₹નો સિમ્બોલ દૂર કરવા પર ભડક્યાં નિર્મલા સીતારામન

નવી દિલ્હીઃ તામિલનાડુ સરકારે રાજ્યના બજેટ 2025-26 દસ્તાવેજોમાંથી રૂપિયાના સત્તાવાર પ્રતીક ‘₹’ ને દૂર કરી નાખતાં આ વિવાદ વધુ ઘેરો બન્યો છે. આ મુદ્દે હવે નાણાપ્રધાન નિર્મલા સીતારામણે વિરોધ વ્યક્ત કર્યો છે. તેમણે સવાલ કર્યો કે જો DMKને રૂપિયાના પ્રતીકથી સમસ્યા હતી, તો તેણે 2010માં જ્યારે તે યુપીએ સરકારનો ભાગ હતી ત્યારે તેને સત્તાવાર રીતે અપનાવવા સામે કેમ વાંધો ન ઉઠાવ્યો?

નાણાપ્રધાન નિર્મલા સીતારમણે સોશિયલ મિડિયા પ્લેટફોર્મ X પર લખ્યું, “DMK સરકારે તામિલનાડુ બજેટ 2025-26 દસ્તાવેજોમાંથી સત્તાવાર રૂપિયા પ્રતીક ‘₹’ દૂર કરી દીધો હોવાના અહેવાલ છે, જે આવતી કાલે રજૂ કરવામાં આવશે. જો DMK ને ‘₹’ સાથે સમસ્યા છે, તો તેણે 2010 માં તેનો વિરોધ કેમ ન કર્યો જ્યારે તેને કોંગ્રેસની આગેવાની હેઠળની UPA સરકાર હેઠળ સત્તાવાર રીતે અપનાવવામાં આવ્યું હતું, તે સમયે જ્યારે DMK કેન્દ્રમાં શાસક ગઠબંધનનો ભાગ હતો. વિડંબના એ છે કે ‘₹’ને DMKના ભૂતપૂર્વ ધારાસભ્ય એન. ધર્મલિંગમના પુત્ર ટી.ડી. ઉદય કુમાર દ્વારા ડિઝાઇન કરવામાં આવી હતી. હવે તેને ભૂંસી નાખીને DMK માત્ર રાષ્ટ્રીય પ્રતીકને નકારી રહ્યું નથી પરંતુ તમિળ યુવાનના સર્જનાત્મક યોગદાનને સંપૂર્ણપણે અવગણી રહ્યું છે.

તમિળ શબ્દ ரூபாய் સંસ્કૃત શબ્દ રૂપ્યા પરથી આવ્યો

તેમણે કહ્યું હતું કે વધુમાં તમિળ શબ્દ ‘રૂપાઈ’ (ரூபாய்) પોતે સંસ્કૃત શબ્દ ‘રૂપ્યા’ માં ઊંડા મૂળ ધરાવે છે, જેનો અર્થ ‘દટાયેલી ચાંદી’ અથવા ‘ચાંદીનો સિક્કો’ થાય છે. આ શબ્દ સદીઓથી તમિળ વેપાર અને સાહિત્યમાં તેમનો પડઘો પાડે છે, અને આજે પણ તામિલનાડુ અને શ્રીલંકામાં ‘રૂપાઈ’ ચલણનું નામ રહે છે.