ફિફા વર્લ્ડ કપ 2018: કેટલીક મહત્ત્વની જાણકારી…

ગ્રુપ-A:

રશિયા, ઉરુગ્વે, ઈજિપ્ત, સાઉદી અરેબિયા

32 ટીમોમાં રશિયા સૌથી નીચી રેન્કવાળી ટીમ છે. 2008ની સાલથી એ કોઈ પણ ટુર્નામેન્ટના ગ્રુપ સ્ટેજથી આગળ નીકળી શકી નહોતી. રશિયાનો મુખ્ય ખેલાડી છે ઈગોર અકીનફીવ. એ ગોલકીપર છે અને ટીમનો કેપ્ટન પણ છે. સાઉદી અરેબિયા આ પાંચમી વાર વર્લ્ડ કપમાં રમશે. જોકે 2006 પછી આ પહેલી જ વાર રમશે. આ ટીમ અત્યાર સુધીમાં માત્ર એક જ વાર (1994માં) એક મેચ જીતી શકી છે. 14 જૂને દુનિયાભરના મુસ્લિમો રમઝાન માસના સમાપન સાથે ઈદ તહેવાર ઉજવશે. એ દિવસે સાઉદી અરેબિયા યજમાન રશિયા સામે સ્પર્ધાની પ્રારંભિક મેચ રમશે.

ગ્રુપ-B:

પોર્ટુગલ, સ્પેન, ઈરાન, મોરોક્કો

સ્પેન આ સતત 11મી વાર વર્લ્ડ કપમાં રમશે. ગઈ વેળાની સ્પર્ધામાં એ નોકઆઉટ સ્ટેજ શરૂ થાય પહેલા જ આઉટ થઈ ગઈ હતી. 2010માં એ ચેમ્પિયન બની હતી. ફાઈનલમાં ડેવિડ વિલાના એકમાત્ર ગોલની મદદથી સ્પેને ત્યારે પોર્ટુગલને પરાજય આપ્યો હતો. આ વખતે સ્પેનના સ્ટાર ખેલાડીઓ છે – ડેવિડ ડી જીઆ (ગોલકીપર), સર્જિઓ રામોસ અને જેરાર્ડ પાઈક. પોર્ટુગલનો સ્ટાર છે ક્રિસ્ટીયાનો રોનાલ્ડો. એણએ યુરોપીયન ક્વોલિફાયર્સમાં સૌથી વધારે ગોલ કર્યા છે – 18.

ગ્રુપ-C:

ફ્રાન્સ, પેરુ, ડેન્માર્ક, ઓસ્ટ્રેલિયા

1998ની વર્લ્ડ કપમાં ફ્રાન્સના હાથે ડેન્માર્કનો પરાજય થયો હતો, પણ ચાર વર્ષ બાદની સ્પર્ધામાં એ જ ડેન્માર્કે ગ્રુપ સ્ટેજમાં ફ્રાન્સને હરાવીને નોકઆઉટ કર્યું હતું. ક્રિસ્ટીયન એરિક્સન હાલની ડેનિશ ટીમો બેસ્ટ પ્લેયર છે. પેરુ ટીમ 1982 બાદ પહેલી જ વાર વિશ્વ તખ્તા પર રમી રહી છે.

ગ્રુપ-D:

આર્જેન્ટિના, ક્રોએશિયા, આઈસલેન્ડ, નાઈજિરીયા

આઈસલેન્ડ પહેલી જ વાર આ સ્પર્ધામાં રમશે. એ સ્પર્ધાનો સૌથી નાનો દેશ છે. એની વસ્તી માંડ 3,34,000 છે. 2016ની યુરો સ્પર્ધામાં એનો ઈંગ્લેન્ડના હાથે પરાજય થયો હતો. આઈસલેન્ડની પહેલી મેચ 16 જૂને મોસ્કોમાં આર્જેન્ટિના સામે છે.

ગ્રુપ-E:

બ્રાઝિલ, સ્વિટ્ઝરલેન્ડ, કોસ્ટા રિકા, સર્બિયા

બ્રાઝિલ નવા કોચ ટાઈટના માર્ગદર્શન હેઠળ રમશે. આ કોચના આગમન બાદ ટીમે કુલ 10 મેચ જીતી છે અને બે મેચ ડ્રો કરી છે. નેમાર, ગેબ્રિયલ જીસસ અને ફિલીપ કુટિન્હો જો ફોર્મમાં આવી જશે તો બ્રાઝિલને હરાવવાનું કોઈ પણ ટીમ માટે મુશ્કેલ બનશે. સ્વિટ્ઝરલેન્ડની ટીમ છેલ્લી બે વર્લ્ડ કપમાં રાઉન્ડ-16માં પહોંચવામાં સફળ થઈ હતી, પરંતુ માત્ર 1954માં રાઉન્ડ-8માં પહોંચી શકી હતી.

ગ્રુપ-F:

જર્મની, મેક્સિકો, સ્વીડન, સાઉથ કોરિયા

2014ની સ્પર્ધાનું વિજેતા જર્મની આ વખતની સ્પર્ધા જીતવા માટે પણ બુકીઓના મતે ફેવરિટ છે.

જોઆકીમ લોના કોચપદ હેઠળ જર્મની 1958 અને 1962માં બ્રાઝિલની જેમ બેક-ટુ-બેક વર્લ્ડ કપ જીતનાર ટીમ બનવાની આશા રાખે છે. 2010માં સ્પેન સામેની સેમી ફાઈનલ બાદ જર્મની વર્લ્ડ કપમાં એકેય ક્વોલિફાઈંગ મેચ કે ફાઈનલ હારી નથી. 2018ની ક્વોલિફાયર્સમાં, એણે 10માંથી 10 મેચ જીતી છે, 43 ગોલ કર્યા છે અને પોતાની વિરુદ્ધ માત્ર 4 ગોલ જ થવા દીધા છે.

ગ્રુપ-G:

બેલ્જિયમ, ઈંગ્લેન્ડ, ટ્યુનિશિયા, પનામા

બેલ્જિયમ અને ઈંગ્લેન્ડનો મુકાબલો સૌથી વધારે રસપ્રદ બનશે. પ્રીમિયર લીગ સ્પર્ધામાં બેલ્જિયમના 19 ખેલાડીઓ ઈંગ્લેન્ડમાં રમ્યાં છે. ખાસ કરીને રોબર્ટો માર્ટિનેઝના દેખાવ પર સૌની મીટ મંડાયેલી રહેશે. બેલ્જિયમ જોકે ઈંગ્લેન્ડને બંને વચ્ચેના છેલ્લા 11 મુકાબલાઓમાં હરાવી શક્યું નથી. ઈતિહાસમાં માત્ર એક જ વાર એ જીતી શક્યું છે.

ગ્રુપ-H:

પોલેન્ડ, કોલંબિયા, સેનેગલ, જાપાન

આ ગ્રુપમાં યુરોપ, સાઉથ અમેરિકા, આફ્રિકા અને એશિયા, એમ જુદા જુદા ખંડની ટીમ સામેલ છે. દરેકની રમવાની સ્ટાઈલ અલગ છે. 2002ની વર્લ્ડ કપમાં સેનેગલ ક્વોર્ટર ફાઈનલમાં પહોંચ્યું હતું. કોલંબિયાએ 2014માં ક્વોર્ટરમાં પ્રવેશ કર્યો હતો.

રશિયા આ પહેલી જ વાર ફિફા વર્લ્ડ કપ સ્પર્ધાનું યજમાનપદ ભોગવી રહ્યું છે.

આ પ્રતિષ્ઠિત સ્પર્ધામાં રશિયા (સોવિયેત સંઘ સહિત) આ 11મી વાર ભાગ લેશે. સ્પર્ધામાં એનો (સોવિયેત સંઘનો) શ્રેષ્ઠ દેખાવ 1966માં રહ્યો હતો જ્યારે એ ચોથા ક્રમે આવ્યું હતું.

આ વખતની સ્પર્ધાની મેચો સોચી શહેર તથા અન્ય સ્થળોએ પણ યોજાશે. સોચી શહેરે અગાઉ 2014માં શિયાળુ રમતોત્સવની ઉદઘાટન અને સમાપન વિધિઓ યોજી હતી.

ફૂટબોલ વર્લ્ડ કપમાં સૌથી વધારે મેચો ડ્રો કરનાર ટીમ છે ઈટાલી. એણે કુલ 21 મેચો ડ્રો કરી છે.

વર્લ્ડ કપમાં સૌથી વધારે સ્કોરવાળી મેચ 1954માં રમાઈ હતી. એ મેચમાં ઓસ્ટ્રિયાએ સ્વિટ્ઝરલેન્ડને 7-5 ગોલના માર્જિનથી પરાજય આપ્યો હતો.

પહેલી વર્લ્ડ કપ સ્પર્ધા 1930માં ઉરુગ્વેમાં રમાઈ હતી. એ જ ટીમ ત્યારે વિજેતા પણ બની હતી.

વર્લ્ડ કપમાં સૌથી વધારે પરાજય મેળવવાનો રેકોર્ડ મેક્સિકોનો છે. એ કુલ 25 મેચો હાર્યું છે.

જર્મનીનો લોથાર મેથ્યૂસ સૌથી વધારે મેચો રમવાનો રેકોર્ડ ધરાવે છે. એ કુલ 25 મેચો રમ્યો હતો.

જર્મનીનો ક્લોઝ તમામ વર્લ્ડ કપમાં સૌથી વધારે ગોલ કરવાનો રેકોર્ડ ધરાવે છે. એણે કુલ 16 ગોલ કર્યા છે.

રશિયાનો સાલેન્કો એક જ મેચમાં સૌથી વધારે ગોલ કરવાનો વિક્રમ ધરાવે છે. 1994માં એણે એક મેચમાં પાંચ ગોલ કર્યા હતા.

ફાઉલ બદલ રેફરીએ સૌથી વધારે કાર્ડ બતાવ્યા હોય એવો કયો ખેલાડી? એ છે ફ્રાન્સનો ઝીનેડીન ઝીડાન. એને 4 યેલો અને બે રેડ કાર્ડ બતાવવામાં આવ્યા હતા.

ગઈ વેળાની 2014ની બ્રાઝિલ વર્લ્ડ કપ સ્પર્ધા પર એક નજર

2014ની વર્લ્ડ કપને દુનિયાની કુલ વસ્તીના અડધા ભાગના લોકોએ, એટલે કે આશરે 3.2 અબજ લોકોએ નિહાળી હતી.

2014ની સ્પર્ધાની દરેક મેચ દીઠ સ્ટેડિયમમાં દર્શકોની સરેરાશ હાજરીનો આંકડો હતો – 53,592

2014ની સ્પર્ધામાં કુલ 3,240 ફૂટબોલનો ઉપયોગ કરવામાં આવ્યો હતો. આમાં, મેચ તથા પ્રેક્ટિસ વખતે વપરાયેલા બોલનો સમાવેશ થાય છે.

2014ની સ્પર્ધામાં કુલ 171 ગોલ સ્કોર થયા હતા. 1998ની સ્પર્ધામાં પણ આટલી સંખ્યામાં ગોલ થયા હતા.