Home Blog Page 24

વિચારની પાંખે માનવીની સ્પેસ સફર

સન 2001માં એક અમેરિકન યુવાનને વિચાર આવ્યો કે મંગળ ગ્રહ (Mars) પર લીલાછમ છોડ અથવા ગ્રીનહાઉસ (Greenhouse) ઉગાડી શકીએ તો? આ વિચારને અમલમાં મૂકવા એ યુવાન રશિયા (Russia) ગયો, રિયુઝેબલ રૉકેટ (Reusable Rocket) ખરીદવા. પરંતુ કિંમત સાંભળીને તે ઠંડો પડી ગયો. નિરાશ થવાને બદલે, વળતા પ્રવાસ દરમિયાન વિમાન (Plane)માં તેણે લેપટોપ (Laptop) ખોલીને ગણતરી શરૂ કરી કે રૉકેટ બનાવવા માટેનું રૉ-મટીરિયલ (Raw Material) કેટલામાં પડે. તેને સમજાયું કે જો જાતે રૉકેટ બનાવવામાં આવે તો સ્પેસ ટ્રાવેલ (Space Travel)નો ખર્ચ 90 ટકા જેટલો ઓછો કરી શકાય.

એ યુવાન એટલે એલન મસ્ક (Elon Musk). એ રાત્રે વિમાનમાં જન્મેલો એક વિચાર એટલે આજે અબજો ડૉલરની કંપની સ્પેસએક્સ (SpaceX). જે સમયે દુનિયા સ્પેસ ટ્રાવેલ (Space Travel)ને સરકારનું કામ માનતી હતી, ત્યારે યુવા એલનના મગજમાં આવેલા રિયુઝેબલ રૉકેટ (Reusable Rocket)ના વિચારએ આખી દુનિયાનો અવકાશ-ઇતિહાસ બદલી નાખ્યો.

હજારો વર્ષો પહેલાં પથ્થરની ગુફાઓમાં પશુ જેવું જીવન જીવતો માનવી આજે ચંદ્ર (Moon) અને મંગળ (Mars) પર નિવાસસ્થાન તથા ટૂર-ટ્રાવેલ (Tour & Travel)ના આયોજન કરી રહ્યો છે. આજે માનવની વિકાસકૂચ સુવિધાઓનાં સાધનોની હારમાળા સર્જી રહી છે. પરંતુ આ વિકાસ, આ પ્રગતિ શેને આભારી છે?

જો કોઈ કહે કે વિજ્ઞાન (Science)ની હરણફાળ, તો એક રીતે એ સાચો જવાબ છે. પરંતુ વધુ સચોટ જવાબ છે – એક વિચાર (Idea). મગજમાં આવેલો એક આઈડિયા (Idea). પ્રાચીન કાળથી આજ સુધી માનવપ્રગતિનો ઇતિહાસ એ મનુષ્યના મસ્તિષ્કમાં જન્મેલા વિચારોની ગાથા છે, તેમજ એ વિચારોના સર્જનાત્મક અનુસરણ અને પરિણામોની પ્રાપ્તિનો ઇતિહાસ છે.

ડૉ. એ.પી.જે. અબ્દુલ કલામ (Dr. A.P.J. Abdul Kalam) પોતાની આત્મકથા (Autobiography)માં જણાવે છે કે, “બાળપણથી જ મને આકાશનાં રહસ્યો અને પક્ષીઓના ઉડ્ડયન (Flight) પ્રત્યે ખૂબ આકર્ષણ હતું. ભલે હું સીધોસાદો ગામડાનો છોકરો હતો, પરંતુ મને શ્રદ્ધા હતી કે એક દિવસ હું પણ આકાશમાં ઊડીશ. અને ખરેખર, રામેશ્વરમ (Rameswaram)માંથી આકાશમાં વિચરનાર હું પ્રથમ છોકરો બન્યો.”

એક સામાન્ય સાગરખેડુના બાળકને આકાશની ઊંચાઈએ પહોંચાડવા માટેનું મુખ્ય પરિબળ હતું – વિચાર (Thought). એટલે જ કહેવાયું છે કે જ્યારે વિચારનું વાવેતર થાય છે, ત્યારે તે ક્રિયા (Action)માં પરિણમે છે.

દક્ષિણ આફ્રિકા (South Africa)માં પ્રેક્ટિસ કરતા મોહનદાસ કરમચંદ ગાંધી (Mohandas Karamchand Gandhi) એક વખત ડરબન (Durban)થી પ્રિટોરિયા (Pretoria) જવા માટે રેલવે (Railway)ની ફર્સ્ટ ક્લાસની ટિકિટ લઈને પોતાની સીટ પર ગોઠવાયા હતા. રાત્રે નવ વાગ્યે મારિત્સબર્ગ સ્ટેશન (Maritzburg Station) પર એક ગોરો ટિકિટ ચેકર તેમના કમ્પાર્ટમેન્ટમાં આવ્યો. તેણે તેમની ટિકિટ તપાસી અને ફર્સ્ટ ક્લાસની ટિકિટ હોવા છતાં તેમને થર્ડ ક્લાસમાં જવા કહ્યું. રકઝક થતાં તેણે પોલીસની મદદથી યુવા બેરિસ્ટર (Barrister)ને કમ્પાર્ટમેન્ટની બહાર ફેંકી દીધા.

તે સમયે તેમના મનમાં વિચાર આવ્યો: “મારે મારા હક માટે લડવું જોઈએ.”

24 વર્ષના આ યુવાન, બિનઅનુભવી બેરિસ્ટરના આ વિચારમાં સ્વરાજ (Swaraj)ની હિલચાલના ભણકારા હતા. તેમના આ વિચારે માત્ર આફ્રિકનોમાં જ નહીં, પરંતુ ભારતની તે વખતની 30 કરોડ જનતામાં પણ આઝાદી (Freedom)ની ભૂખ જગાડી દીધી.

ગાંધીજીના હક માટે લડવાના માત્ર એક વિચારે એવો પ્રચંડ પવન ફૂંક્યો કે 150 વર્ષની અંગ્રેજોની ગુલામી (British Rule)ની ગંઠાઈ ગયેલી સાંકળોને ઓગાળી દીધી. ટ્રેન (Train)ના ડબ્બામાંથી બહાર ફેંકાયેલી વ્યક્તિના પ્રબળ વિચારે આખા સામ્રાજ્ય (Empire)ને બહાર ફેંકી દીધું. આ વિચારની કરામત નહીં તો શું છે?

વિચારની આટલી શક્તિ (Power) અને સામર્થ્ય હોવા છતાં, વિચારવું એ કઠિન કાર્ય છે. વિચારને અઘરું કાર્ય કહેવાનું કારણ એટલું છે કે વિચાર અને વિકાસ (Development) જેમ સાથે ચાલે છે, તેમ વિચાર અને વિનાશ (Destruction) પણ સહચારી છે.

વિચાર યોગ્ય, નિયંત્રિત (Controlled) અને સર્જનાત્મક (Creative) હોય તો ચોક્કસ વિકાસને નોતરે છે. પરંતુ અયોગ્ય, અનિયંત્રિત (Uncontrolled) અને વિધ્વંસાત્મક (Destructive) વિચાર વિનાશ સર્જે છે. કોઈની પ્રગતિમાં દાઝવાથી શરૂ થયેલી વૈચારિક પ્રક્રિયા આતંકવાદ (Terrorism) સુધી પહોંચે છે; તેના મૂળમાં આ અવળો વિચાર જ હોય છે.

તેથી જ વચનામૃત (Vachanamrut)માં ભગવાન સ્વામિનારાયણ (Bhagwan Swaminarayan) કહે છે કે, “અવળા વિચારનો ત્યાગ કરવો અને સવળો વિચાર હોય તે જ ગ્રહણ કરવો.”

વિચાર (Thought) એ માનવીની સૌથી મોટી શક્તિ (Power) છે. એ જ વિચાર માનવીને ગુફાઓમાંથી અવકાશ (Space) સુધી પહોંચાડે છે અને એ જ વિચાર તેને પતનના માર્ગે પણ દોરી શકે છે. તેથી વિચારોનું સંવર્ધન, સંયમ અને શુદ્ધિકરણ એ જ સાચી પ્રગતિનો પાયો છે.

(સાધુ જ્ઞાનવત્સલદાસ- બીએપીએસ)

(પોતાનાં પ્રેરણાદાયી વક્તવ્યોથી દેશ-દુનિયામાં અત્યંત જાણીતા એવા સાધુ જ્ઞાનવત્સલદાસ બોચાસણવાસી અક્ષરપુરુષોત્તમ સ્વામિનારાયણ સંપ્રદાય-BAPSના અગ્રણી સંત છે. એમના વાંચન-ચિંતનનો વ્યાપ વિશાળ છે. હિન્દુ સંસ્કૃતિ ઉપરાંત વિશ્વની 200થી વધુ મહાન વ્યક્તિઓની આત્મકથાનું વાંચન અને ઊંડો અભ્યાસ એમણે કર્યો છે. એમને ડોક્ટર ઓફ લિટરેચર-D. Litt ની પદવી પણ પ્રાપ્ત થઈ છે.)

મુઝફ્ફરપુરની હોસ્પિટલના ICUમાં લાગી આગઃ ચાર લોકોનાં મોત

મુઝફ્ફરપુરઃ બિહારના મુઝફ્ફરપુરમાં ગુરુવારે વહેલી સવારે એક ખાનગી હોસ્પિટલમાં ભીષણ આગ લાગી હતી. આગની ઘટના પ્રસાદ હોસ્પિટલના પાંચમા માળે આવેલા ICUમાં બની હતી. જેને કારણે ICUમાં ધુમાડો ફેલાયો હતો. ICUમાંથી 20 લોકોને સુરક્ષિત રીતે બહાર કાઢવામાં આવ્યા હતા અને તેમને નજીકની હોસ્પિટલોમાં સારવાર માટે ખસેડવામાં આવ્યા હતા. અગ્નિશામક વિભાગને સવારે 3:55 વાગ્યે આગ લાગ્યાની જાણ કરવામાં આવી હતી. પ્રાપ્ત માહિતી મળતાં જ ફાયર બ્રિગેડની ગાડીઓ અને પોલીસ ઘટના સ્થળે પહોંચી ગઈ હતી. અત્યાર સુધી ચાર લોકોનાં મોતની પુષ્ટિ થઈ છે.

શોર્ટ સર્કિટને કારણે લાગી આગ

મુઝફ્ફરપુર અગ્નિશામક વિભાગના અધિકારી રામ નિવાસ પાંડે જણાવ્યું હતું કે અમે ICUમાંથી 15થી 20 દર્દીઓને બચાવ્યા હતા, જેમાંથી બે લોકોનાં ઘટનાસ્થળે જ મોત થયાં હતાં. બાકીના દર્દીઓને નજીકની હોસ્પિટલોમાં દાખલ કરવામાં આવ્યા છે. પ્રાથમિક અહેવાલો મુજબ આગ શોર્ટ સર્કિટને કારણે લાગી હોવાનું માનવામાં આવી રહ્યું છે.

દર્દીઓને લઈને ભાગ્યા પરિવારજનો

પરિવારજનોના જણાવ્યાનુસાર હોસ્પિટલમાં ફાયર કન્ટ્રોલ સિસ્ટમ કાર્યરત નહોતી. આગ લાગ્યાની જાણ થતાં જ હોસ્પિટલમાં અફરાતફરી મચી ગઈ હતી. દર્દીઓ અને તેમના પરિવારજનો જીવ બચાવવા માટે કોઈક રીતે હોસ્પિટલની બહાર નીકળી ગયા હતા. જોકે ICU વોર્ડમાં દાખલ દર્દીઓ માટે આ દુર્ઘટના અત્યંત ભયાનક સાબિત થઈ હતી. પ્રાથમિક માહિતી મુજબ ગૂંગળામણ (ધુમાડાને કારણે શ્વાસ રૂંધાવાથી) અનેક દર્દીઓનાં મોત થયાં હતાં.

મુખ્ય મંત્રી સમ્રાટ ચૌધરીએ મૃતકોના પરિવારજનોને 4 લાખ રૂપિયાની સહાય આપવાની જાહેરાત કરી છે. બિહારના મુખ્ય મંત્રીએ X પર લખ્યું હતું કે મુઝફ્ફરપુરની એક ખાનગી હોસ્પિટલમાં આગ લાગવાને કારણે ચાર લોકોનાં મોત થવાની ઘટના અત્યંત દુઃખદ છે. શોકગ્રસ્ત પરિવારો પ્રત્યે મારી સંવેદનાઓ છે. ઈશ્વર દિવંગત આત્માઓને શાંતિ આપે અને તેમના પરિવારજનોને આ કપરા સમયમાં શક્તિ અને ધૈર્ય પ્રદાન કરે. મૃતકોના પરિવારજનોને તાત્કાલિક 4-4 લાખ રૂપિયાનું અનુગ્રહ અનુદાન આપવાનો નિર્દેશ આપવામાં આવ્યો છે.

પંચાંગ 04/06/2026

૦૪ જૂન ૨૦૨૬

સૂર્યકુમાર યાદવ આઉટ, શ્રેયસ અય્યર બન્યો નવો T20 કિંગ

ભારતીય ક્રિકેટ જગતમાંથી આ સમયે સૌથી મોટા સમાચાર સામે આવી રહ્યા છે. ટીમ ઈન્ડિયાના T20 ફોર્મેટના સુકાનીપદને લઈને ભારતીય ક્રિકેટ કંટ્રોલ બોર્ડ (BCCI) અને સેલેક્ટર્સે એક અત્યંત ચોંકાવનારો અને સાહસિક નિર્ણય લીધો છે. મિડલ ઓર્ડરના ભરોસાપાત્ર બેટ્સમેન શ્રેયસ અય્યરને હવે સત્તાવાર રીતે ભારતીય T20 ટીમનો નવો કેપ્ટન બનાવવામાં આવ્યો છે. અય્યર હવે વર્તમાન કેપ્ટન સૂર્યકુમાર યાદવ (SKY) ની જગ્યા લેશે અને આગામી સીરીઝથી ભારતીય ટીમની કમાન સંભાળશે. છેલ્લા કેટલાક સમયથી ભારતીય T20 ટીમમાં પરિવર્તનની જે અટકળો ચાલી રહી હતી, તેના પર આ નિર્ણય સાથે જ પૂર્ણવિરામ મુકાઈ ગયું છે. આ ફેરફાર સાથે જ ભારતીય ટૂંકા ફોર્મેટના ક્રિકેટમાં હવે એક નવા યુગ અને એક નવી વિચારધારાની શરૂઆત થવા જઈ રહી છે.

સૂર્યકુમાર યાદવની કેપ્ટનશીપ અને ફોર્મ પર કેમ ઉઠ્યા સવાલો?

છેલ્લા કેટલાક સમયથી સૂર્યકુમાર યાદવની કેપ્ટનશીપ અને ખાસ કરીને તેની વ્યક્તિગત બેટિંગ શૈલી પર ક્રિકેટ વિવેચકો અને પસંદગીકારો દ્વારા સતત સવાલો ઉઠાવવામાં આવી રહ્યા હતા. T20 વર્લ્ડ કપ દરમિયાન અને ત્યાર બાદ રમાયેલી મહત્વની મેચોમાં પણ સૂર્યાનું પ્રદર્શન ક્રિકેટ ચાહકો અને ટીમ મેનેજમેન્ટની અપેક્ષાઓ મુજબનું રહ્યું ન હતું.

આ સિવાય, તાજેતરમાં રમાયેલી ઇન્ડિયન પ્રીમિયર લીગ (IPL) ની સીઝનમાં પણ સૂર્યકુમાર યાદવ પોતાના બેટથી કોઈ ખાસ કમાલ કરી શક્યો નહોતો અને રન બનાવવા માટે સતત સંઘર્ષ કરતો જોવા મળ્યો હતો. સૂર્યાનું આ નબળું ફોર્મ અને મેદાન પર પ્રેશર હેન્ડલ કરવાની ક્ષમતામાં આવેલો ઘટાડો જોઈને મુખ્ય પસંદગીકાર અને ટીમ મેનેજમેન્ટે ભવિષ્યના રોડમેપ માટે નવા અને લાંબા ગાળાના કેપ્ટનની શોધ શરૂ કરી દીધી હતી, જે અંતે શ્રેયસ અય્યર પર આવીને અટકી છે.

કેમ શ્રેયસ અય્યર જ બન્યો સેલેક્ટર્સની પહેલી પસંદ?

શ્રેયસ અય્યર ઘણા લાંબા સમયથી ભારતીય મિડલ ઓર્ડરની કરોડરજ્જુ રહ્યો છે અને તે એક અત્યંત પરિપક્વ અને ભરોસાપાત્ર બેટ્સમેન તરીકે ઓળખાય છે. અય્યર પાસે માત્ર આંતરરાષ્ટ્રીય ક્રિકેટનો જ નહીં પરંતુ કેપ્ટનશીપનો પણ બહોળો અનુભવ છે. તેણે ડોમેસ્ટિક ક્રિકેટ (ઘરઆંગણાના ક્રિકેટ) માં મુંબઈની ટીમ અને હાઈ-પ્રોફાઈલ ટૂર્નામેન્ટ IPL માં વિવિધ ફ્રેન્ચાઈઝીઓ માટે શાનદાર કેપ્ટનશીપ કરી છે.

મેદાન પર તેની સ્ટ્રેટેજી, શાંત સ્વભાવ અને મુશ્કેલ પરિસ્થિતિઓમાં પણ દબાણ વગર યોગ્ય નિર્ણયો લેવાની કળાને કારણે તે હંમેશા એક લીડર તરીકે ઉભરી આવ્યો છે. ટીમ મેનેજમેન્ટ અને કોચિંગ સ્ટાફની નજરમાં T20 ફોર્મેટમાં યુવા ખેલાડીઓને સાથે રાખીને આગળ વધવા માટે શ્રેયસ અય્યર અત્યારે સૌથી યોગ્ય અને સક્ષમ ઉમેદવાર સાબિત થયો છે.

આગામી રોડમેપ અને અય્યર સામેના મોટા પડકારો

શ્રેયસ અય્યરના કેપ્ટન બનવાની સાથે જ ભારતીય ક્રિકેટ ચાહકોમાં ભારે ઉત્સાહ જોવા મળી રહ્યો છે. હવે તમામ ક્રિકેટ જગતની નજર એ વાત પર રહેશે કે અય્યરના નેતૃત્વમાં ટીમ ઈન્ડિયા આગામી વિદેશી પ્રવાસો, દ્વિપક્ષીય સીરીઝ અને ભવિષ્યના મોટા આઈસીસી (ICC) ટૂર્નામેન્ટ્સમાં કેવું પ્રદર્શન કરે છે.

ક્રિકેટ એક્સપર્ટ્સનું માનવું છે કે નવો કેપ્ટન આવવાની સાથે જ ટીમમાં મોટા ફેરફારો જોવા મળશે:

નવા યુવા ખેલાડીઓને ટીમમાં સામેલ કરવા માટે વધુ તકો મળી શકે છે.

ટીમના બેટિંગ ઓર્ડર (Batted Order) અને પાવરપ્લેની રણનીતિમાં મહત્વના ફેરફારો જોવા મળશે.

અય્યર સામે માત્ર પોતાની બેટિંગ સુધારવાનો જ પડકાર નથી, પરંતુ સમગ્ર ટીમને એકજૂથ કરીને ફરીથી વિશ્વની નંબર 1 ટીમ બનાવવાની અને ટ્રોફીઓ જીતાડવાની મોટી જવાબદારી તેના ખભા પર આવી ગઈ છે.

સૂર્યકુમાર યાદવ પાસેથી છીનવાઈ ટી-20 ની કેપ્ટનશીપ

ભારતીય ક્રિકેટ જગતમાંથી એક ખૂબ જ આંચકાજનક સમાચાર સામે આવી રહ્યા છે. તાજેતરમાં જેની કપ્તાની હેઠળ ટીમ ઇન્ડિયાએ ટી-20 વર્લ્ડ કપ 2026 નો ખિતાબ જીત્યો હતો, તે સ્ટાર બેટ્સમેન સૂર્યકુમાર યાદવને મોટો ઝટકો લાગ્યો છે. વિવિધ અહેવાલોનું માનીએ તો સૂર્યકુમાર યાદવને ટી-20 ટીમની કેપ્ટનશીપ પરથી હટાવી દેવામાં આવ્યા છે. એટલું જ નહીં, હવે ભવિષ્યમાં ટીમ ઇન્ડિયામાં ખેલાડી તરીકે પણ તેમના સિલેક્શન પર સવાલો ઉભા થયા છે અને પસંદગી સમિતિ આગામી મેચો માટે તેમના નામ પર વિચારણા કરવાની નથી. છેલ્લા એક વર્ષથી ચાલી રહેલા ખરાબ ફોર્મના કારણે તેમનું આંતરરાષ્ટ્રીય કરિયર હવે લગભગ ખતમ માનવામાં આવી રહ્યું છે.

રોહિત શર્મા બાદ સંભાળી હતી કમાન, કેપ્ટન તરીકે શાનદાર રેકોર્ડ

સૂર્યકુમાર યાદવ વર્ષ 2024 માં ભારતીય ટી-20 ટીમના નિયમિત સુકાની બન્યા હતા. તેમણે દિગ્ગજ ખેલાડી રોહિત શર્માની જગ્યા લીધી હતી, જેમણે ટી-20 વર્લ્ડ કપ જીતાડ્યા બાદ આ ફોર્મેટને અલવિદા કહી દીધું હતું. જ્યારે સૂર્યાને કેપ્ટન બનાવવામાં આવ્યા ત્યારે તેઓ ટી-20 ઇન્ટરનેશનલના નંબર 1 બેટ્સમેન હતા અને તે સમયે કપ્તાનીની રેસમાં સૌથી આગળ ચાલી રહેલા હાર્દિક પંડ્યા પર તેમને પ્રાધાન્ય આપવામાં આવ્યું હતું. સૂર્યકુમાર યાદવની કપ્તાનીમાં ટીમ ઇન્ડિયાનું પ્રદર્શન અદભુત રહ્યું હતું. ભારતીય ટીમે સતત 8 ટી-20 સીરીઝ જીતવાનો રેકોર્ડ બનાવ્યો અને તેની સાથે 2025 નો એશિયા કપ પણ પોતાના નામે કર્યો હતો. આ સફળ સફર બાદ ભારતે ટી-20 વર્લ્ડ કપ પણ જીત્યો, જેનાથી એક સુકાની તરીકે સૂર્યા સુપરહિટ સાબિત થયા હતા.

સફળ કેપ્ટન હોવા છતાં કેમ લેવાયો આકરો નિર્ણય?

સૂર્યકુમાર યાદવની કપ્તાનીમાં ટીમે ભલે મેચો જીતી, પરંતુ એક બેટ્સમેન તરીકે તેઓ ખુદ ફ્લોપ સાબિત થઈ રહ્યા હતા. આંકડાઓ પર નજર કરીએ તો તેમનું ફોર્મ સતત ગગડી રહ્યું હતું:

વર્ષ 2024: સૂર્યા માત્ર 26.81 ની એવરેજથી 429 રન જ બનાવી શક્યા હતા.

વર્ષ 2025: સ્થિતિ વધુ ખરાબ થઈ અને તેમણે 19 ઇનિંગ્સમાં માત્ર 13.6 ની નબળી સરેરાશથી 218 રન બનાવ્યા.

વર્ષ 2026: આ વર્ષે તેમણે ચોક્કસપણે 44 ની એવરેજથી 484 રન બનાવ્યા છે, પરંતુ ટી-20 વર્લ્ડ કપની મહત્વની મેચોમાં તેમનું પ્રદર્શન સરેરાશ રહ્યું અને તેઓ અપેક્ષા પર ખરા ઉતરી શક્યા નહીં.

આ સિવાય ઇન્ડિયન પ્રીમિયર લીગ (IPL) માં પણ તેમનું પ્રદર્શન ખૂબ જ કથળેલું રહ્યું હતું, જેના કારણે સિલેક્ટર્સે હવે કડક વલણ અપનાવ્યું છે.

કોણ બનશે ટીમ ઇન્ડિયાનો નવો ટી-20 કેપ્ટન?

સૂર્યકુમાર યાદવ યુગના અંત બાદ હવે ભારતીય ટી-20 ટીમની કમાન કોણ સંભાળશે, તે મોટો સવાલ છે. આ રેસમાં બે મુખ્ય નામો સૌથી આગળ ચાલી રહ્યા છે:

શ્રેયસ અય્યર (Shreyas Iyer): શ્રેયસ અય્યરની ટી-20 ટીમમાં વાપસી થઈ શકે છે અને તેમને આગામી કેપ્ટન બનાવવામાં આવી શકે છે. એક સુકાની તરીકે આઈપીએલ અને ડોમેસ્ટિક ક્રિકેટમાં તેમણે પોતાની લીડરશીપ ક્વોલિટી સાબિત કરી છે.

રજત પાટીદાર (Rajat Patidar): આ રેસમાં બીજું મોટું નામ રજત પાટીદારનું છે, જેમણે પોતાની શાનદાર કેપ્ટનશીપ હેઠળ રોયલ ચેલેન્જર્સ બેંગલુરુ (RCB) ને સતત બે વાર આઈપીએલ ચેમ્પિયન બનાવી છે અને એક વિસ્ફોટક બેટ્સમેન તરીકે પણ પોતાનો દમ બતાવ્યો છે.

ખૂબ જ ટૂંક સમયમાં ભારતીય ક્રિકેટ કંટ્રોલ બોર્ડ (BCCI) દ્વારા ટી-20 ટીમના નવા સત્તાવાર કેપ્ટનની જાહેરાત કરવામાં આવી શકે છે.

દિલ્હી અગ્નિકાંડમાં હોટલ માલિક લવકેશ બજાજની ધરપકડ

રાજધાની દિલ્હીના હૌઝ રાની વિસ્તારમાં સર્જાયેલા કાળઝાળ અગ્નિકાંડે સમગ્ર દેશને હચમચાવી મૂક્યો છે. આ ભયાનક અકસ્માતમાં અત્યાર સુધીમાં 21 નિર્દોષ લોકોના દર્દનાક મોત થયા છે. આ મામલાની ગંભીરતાને જોતા દિલ્હી પોલીસે મોટી સફળતા મેળવીને હોટલના ફરાર માલિક લવકેશ બજાજની ધરપકડ કરી લીધી છે. દુર્ઘટના બાદ લવકેશ બજાજ અને તેની પત્ની દેશ છોડીને ભાગી ન જાય તે માટે પોલીસે અગાઉથી જ એરપોર્ટ પર લુકઆઉટ સર્ક્યુલર (LOC) જારી કરી દીધો હતો. ત્યારબાદ વિશેષ ટીમોની સઘન શોધખોળ બાદ આખરે આરોપી માલિકને દબોચી લેવાયો છે.

બુધવારે સવારે દક્ષિણ દિલ્હીના હૌઝ રાનીમાં આવેલી પાંચ માળની ‘ફ્લોરિસ સ્ટે બી એન્ડ બી’ (Flourish Stay B&B) હોટલને આગે ક્ષણભરમાં લપેટમાં લઈ લીધી હતી. હોટલની ખામીયુક્ત ઇન્ફ્રાસ્ટ્રક્ચરના કારણે અંદર હાજર લોકોને બહાર નીકળવાની તક જ મળી ન હતી. ફાયર બ્રિગેડ અને રેસ્ક્યુ ટીમોએ ભારે જહેમત બાદ કાચ તોડીને ડઝનબંધ લોકોને બહાર કાઢ્યા હતા.

દિલ્હી પોલીસના સત્તાવાર રિપોર્ટ અનુસાર, અગ્નિકાંડ બાદ કુલ 49 લોકોને ગંભીર હાલતમાં જુદી જુદી હોસ્પિટલોમાં દાખલ કરવામાં આવ્યા હતા. તેમાંથી સારવાર દરમિયાન 21 લોકોએ દમ તોડી દીધો હતો. અત્યંત ચોંકાવનારી વાત એ છે કે મૃતકોમાં 9 ભારતીય નાગરિકો અને 12 વિદેશી પ્રવાસીઓ સામેલ છે. હોસ્પિટલમાંથી 8 લોકોને પ્રાથમિક સારવાર બાદ રજા આપવામાં આવી છે, જ્યારે બાકીના ઘાયલો હજુ પણ જિંદગી અને મરણ વચ્ચે ઝોલા ખાઈ રહ્યા છે.

પૂર્વ મુખ્યમંત્રી સ્વ. ચીમનભાઈ પટેલની ૯૮મી જન્મજયંતી

ગાંધીનગર: પૂર્વ મુખ્યમંત્રી સ્વ. ચીમનભાઈ પટેલની ૯૮મી જન્મજયંતી નિમિત્તે બુધવાર સવારે પાટનગર અને અમદાવાદ ખાતે વિવિધ કાર્યક્રમોનું આયોજન કરવામાં આવ્યું હતું. સવારે ૦૮:૩૦ થી ૦૯:૩૦ દરમિયાન ગાંધીનગર સ્થિત તેમના સમાધિ સ્થળ “નર્મદાઘાટ” પર એક વિશેષ પ્રાર્થના સભા યોજાઈ હતી.આ ઉપરાંત, અમદાવાદમાં આર.ટી.ઓ. સર્કલ પાસે ચીમનભાઈ પટેલ પુલના છેડે આવેલી તેમની પ્રતિમાને પણ ભાવપૂર્વક પુષ્પાંજલિ અર્પણ કરવામાં આવી હતી.આ પ્રસંગે સ્વ. ચીમનભાઈ પટેલના પુત્ર સિધ્ધાર્થભાઈ પટેલ અને તેમના પરિવારજનો ઉપસ્થિત રહ્યા હતા. તેમની સાથે રાજ્યસભાના સાંસદ નરહરિ અમીન, વિવિધ સામાજિક અને શૈક્ષણિક સંસ્થાઓના અગ્રણીઓ તેમજ મોટી સંખ્યામાં નેતાઓ અને નાગરિકોએ હાજર રહીને ગુજરાતના આ લોકલાડીલા નેતાને યાદ કરીને અંજલિ આપી હતી.

ડી.કે. શિવકુમારે કર્ણાટકના મુખ્ય મંત્રી પદના લીધા શપથ

બેંગલુરુઃ કોંગ્રેસના નેતા ડી.કે. શિવકુમારે કર્ણાટકના મુખ્ય મંત્રી તરીકે શપથ ગ્રહણ કર્યા હતા. રાજ્યપાલ થાવરચંદ ગહેલોતે તેમને મુખ્ય મંત્રીપદ અને ગોપનીયતાની શપથ અપાવ્યા હતા. આ શપથગ્રહણ સમારોહમાં કોંગ્રેસ અધ્યક્ષ મલ્લિકાર્જુન ખડગે, લોકસભામાં વિપક્ષના નેતા રાહુલ ગાંધી, કે.સી. વેણુગોપાલ, સિદ્ધારમૈયા સહિત પાર્ટીના અનેક વરિષ્ઠ નેતાઓ હાજર રહ્યા હતા. ખાસ વાત એ રહી કે ડી.કે. શિવકુમારે ભારતીય બંધારણની નકલ હાથમાં રાખીને શપથ લીધા હતા. ડી.કે. શિવકુમારની નવી સરકારમાં ઉપ મુખ્યમંત્રી તરીકે જી. પરમેશ્વરે પણ પદ અને ગોપનીયતાની શપથ લીધા હતા. તેઓ સિદ્ધારમૈયાના નજીકના સાથીદાર માનવામાં આવે છે.

કેબિનેટમાં તમામ મોટા સમુદાયોને પ્રતિનિધિત્વ

નવી કેબિનેટમાં વોક્કાલિગા, દલિત, લિંગાયત, મુસ્લિમ, ખ્રિસ્તી, અનુસૂચિત જનજાતિ (ST) અને અન્ય પછાત વર્ગો (OBC) સહિતના સમુદાયોને સંતુલિત પ્રતિનિધિત્વ આપવામાં આવ્યું છે. મુખ્ય મંત્રી ડી.કે. શિવકુમાર વોક્કાલિગા સમુદાયમાંથી આવે છે, જ્યારે ઉપ મુખ્યમંત્રી જી. પરમેશ્વર દલિત ચહેરા તરીકે સામેલ થયા છે.

કોણ-કોણ કેબિનેટમાં સામેલ?

ડી.કે. શિવકુમાર (મુખ્ય મંત્રી) અને ડો. જી. પરમેશ્વર (ઉપ મુખ્ય મંત્રી) ઉપરાંત કેબિનેટમાં કે.એચ. મુનિયપ્પા, કે.જે. જ્યોર્જ, એમ.બી. પાટીલ, રામલિંગા રેડ્ડી, સતીશ જારકિહોલી, કૃષ્ણા બાયર ગૌડા, પ્રિયંક ખડગે, યુ.ટી. ખાદર, ઈશ્વર ખાંડ્રે, યતીન્દ્ર સિદ્ધારમૈયા, બાયરાથી સુરેશ અને શરણ પ્રકાશ પાટીલ જેવા નેતાઓનો સમાવેશ થાય છે.

લાંબા રાજકીય સંઘર્ષ બાદ મળી ખુરશી

આઠ વખત ધારાસભ્ય તરીકે ચૂંટાયેલા ડી.કે. શિવકુમાર લાંબા સમયથી મુખ્ય મંત્રી પદના દાવેદાર હતા. કોંગ્રેસમાં તેમને ‘ટ્રબલશૂટર’ તરીકે ઓળખવામાં આવે છે, કારણ કે તેમણે અનેક રાજકીય સંકટોમાં પાર્ટીને મહત્વપૂર્ણ રીતે સંભાળી છે.

દેશના સૌથી ધનિક મુખ્યમંત્રી

ડી.કે. શિવકુમાર દેશના સૌથી ધનિક મુખ્યમંત્રી ગણાય છે. તેઓ 1440 કરોડ રૂપિયાથી વધુ સંપત્તિના માલિક છે અને દેશના સૌથી સમૃદ્ધ રાજકારણીઓ તથા ધારાસભ્યોમાં તેમની ગણના થાય છે. રાજકારણ ઉપરાંત તેઓ ખનન, રિયલ એસ્ટેટ અને શિક્ષણ ક્ષેત્રે સફળ ઉદ્યોગપતિ પણ છે. ADR (એસોસિયેશન ફોર ડેમોક્રેટિક રિફોર્મ્સ)ના અહેવાલ અનુસાર ડી.કે. શિવકુમાર ભારતના સૌથી ધનિક ધારાસભ્ય છે.

મમતા બેનર્જીને મોટો ફટકો: ઋતબ્રત બેનર્જી બન્યા નવા નેતા વિપક્ષ

પશ્ચિમ બંગાળના રાજકારણમાં આ દિવસોમાં તૃણમૂલ કોંગ્રેસ (TMC) ની અંદર મચેલો ઘમાસાણ ચરમસીમાએ પહોંચી ગયો છે. વિધાનસભા ચૂંટણીમાં મળેલા આંચકા બાદથી જ પાર્ટીની અંદર અસંતોષ સતત વધી રહ્યો હતો, જે હવે એક મોટા રાજકીય ભૂકંપના સ્વરૂપમાં બહાર આવ્યો છે. ટીએમસીના સુપ્રિમો અને પૂર્વ મુખ્યમંત્રી મમતા બેનર્જીને અત્યાર સુધીનો સૌથી મોટો ઝટકો લાગ્યો છે. પક્ષમાંથી હાંકી કઢાયેલા ફાયરબ્રાન્ડ નેતા ઋતબ્રત બેનર્જીને પશ્ચિમ બંગાળ વિધાનસભામાં વિપક્ષના નેતા તરીકે ચૂંટવામાં આવ્યા છે. સ્પીકરે આ બળવાખોર જૂથને સત્તાવાર મંજૂરી આપી દીધી છે, જેનાથી બંગાળની સત્તાધારી રાજનીતિના સમીકરણો સંપૂર્ણપણે બદલાઈ ગયા છે.

દલબદલ કાનૂનથી બચવા બળવાખોરોએ સ્પીકર સામે બતાવ્યું સંખ્યાબળ

રાજકીય વર્તુળોમાંથી મળતી વિગતો અનુસાર, ટીએમસીના આ આંતરિક બળવા પાછળ ખૂબ જ પાકું કાનૂની આયોજન કરવામાં આવ્યું હતું. પક્ષપલટા વિરોધી કાયદાની જોગવાઈઓથી બચવા માટે બળવાખોર જૂથના કુલ 80 ધારાસભ્યોમાંથી ઓછામાં ઓછા 54 ધારાસભ્યોનું સમર્થન મેળવવું અનિવાર્ય હતું. આ કાનૂની શરતને પાર કરીને ઋતબ્રત બેનર્જીની આગેવાની હેઠળના જૂથે સીધા 58 બળવાખોર ધારાસભ્યોના સહી વાળા સમર્થન પત્રો વિધાનસભા સ્પીકર રથીન બોસને સોંપ્યા હતા. સ્પીકરે સંખ્યાબળની ચકાસણી કર્યા બાદ આ જૂથને માન્યતા આપી છે અને અખરુઝ્ઝમાને નવા ચીફ વ્હીપ (Chief Whip) જાહેર કર્યા છે. બળવાખોર જૂથે સ્પષ્ટ કર્યું છે કે તેઓ મમતા બેનર્જીને આજે પણ પોતાના સર્વોચ્ચ નેતા અને આદર્શ માને છે, પરંતુ મમતાના ભત્રીજા અભિષેક બેનર્જીનું એકહથ્થુ નેતૃત્વ અને તાનાશાહી તેમને બિલકુલ મંજૂર નથી.

ઋતબ્રત બેનર્જીનો મોટો દાવો

નવા લોપ (LoP) બનેલા ઋતબ્રત બેનર્જીએ દાવો કર્યો છે કે વાસ્તવમાં 60 જેટલા ધારાસભ્યો તેમના સત્તાવાર સંપર્કમાં છે. વિધાનસભાની અંદર નેતા પ્રતિપક્ષ માટેનો નિર્ધારિત ઓરડો પણ તેમને સત્તાવાર રીતે એલોટ (ફાળવી) કરી દેવામાં આવ્યો છે. તેમણે મીડિયા સમક્ષ જણાવ્યું કે, “અમારા તમામ ધારાસભ્યોની ઈચ્છા છે કે મમતા બેનર્જી અમારા માર્ગદર્શક અને સલાહકાર બને અને અમને યોગ્ય સલાહ આપતા રહે, જેથી અમે બધા સાથે મળીને વિધાનસભાની અંદર પક્ષને પ્રભાવી ઢબે ચલાવી શકીએ.”

1...232425...5,070Page 24 of 5,070