મુંબઈ: ટ્રમ્પના ટેરિફ વૉરના કારણે આખી દુનિયામાં અફળાતફળી જેવો માહોલ સર્જાયો છે. દુનિયાભરના માર્કેટ તૂટી રહ્યા છે. ત્યારે RBIએ મોનિટરી પોલિસીની મહત્ત્વપૂર્ણ બેઠકમાં મોટો નિર્ણય લેતાં રેપો રેટમાં 0.25% બેસિસ પોઇન્ટનો ઘટાડો કરીને મોટી રાહત આપી છે.
હવે રેપો રેટ 6%
રિઝર્વ બેન્ક ઓફ ઈન્ડિયાની આ જાહેરાત સાથે જ રેપો રેટ હવે 6.25% થી ઘટીને 6 % થઈ ગયો છે. એટલે કે હવે આવનારા દિવસોમાં લોન સસ્તી થશે અને EMIમાં પણ ઘટાડો નોંધાશે. આ માહિતી RBIના ગવર્નર સંજય મલ્હોત્રાએ આપી હતી.
ફેબ્રુઆરીમાં રેપો રેટમાં ઘટાડો કર્યો હતો
ચાલુ વર્ષે સતત બીજી વખત RBIએ રેપો રેટમાં ઘટાડો કરીને સૌને ચોંકાવી દીધા છે. અગાઉ 2024-25ની છેલ્લી ફાયનાન્શિયલ મીટિંગમાં RBIએ આ રીતે જ રેપો રેટમાં ઘટાડો કરવાની જાહેરાત ફેબ્રુઆરી મહિનામાં કરી હતી. ત્યારે 6.50% થી રેપો રેટને ઘટાડીને 6.25% પર લાવી દેવામાં આવ્યો હતો. આ ઘટાડો લગભગ પાંચ વર્ષ બાદ કરવામાં આવ્યો હતો.
રેપો રેટ ઘટાડતાં શું ફેરફાર થશે?
રેપો રેટમાં ઘટાડો થતાં બેન્કો પણ હાઉસિંગ અને ઓટો જેવી લોન સામેના વ્યાજદરમાં ઘટાડો કરી શકે છે. જ્યારે વ્યાજદરો ઘટશે તો હાઉસિંગની ડિમાન્ડ વધશે અને મોટાભાગના લોકો રિયલ એસ્ટેટમાં રોકાણ કરવા પ્રોત્સાહિત થશે.
