અમદાવાદઃ સપ્તાહના અંતિમ ટ્રેડિંગ સેશનમાં ઘરેલુ શેરબજારોમાં તેજી થઈ હતી. જેશી સેન્સેક્સ 1000 પોઇન્ટ અને નિફ્ટી 25,000ને પાર થયો હતો. NSEના બધા સેક્ટોરિયલ ઇન્ડેક્સ તેજી સાથે બંધ થયા હતા. નિફ્ટી રિયલ્ટી ઇન્ડેક્સ 2.11 ટકા વધ્યો હતો. આ સાથે બેન્ક નિફ્ટી, નિફ્ટી PSU અને નિફ્ટી પ્રાઇવેટ બેન્ક પણ એક ટકા તેજી સાથે બંધ થયા હતા. રોકાણકારોની સંપત્તિમાં 4.8 લાખ કરોડનો વધારો થયો હતો.
અમેરિકાએ કહ્યું હતું કે ઇરાન-ઇઝરાયેલ મુદ્દે તત્કાળ સૈનાની કાર્યવાહી નહીં કરવામાં આવે. એનાથી જિયો પોલિટિકલ ટેન્શન ઘટતાં શેરોમાં તેજી થઈ હતી. આ ઉપરાંત બ્રેન્ટ ક્રૂડ ઓઇલ 2.45 ટકા ઘટીને 76.92 ડોલર પ્રતિ બેરલ પર આવ્યું હતું. જે ભારત માટે સકારાત્મક છે, કેમ કે ભારત એની મોટા ભાગની જરૂરિયાતના 80 ટકા આયાત પર નિર્ભર કરે છે.
આ ઉપરાંત ફોરેક્સ માર્કેટમાં ડોલરની તુલનાએ રૂપિયો મજબૂત થયો હતો. ડોલરની તુલનાએ 13 પૈસા વધીને રૂ. 86.60 પર આવ્યો હતો. જેથી સેન્સેક્સ 1046 પોઇન્ટ ઊછળી 82,408ના મથાળે બંધ રહ્યો હતો, જ્યારે નિફ્ટી 319 પોઇન્ટ ઊછળીને 25,112.40ના સ્તરે બંધ રહ્યો હતો. આ સાથે વિદેશી સંસ્થાકીય રોકાણકારોએ શેરબજારોમાં ધૂમ ખરીદી કરી હતી, FIIએ રૂ. 934 કરોડ અને DIIએ રૂ. 605 કરોડની લેવાલી કરી હતી.
BSE પર કુલ 4094 શેરોમાં કામકાજ થયાં હતાં. એમાં 2463 શેરો તેજી સાથે બંધ થયા હતા અને 1484 શેરોમાં ઘટાડો થયો હતો. આ સાથે 147 શેરો સપાટ બંધ થયા હતા. આ સિવાય 83 શેરોએ નવી 52 સપ્તાહની ઊંચી સપાટી સર કરી હતી, જ્યારે 84 શેરોએ 52 સપ્તાહના નવા નીચલા સ્તરે સ્પર્શ્યા હતા. આ સાથે 186 શેરોમાં અપર સરકિટ લાગી હતી, જ્યારે 227 શેરોમાં લોઅર સરકિટ લાગી હતી.
