે. જોકે કોર્ટે કહ્યું હતું કે સામૂહિક બળાત્કાર અને આપરાધિક કાવતરા સંબંધિત આરોપોને સાબિત કરવા માટે પૂરતા પુરાવા ઉપલબ્ધ નથી. બીજી તરફ, હાઇકોર્ટે શરતચંદ્ર અને શિલ્પીને તમામ આરોપોમાંથી નિર્દોષ જાહેર કર્યા છે. અગાઉ નીચલી કોર્ટે બંનેને 20 વર્ષની આકરી કેદની સજા ફટકારી હતી.

આ મામલો વર્ષ 2013નો છે, જ્યારે જોધપુર સ્થિત આશ્રમમાં એક સગીર યુવતી સાથે યૌન શોષણ કરવાનો આરોપ આસારામ પર લાગ્યો હતો. તપાસ બાદ પોલીસે ચાર્જશીટ દાખલ કરી હતી અને એપ્રિલ, 2018માં સ્પેશિયલ પોક્સો કોર્ટે આસારામને દોષિત ઠેરવી તેમને આજીવન કારાવાસની સજા સંભળાવી હતી. આ અપીલો પર દલીલો આ વર્ષે 20 એપ્રિલે પૂર્ણ થઈ હતી. વરિષ્ઠ વકીલ દેવદત્ત કામત અને અન્ય વકીલો આસારામ તથા તેમના સહયોગીઓ તરફથી હાજર રહ્યા હતા.આ ચુકાદા બાદ પી.સી. સોલંકીએ જણાવ્યું કે હાઇકોર્ટે આસારામની સજા પર કોઈ સ્ટે આપ્યો નથી અને તેમની આજીવન કારાવાસની સજા યથાવત્ છે. તેમણે વધુમાં કહ્યું કે પીડિતાની સલાહ બાદ સહઆરોપીઓને નિર્દોષ જાહેર કરવાના નિર્ણય સામે તેઓ સુપ્રીમ કોર્ટમાં અપીલ કરશે.

TDPનું એલાનઃ સામાન્ય ચૂંટણીમાં મહિલાઓને મળશે 33 ટકા અનામત

અમરાવતી: તેલગુ દેશમ પાર્ટી (TDP) એ પોતાની સૌથી મોટી બેઠક ‘મહાનાડુ’માં ઐતિહાસિક જાહેરાત કરતાં જણાવ્યું હતું કે 2029ની સામાન્ય ચૂંટણીમાં મહિલાઓને 33 ટકા ટિકિટ આપવામાં આવશે. TDPના કાર્યકારી અધ્યક્ષ અને મંત્રી નારા લોકેશે પાર્ટીમાં મહિલાઓને 33 ટકા આરક્ષણ આપવાનો પ્રસ્તાવ રજૂ કર્યો હતો.

તેમણે કહ્યું હતું કે TDP મહિલાઓની વિશાળ રાજકીય ભાગીદારી સાથે નવા રાજકીય યુગની શરૂઆતનો સંકેત આપી રહી છે. દેશના રાજકારણમાં પોતાની જાતની પહેલી અને ઐતિહાસિક જાહેરાત કરતાં તેમણે ‘મહાનાડુ 2026’ના પ્રથમ દિવસે 2029ની સામાન્ય ચૂંટણી માટે મહિલાઓને 33 ટકા પ્રતિનિધિત્વ આપવાનો પ્રસ્તાવ મૂક્યો હતો.

“સ્ત્રી શક્તિ” રહ્યો મહાનાડુનો વિષય

આ વર્ષે મહાનાડૂનો વિષય “સ્ત્રી શક્તિ” રાખવામાં આવ્યો હતો, તેથી આ જાહેરાતને ભારતીય રાજકારણમાં મહિલાઓના નેતૃત્વ અને લિંગ સમાનતાની દિશામાં એક મોટી રાજકીય અને વૈચારિક પ્રતિબદ્ધતા તરીકે જોવામાં આવી રહી છે.

મહિલા આરક્ષણ બિલ વચ્ચે TDPનો મોટો દાવ

આ પ્રસ્તાવ એવા સમયે આવ્યો છે જ્યારે સંસદમાં મહિલા આરક્ષણ બિલ હજુ પણ રાજકીય અડચણો અને વિરોધનો સામનો કરી રહ્યું છે. TDPના આ પગલાને રાષ્ટ્રીય સ્તરે સહમતીની રાહ જોવાને બદલે પોતે ઉદાહરણ પૂરું પાડીને નેતૃત્વ કરવાની કોશિશ તરીકે જોવામાં આવી રહ્યું છે. પાર્ટીએ તાજેતરમાં પોતાની સંગઠનાત્મક રચનામાં પણ મહિલાઓનું પ્રતિનિધિત્વ વધાર્યું છે. તેના ભાગરૂપે સાંસદ બાયરેડ્ડી શબરીને પાર્ટીની પ્રથમ મહિલા રાષ્ટ્રીય મહાસચિવ તરીકે નિયુક્ત કરવામાં આવી છે. આ પગલાને મહિલાઓના નેતૃત્વને વધુ મજબૂત બનાવવાની પાર્ટીની વ્યાપક પહેલનો ભાગ માનવામાં આવી રહ્યો છે.

PM મોદીની કાળઝાળ ગરમીને લઈને દેશવાસીઓને ભાવુક અપીલ

ભારતના મોટાભાગના રાજ્યોમાં અત્યારે કાળઝાળ ઉનાળો પોતાનું રૌદ્ર સ્વરૂપ બતાવી રહ્યો છે. આકાશમાંથી વરસી રહેલી અગનઝાળ અને રેકોર્ડબ્રેક તાપમાનના કારણે સામાન્ય જનજીવન અસ્તવ્યસ્ત થઈ ગયું છે. લોકો ગરમી અને અસહ્ય બફારાથી ત્રાહિમામ પોકારી ઉઠ્યા છે. દેશમાં સર્જાયેલી આ ગંભીર પરિસ્થિતિ વચ્ચે વડાપ્રધાન નરેન્દ્ર મોદીએ દેશવાસીઓને સંબોધીને એક ખૂબ જ સંવેદનશીલ અને જરૂરી અપીલ કરી છે. પીએમ મોદીએ લોકોને આ કપરી ઋતુમાં સતર્ક, સાવધ અને એકબીજા પ્રત્યે મદદરૂપ બનવાની નમ્ર વિનંતી કરી છે. વડાપ્રધાને નાગરિકોને પોતાની તબિયતનું ખાસ ધ્યાન રાખવા જણાવ્યું છે. તેમણે નાગરિકોને સલાહ આપી છે કે આ ઋતુમાં શરીરને પૂરેપૂરું હાઈડ્રેટેડ રાખવું ખૂબ જ જરૂરી છે. જ્યારે પણ કોઈ અનિવાર્ય કામસર ઘરની બહાર નીકળવાનું થાય, ત્યારે પોતાની સાથે પાણીની બોટલ અચૂક સાથે રાખવી. આ ઉપરાંત, બપોરના સમયે જ્યારે સૂર્યનો તાપ સૌથી પ્રચંડ હોય છે, ત્યારે બિનજરૂરી રીતે બહાર નીકળવાનું ટાળવું જોઈએ.

વટેમાર્ગુઓ માટે પાણીની વ્યવસ્થા કરનારાઓની પીએમએ પ્રશંસા કરી

સમાજમાં પરસ્પર સહયોગની ભાવના પર ભાર મૂકતા વડાપ્રધાને જણાવ્યું હતું કે, જો શક્ય હોય તો તમારી આસપાસના કોઈ પણ તરસ્યા વ્યક્તિને એક ગ્લાસ ઠંડું પાણી અચૂક પીવડાવો. પીએમ મોદીએ એવા સેવાભાવી લોકોની દિલથી પ્રશંસા કરી હતી, જેઓ આ કાળઝાળ ગરમીમાં રસ્તેથી પસાર થતા રાહદારીઓ અને શ્રમિકોને રાહત આપવા માટે પોતાના ઘર કે દુકાનની બહાર ઠંડા પાણીના માટલા (પરબ) રાખે છે. તેમણે કહ્યું કે આવી નાની સેવા પણ આ ઋતુમાં કોઈનો જીવ બચાવી શકે છે.

પરિવારના વડીલો અને સ્નેહીજનોની વિશેષ કાળજી લો

વૃદ્ધાવસ્થામાં ઉનાળાની આકરી ગરમી સહન કરવી શરીર માટે ખૂબ જ કષ્ટદાયક હોય છે અને આ સિઝનમાં વડીલોને સ્વાસ્થ્ય સંબંધી તકલીફો થવાનું જોખમ સૌથી વધુ રહે છે. આ બાબતને ધ્યાનમાં રાખીને વડાપ્રધાને ખાસ અપીલ કરી છે કે, દરેક નાગરિક પોતાના માતા-પિતા, દાદા-દાદી, નાના-નાની કે અન્ય મોટી ઉંમરના સ્નેહીજનોની તબિયતના સતત સમાચાર લેતા રહે. વડીલોને નિયમિત અંતરે પૂરતા પ્રમાણમાં પાણી કે પ્રવાહી પીવાની સલાહ આપો, તેમને બપોરના તીવ્ર તડકામાં બહાર બિલકુલ ન જવા દો અને ઘરમાં જ વધુમાં વધુ આરામ મળે તેવી વ્યવસ્થા કરો.

અબોલ પશુ-પક્ષીઓ માટે કરો આ એક નાનું પુણ્યનું કામ

માત્ર મનુષ્યો જ નહીં, પરંતુ આ કાળઝાળ ગરમીમાં અબોલ પશુ-પક્ષીઓની હાલત પણ દયનીય બની જતી હોય છે. પીએમ મોદીએ આ અબોલ જીવોની પીડા વહેંચતા દેશના તમામ પરિવારોને એક નાનકડી પણ અત્યંત પ્રભાવશાળી અપીલ કરી છે. તેમણે કહ્યું કે, દરેક વ્યક્તિએ પોતાના ઘરની અગાશી, બાલકની, આંગણું, દુકાન કે ઓફિસની બહાર પાણીથી ભરેલું એક નાનું વાસણ (કૂંડું) અચૂક રાખવું જોઈએ, જેથી આ આકરા ઉનાળામાં તરસથી વ્યાકુળ પક્ષીઓ અને પ્રાણીઓને સરળતાથી પીવાનું પાણી મળી રહે. વડાપ્રધાને અંતમાં ભારપૂર્વક જણાવ્યું હતું કે, આ ભીષણ ગરમીના સમયગાળામાં આપણે સૌએ પરસ્પર સંવેદનશીલતા અને કરુણા દાખવીને એકબીજાની અને આપણી આસપાસના જીવજંતુઓની રક્ષા કરવી જોઈએ.

શાંતિનું પુણ્યધામ ‘શેરીસા તીર્થ’

નર્મદા કેનાલ(Narmada Canal)ના કિનારે શાંતિનો અહેસાસ કરાવતું અને અમદાવાદીઓમાં ભારે આસ્થા ધરાવતું એક અદ્ભુત સ્થાનક એટલે ગાંધીનગર (Gandhinagar) જિલ્લાના કલોલ તાલુકાનું ઐતિહાસિક શેરીસા (Sherisa) ગામ. અદાણી શાંતિગ્રામ જાસપુર પાસે અને ગોતા તથા વડસરથી એકદમ નજીક આવેલું આ ગામ જૈન ધર્મનું એક પરમ પવિત્ર અને સુપ્રસિદ્ધ તીર્થધામ (Jain Tirth dham) છે. એક પ્રાચીન પદ્ય અનુસાર, ભગવાનના અભિષેક (નવણ) વખતે નગરની સાંકડી શેરીઓમાં પાણી ફેલાઈ જવાને કારણે આ સ્થાનકનું નામ ‘શેરીસા’ (Sherisa) પડ્યું હતું. સંવત 1389ના “વિવિધ તીર્થ કલ્પ” ગ્રંથ મુજબ, આચાર્ય દેવેન્દ્રસૂરિજીએ અહીં એક ટેકરામાંથી નીકળેલી શિલામાંથી સોપારકના અંધ શિલ્પી પાસે દિવ્ય મૂર્તિ ઘડાવી હતી. ત્યારબાદ ખાણમાંથી અન્ય 24 પ્રતિમાઓ મળી આવી. દેવેન્દ્રસૂરિજી અયોધ્યાથી લાવેલા ત્રણ અને ગૂર્જર નરેશ કુમારપાળે ભેટ આપેલી એક, એમ અન્ય ભવ્ય મૂર્તિઓ પણ અહીં પધરાવવામાં આવી, જેમાં મૂળનાયકની પ્રતિમા ‘લોડણ પાર્શ્વનાથ’ (Lodan Parshwanath) તરીકે જગપ્રસિદ્ધ થઈ.

16૬મી સદી પછી યુદ્ધ કે આફતોને કારણે મંદિર નષ્ટ થતાં શ્રાવકોએ મૂર્તિઓ ભંડારમાં સુરક્ષિત કરી દીધી હતી, જ્યારે સંવત 1420ના લેખવાળી અહીંની પદ્માવતી માતાની મૂર્તિ વિપ્લવ સમયે નરોડા લઈ જવાયેલી જે આજે પણ ત્યાં છે. વર્ષો પછી, સંવત 1955માં જૈન શ્રેષ્ઠીઓએ ખંડેરના કાટમાળમાંથી 4 ફીટ પહોળી શ્યામવર્ણની મૂર્તિ, સાડા છ ફીટ ઊંચા બે કાઉસગ્ગીયા અને અંબિકા દેવીની મનોહર મૂર્તિ શોધી કાઢી, જેને એક મકાન ખરીદીને ત્યાં પધરાવાઈ. અહીંથી મળેલી ફણાવાળી અન્ય એક વિશાળ પાર્શ્વનાથ ભગવાનની મૂર્તિને લોકો વર્ષો સુધી ‘જોદ્ધા’ તરીકે પૂજતા અને બાધા રાખતા.  વિ.સં. 1984 (ઇ.સ. 1928)માં શેઠ સારાભાઈ ડાહ્યાભાઈએ આ તીર્થનો વહીવટ ‘શેઠ આણંદજી કલ્યાણજી પેઢી'(Seth Anandji Kalyanji Pedhi)ને સોંપ્યો. આજે આ નવનિર્મિત તીર્થમાં ધર્મશાળા (Dharamshala) અને ઉપાશ્રય જેવી તમામ આધુનિક સગવડો છે, જે ઉપધાન તપ, ઓળી આરાધના અને જ્ઞાન-ધ્યાનની શિબિરો માટે શાંતિનું અનુપમ પુણ્યધામ બની રહ્યું છે.

(પ્રજ્ઞેશ વ્યાસ)

કાળઝાળ ગરમીમાંથી મળશે મોટી રાહત! IMD ચોમાસા જેવું એલર્ટ

દેશના મોટાભાગના રાજ્યો અત્યારે સૂર્યદેવના પ્રકોપ અને અસહ્ય હીટવેવનો સામનો કરી રહ્યા છે. ઉત્તર પ્રદેશના બાંદા સહિતના વિસ્તારોમાં પારો રેકોર્ડ સ્તરે પહોંચી ગયો છે. આ કાળઝાળ ગરમી વચ્ચે ભારતીય હવામાન વિભાગે (IMD) એક રાહત આપનારા સમાચાર જાહેર કર્યા છે. હવામાન વિભાગના જણાવ્યા અનુસાર, દેશમાં એક નવું વેસ્ટર્ન ડિસ્ટર્બન્સ (Western Disturbance) સક્રિય થઈ રહ્યું છે, જેના કારણે હવામાનમાં અચાનક પલટો આવશે. આગામી 28 થી 30 May દરમિયાન દિલ્હી-એનસીઆર, ઉત્તર પ્રદેશ, પંજાબ, હરિયાણા અને ઉત્તરાખંડ સહિત ઉત્તર અને પૂર્વ ભારતના અનેક રાજ્યોમાં વાવાઝોડા અને વીજળીના કડાકા-ભડાકા સાથે ભારે વરસાદ થવાની સંભાવના છે. આનાથી તાપમાનનો પારો ગગડશે અને લોકોને ગરમીથી મોટી રાહત મળશે.

યુપીમાં વાવાઝોડાનો આતંક: 8 લોકોના કરુણ મોત, 40 ઘરો બળીને ખાખ

રાહતના આ સમાચાર વચ્ચે વિતેલા બે દિવસો દરમિયાન ઉત્તર પ્રદેશના કેટલાક જિલ્લાઓમાં ભારે વાવાઝોડા, ધૂળની ડમરીઓ અને અચાનક આવેલા વરસાદે ભારે તબાહી મચાવી છે. ખાસ કરીને લખીમપુર, ગોંડા અને સીતાપુર જિલ્લામાં જનજીવન અસ્તવ્યસ્ત થઈ ગયું છે. આ કુદરતી આફત અને તેને લીધે થયેલા જુદા જુદા અકસ્માતોમાં કુલ 8 લોકોએ પોતાના જીવ ગુમાવ્યા છે. તીવ્ર પવનના કારણે અનેક વિસ્તારોમાં મકાનોની દીવાલો ધરાશાયી થઈ ગઈ હતી અને ઘરોના પતરાં (ટીન-શેડ) હવામાં ઉડી ગયા હતા. લખીમપુરના કારીબડેરી ગામમાં વાવાઝોડા દરમિયાન લાગેલી ભયાનક આગના કારણે આશરે 40 ગરીબ પરિવારોના આશિયાના (ઘરો) બળીને રાખ થઈ ગયા હતા. આ અણધારી આફતથી ગ્રામીણ વિસ્તારોમાં અફરાતફરી મચી ગઈ હતી. અનેક જગ્યાએ વીજળીના થાંભલા અને વિશાળ વૃક્ષો ઉખડી જતાં સેંકડો ગામડાઓમાં અંધારપટ છવાઈ ગયો હતો.

રેલવે ટ્રેક પર ઝાડ પડતાં વાહનવ્યવહાર ખોરવાયો, ખેડૂતો ચિંતિત

યુપીના ગોંડામાં મનકાપુર-અયોધ્યા રેલવે માર્ગ પર મોટો અકસ્માત ટળ્યો હતો. અહીં ભારે તોફાનના કારણે રેલવે ટ્રેક પર મોટું વૃક્ષ પડી ગયું હતું, જેના લીધે રેલ વ્યવહાર સંપૂર્ણપણે ખોરવાઈ ગયો હતો. ઘણી ટ્રેનોના રૂટ ડાયવર્ટ કરવા પડ્યા હતા, જેના કારણે હજારો મુસાફરો મુશ્કેલીમાં મુકાયા હતા. બાદમાં તોફાન શાંત પડતાં રેલવે કર્મચારીઓએ યુદ્ધના ધોરણે ટ્રેક સાફ કરીને ટ્રેન વ્યવહાર પુનઃસ્થાપિત કર્યો હતો. આ આફતથી ખેડૂતોના ઉભા પાકને પણ વ્યાપક નુકસાન થયું છે.

રાજ્યમાં સર્જાયેલી આ ગંભીર સ્થિતિ અંગે મુખ્યમંત્રી યોગી આદિત્યનાથે ઊંડી સંવેદના વ્યક્ત કરી છે. તેમણે તાત્કાલિક અસરથી તમામ જિલ્લા અધિકારીઓને રાહત અને બચાવ કામગીરી તેજ કરવાના આદેશ આપ્યા છે. આ સાથે જ અસરગ્રસ્ત પીડિત પરિવારો અને નુકસાન વેઠનારા ખેડૂતોને સરકાર તરફથી તમામ સંભવિત આર્થિક સહાય પૂરી પાડવાની ખાતરી આપી છે.

વેસ્ટર્ન ડિસ્ટર્બન્સની એન્ટ્રી: આ રાજ્યો માટે એલર્ટ જાહેર

હવામાન વિભાગના રિપોર્ટ અનુસાર, વાહનચાલકો અને નાગરિકોએ માત્ર એક દિવસ જ ગરમી સહન કરવી પડશે, ત્યારબાદ મુસળધાર વરસાદનો રાઉન્ડ શરૂ થશે. આ નવું વેસ્ટર્ન ડિસ્ટર્બન્સ બંગાળની ખાડીમાંથી પૂર્વ ભારતમાં પ્રવેશ કરીને ઉત્તર ભારત તરફ ઝડપથી આગળ વધી રહ્યું છે. આ સિવાય પંજાબ અને હરિયાણાની ઉપર સાયક્લોનિક સર્ક્યુલેશન (ચક્રવાતી પવનની સિસ્ટમ) સક્રિય થઈ રહ્યું છે, જેના કારણે 28 May ની સાંજથી જ વાતાવરણ પલટાશે અને ગાજવીજ સાથે વરસાદ શરૂ થશે.

આઈએમડીએ આગામી 30 May સુધી ઉત્તર પ્રદેશ, હિમાચલ પ્રદેશ, ઉત્તરાખંડ, જમ્મુ-કાશ્મીર, દિલ્હી, હરિયાણા, બિહાર, ઝારખંડ અને પશ્ચિમ બંગાળમાં ભારે વરસાદનું એલર્ટ આપ્યું છે. આ ઉપરાંત પૂર્વત્તર (North-Eastern) રાજ્યોમાં પણ સારો વરસાદ થઈ શકે છે. આ સમયગાળા દરમિયાન કેટલાક રાજ્યોમાં ભારે ધૂળની ડમરીઓ ઉડવાની અને કરા પડવાની (ઓલાવૃષ્ટિ) પણ પૂરેપૂરી શક્યતા છે. આ વરસાદી માહોલના કારણે હીટવેવ સંપૂર્ણપણે શાંત પડી જશે.

શું ખરેખર રાજીનામું આપશે CM સિદ્ધારમૈયા?

નવી દિલ્હીઃ કર્ણાટકમાં સત્તા પરિવર્તનની અટકળો તેજ બની ગઈ છે. જોકે અત્યાર સુધી કોઈ સત્તાવાર જાહેરાત કરવામાં આવી નથી અને અફવાઓથી દૂર રહેવાની સલાહ આપવામાં આવી રહી છે, છતાં કોંગ્રેસના આંતરિક વર્તુળોમાં ચર્ચા ગરમ છે કે મુખ્ય મંત્રી સિદ્ધારમૈયા (Siddaramaiah) રાજીનામું આપે એવી શક્યતા છે. ગુરુવારે સિદ્ધારમૈયા CM પદ છોડે તેવી શક્યતા છે.

તાજેતરમાં દિલ્હીમાં કોંગ્રેસ હાઈકમાન્ડે ડીકે શિવકુમાર (DK Shivakumar) અને સિદ્ધારમૈયા સાથે મહત્વપૂર્ણ બેઠક કરી હતી. સત્તાવાર રીતે કહેવામાં આવ્યું કે બેઠકમાં આવનારા મોરચા, રાજ્યસભા ચૂંટણીની વ્યૂહરચના અને ઉમેદવારો અંગે ચર્ચા થઈ હતી, પરંતુ સૂત્રોના હવાલાથી એવી માહિતી સામે આવી છે કે બેઠકમાં સિદ્ધારમૈયાને મનાવવાનો પ્રયાસ કરવામાં આવ્યો હતો. તેમને સ્પષ્ટ સંકેત આપવામાં આવ્યો કે કોંગ્રેસ હાઈકમાન્ડ કર્ણાટકમાં સત્તા પરિવર્તન ઇચ્છે છે.કોંગ્રેસ હાઈકમાન્ડ 2029ની લોકસભા ચૂંટણીમાં સિદ્ધારમૈયાનો ઉપયોગ કરવા માગે છે. પાર્ટી માને છે કે તેમને રાષ્ટ્રીય રાજકારણમાં સક્રિય કરવામાં આવે અને કર્ણાટકમાંથી દિલ્હીમાં લાવવામાં આવે. સિદ્ધારમૈયાને મોટા OBC ચહેરા તરીકે જોવામાં આવે છે, તેથી કોંગ્રેસ તેમને રાષ્ટ્રીય સ્તરે મોટી ભૂમિકા આપવા માગે છે, એમ સૂત્રોએ જણાવ્યું હતું.

સિદ્ધારમૈયાને વિશ્વાસ અપાયો છે કે જો તેઓ દિલ્હીમાં આવવા તૈયાર થશે તો તેમનાં રાજકીય હિતોનું સંપૂર્ણ ધ્યાન રાખવામાં આવશે. દાવો તો એવો પણ કરવામાં આવી રહ્યો છે કે તેમને AICCમાં મોટું પદ આપવામાં આવી શકે છે. કોંગ્રેસ હાઈકમાન્ડ ઇચ્છે છે કે આ રાજકીય પરિવર્તન સંપૂર્ણ સન્માનજનક રીતે થાય અને કર્ણાટકમાં કોઈ બળવો ન ફાટી નીકળે. સિદ્ધારમૈયાને મનાવવા માટે તેમના પુત્ર જિતેન્દ્રને પણ કેબિનેટમાં સ્થાન આપવામાં આવી શકે છે. બીજી તરફ, એક રિપોર્ટમાં દાવો કરવામાં આવ્યો છે કે સિદ્ધારમૈયા રાજીનામું આપી શકે છે, પરંતુ આવશ્યક નથી કે ડીકે શિવકુમાર ને જ કર્ણાટકનો આગામી મુખ્ય મંત્રી બનાવવામાં આવે. કોંગ્રેસની અંદર એવી ચર્ચા પણ ચાલી રહી છે કે મલ્લિકાર્જુન ખડગેને પણ CM પદ માટે આગળ કરવામાં આવી શકે છે.

રણવીર સિંહ પહેલા આ સ્ટાર્સ પર પ્રતિબંધ મૂકાયો હતો, ધર્મેન્દ્ર સામે નહોતી થઈ કાર્યવાહી

રણવીર સિંહ અને ફેડરેશન ઓફ વેસ્ટર્ન ઇન્ડિયન સિને એમ્પ્લોયીઝ વચ્ચેનો વિવાદ ચાલુ છે. આ દરમિયાન ચંકી પાંડેએ નિર્દેશ કર્યો છે કે આવા જ કેસમાં ઘણા કલાકારો સામે નોટિસ જારી કરવામાં આવી છે.

Mumbai : Actor Ranveer Singh at the red carpet of ‘Umang 2023’ in Mumbai on Saturday, December 23, 2023. (Photo: IANS)

ફેડરેશન ઓફ વેસ્ટર્ન ઇન્ડિયન સિને એમ્પ્લોઇઝ (FWICE) એ સોમવારે રણવીર સિંહ વિરુદ્ધ અસહકાર નોટિસ જારી કરી છે. આનો અર્થ એ થયો કે FWICE એ તેના 400,000 થી વધુ સભ્યોને રણવીર સિંહ સાથે કામ ન કરવા કહ્યું છે. FWICE ના મુખ્ય સલાહકાર, અશોક પંડિતે જણાવ્યું હતું કે જો રણવીર સિંહ તેમની સમક્ષ હાજર થાય અને ફરહાન અખ્તરની ફિલ્મ “ડોન 3” માંથી અચાનક બહાર નીકળવાના વિવાદનો ઉકેલ લાવે તો જ નોટિસ પાછી ખેંચી લેવામાં આવશે.

આ કલાકારો સામે નોટિસ જારી

જોકે, રણવીર સિંહ પહેલો અભિનેતા નથી જેની સામે FWICE એ આટલી કડક કાર્યવાહી કરી છે.છેલ્લા 10 વર્ષોમાં FWICE એ અભિનેતા-ગાયક દિલજીત દોસાંઝ અને ગાયક મીકા સિંહ જેવી હસ્તીઓ સામે પણ અસહકાર નોટિસ જારી કરી છે.મોટાભાગના કિસ્સાઓમાં આના કારણો રાજકીય રહ્યા છે.સંગઠને 1986 માં પણ કડક કાર્યવાહી કરી હતી. તે સમયે, ફિલ્મ ઉદ્યોગે સિનેમા ટિકિટ અને શૂટિંગ સાધનો પર લાદવામાં આવેલા ભારે કરના વિરોધમાં સામૂહિક હડતાળ પાડી હતી.

સમગ્ર ફિલ્મ ઉદ્યોગમાં હડતાળની જાહેરાત કરવામાં આવી હતી

જ્યારે FWICE એ ફિલ્મ ઉદ્યોગમાં હડતાળની જાહેરાત કરી હતી, ત્યારે પહલાજ નિહલાની “આગ હી આગ” (૧૯૮૭) નું નિર્માણ કરી રહ્યા હતા. ફિલ્મના સ્ટાર કાસ્ટ, જેમાં ધર્મેન્દ્ર, શત્રુઘ્ન સિંહા અને ચંકી પાંડેનો સમાવેશ થાય છે, તેમણે બેંગલુરુ અને ઊટીમાં શૂટિંગ ચાલુ રાખ્યું હતું. ચંકી પાંડેએ તાજેતરમાં ઇકોનોમિક ટાઇમ્સ સાથેની એક મુલાકાતમાં આ વાતનો ખુલાસો કર્યો હતો.

આ કલાકારો સામે કોઈ કાર્યવાહી કરવામાં આવી નથી

ચંકી પાંડેએ સમજાવ્યું, “હડતાળ છતાં શૂટિંગ ચાલુ રાખવા બદલ મારી અને આ ફિલ્મ સાથે સંકળાયેલા દરેક વ્યક્તિ સામે કાર્યવાહી કરવામાં આવી હતી. ધર્મેન્દ્ર અને શત્રુઘ્ન સિંહા પણ આ ફિલ્મનો ભાગ હતા, પરંતુ તેઓ એટલા મોટા સ્ટાર હતા કે એકસાથે 30-40 ફિલ્મોમાં કામ કરી રહ્યા હતા કે તેમના પર પ્રતિબંધ મૂકવો શક્ય નહોતો. હું તે સમયે નવો હતો. મારી ફિલ્મ હજુ રિલીઝ પણ થઈ ન હતી, તેથી મારા પર લગભગ એક અઠવાડિયા માટે પ્રતિબંધ મૂકવામાં આવ્યો હતો. પછીથી, મેં માફી માંગી અને એક અઠવાડિયામાં પ્રતિબંધ હટાવી લેવામાં આવ્યો.”

વિવાદ શું છે?

FWICEનો દાવો છે કે વારંવાર યાદ અપાવવા છતાં, રણવીર તેમની સમક્ષ હાજર થયો ન હતો. ફરહાનના એક્સેલ એન્ટરટેઈનમેન્ટ દ્વારા દાખલ કરવામાં આવેલી ફરિયાદનો તેણે કોઈ જવાબ આપ્યો ન હતો. શૂટિંગ શરૂ થાય તેના થોડા દિવસો પહેલા જ રણવીરે પ્રોજેક્ટ છોડી દીધો હતો.

હિન્દુઓ વિરુદ્ધ નિવેદન મુદ્દે મમતા બેનરજી પર નોંધાઈ FIR

કોલકાતાઃ પશ્ચિમ બંગાળમાં સત્તા પરિવર્તન બાદ TMC નેતાઓ સામે કાર્યવાહી ચાલુ છે. હવે એ દરમિયાન રાજ્યનાં ભૂતપૂર્વ મુખ્ય મંત્રી અને TMCપ્રમુખ મમતા બેનરજી (Mamata Banerjee) સામે સિલિગુડીમાં ફોજદારી ધમકી અને ધાર્મિક ભાવનાઓને ઠેસ પહોંચાડવાના આરોપ હેઠળ FIR નોંધવામાં આવી છે. આ મામલો આ વર્ષની શરૂઆતમાં ઉત્તર બંગાળમાં વિધાનસભા ચૂંટણીપ્રચાર દરમિયાન તેમના દ્વારા કરાયેલાં નિવેદનો સાથે જોડાયેલો છે.વકીલ રિન્કી ચેટરજી સિંહેએ કહ્યું હતું કે જ્યારે મમતા બેનર્જી મુખ્ય મંત્રી હતાં ત્યારે તેમણે હિજાબ પહેરીને રેડ રોડ પર ઈદની નમાજ અદા કરી હતી અને બાદમાં હિંદુ ધર્મને “ગંદો ધર્મ” ગણાવ્યો હતો. જ્યારે મેં સાયબર શાખામાં FIR નોંધાવવાનો પ્રયાસ કર્યો ત્યારે ફરિયાદ સ્વીકારવામાં આવી નહોતી. મને શારીરિક અને માનસિક હેરાનગતિનો સામનો કરવો પડ્યો અને ઘણા દિવસો સુધી મારી ફરિયાદ નોંધવામાં આવી નહોતી.

તેમણે વધુમાં કહ્યું હતું કે બાદમાં 2026ની વિધાનસભા ચૂંટણી પહેલાં ધર્મતલામાં હિંદુ મતદાતાઓને ધમકાવતાં નિવેદનો આપવામાં આવ્યાં હતાં. એક હિંદુ અને કાર્યકર તરીકે મેં વ્યક્તિગત રીતે પોતાને જોખમમાં અનુભવ્યો અને હુમલાનો મને ડર લાગ્યો હતો. મેં ઉશ્કેરણી, હિંસા ભડકાવવી અને ધર્મનું અપમાન કરવા સંબંધિત BNSની અનેક કલમો હેઠળ ફરિયાદ નોંધાવી હતી. શરૂઆતમાં પોલીસે કાર્યવાહી કરવા ઈનકાર કર્યો હતો, પરંતુ બાદમાં મારી ફરિયાદ સ્વીકારી અને સંબંધિત કલમો લાગુ કરવામાં આવી હતી. મારું માનવું છે કે અભિવ્યક્તિ સ્વતંત્રતાની પણ મર્યાદાઓ હોય છે. સાયબર ક્રાઇમ યુનિટે સ્થાનિક વકીલ રિંકી ચેટર્જી સિંહ દ્વારા કરવામાં આવેલી ફરિયાદને આધારે 15 મેએ FIR નોંધાવી હતી. આ ફરિયાદમાં આરોપ મૂકવામાં આવ્યો છે કે TMC સુપ્રીમોએ સનાતન ધર્મને “ગંદો ધર્મ” કહીને હિંદુઓની ધાર્મિક લાગણીઓને ઠેસ પહોંચાડી છે.

કઈ કલમો હેઠળ કેસ નોંધાયો?

મમતા બેનર્જી સામે ભારતીય ન્યાય સંહિતા (BNS)ની કલમ 351(1), 352 અને 353(2) હેઠળ FIR નોંધવામાં આવી છે.

  • કલમ 351(1) ફોજદારી ધમકી સંબંધિત ગુનાને લગતી છે.
  • કલમ 352 શાંતિ ભંગ કરવાનો ઈરાદો રાખીને જાણપૂર્વક અપમાન કરવા સંબંધિત છે.
  • કલમ 353(2) એવો કાયદાકીય જોગવાઈ છે, જે વિવિધ ધાર્મિક, જાતીય અથવા ભાષાકીય જૂથો વચ્ચે ઘૃણા, દુશ્મનાવટ અથવા દ્વેષ ફેલાવવાના હેતુથી અફવા, ખોટી માહિતી અથવા ભયજનક સમાચાર ફેલાવવા બદલ સજા નક્કી કરે છે.
1...333435...5,065Page 34 of 5,065