નોએડાઃ ઉત્તર પ્રદેશના નોએડા વિસ્તારમાં ભારે વરસાદને કારણે હિંડન નદીમાં પૂર આવતાં ઈકોટેક-3 વિસ્તારમાં સેંકડો મોટરકાર પાણીમાં ડૂબી ગયાની તસવીરો ઈન્ટરનેટ પર વાઈરલ થઈ છે. પૂરનાં પાણીમાં ડૂબી ગયેલી 350 જેટલી કારની ડ્રોન તસવીરો આંચકો આપનારી છે.
આ હાલત રાષ્ટ્રીય પાટનગર દિલ્હીની નજીક આવેલા ગ્રેટર નોએડા વિસ્તારમાં આવેલા એક પાર્કિંગ યાર્ડની છે. આ પાર્કિંગ યાર્ડ ઓલા કંપનીનું છે. ત્યાં પાણીમાં ડૂબી ગયેલી ઓલાની ઓનલાઈન કાર (કેબ્સ)ની માત્ર છત જ દેખાય છે.
અનેક વાર ચેતવણી આપવામાં આવી હોવા છતાં કંપનીએ તે પાર્કિંગ લોટમાંથી તેની કાર હટાવી નહોતી, પરિણામે તે હવે ડૂબી ગઈ છે.
