નવી દિલ્હીઃ ઈરાને ઈઝરાયેલ વિરુદ્ધ યુદ્ધની ઘોષણા કરી છે. ઈરાનના સર્વોચ્ચ નેતા આયાતુલ્લા અલી ખોમિનીએ બુધવારના રોજ X પર પોસ્ટ કરીને કહ્યું હતું કે મહાન હૈદરને નામે યુદ્ધ શરૂ થઈ ગયું છે. એ પછી થોડા સમય બાદ ખોમિનીએ ઈઝરાયેલને ચેતવણી આપતાં કહ્યું હતું કે આપણે આતંકવાદી યહૂદી શાસનને કડક જવાબ આપવો પડશે. અમે એમને કોઈ દયા નહીં બતાવીએ.
આ પહેલાં અમેરિકાના ભૂતપૂર્વ રાષ્ટ્રપતિ ડોનાલ્ડ ટ્રમ્પે ખોમિનીને શરત વગર આત્મસમર્પણ કરવા કહ્યું હતું. ટ્રમ્પે કહ્યું હતું કે અમે સારી રીતે જાણીએ છીએ કે સુપ્રીમ લીડર ક્યાં છુપાયો છે. અમે તેને મારવા નથી જઈ રહ્યા – ઓછામાં ઓછું હમણાં તો નહીં. ટ્રમ્પે કહ્યું હતું કે હવે અમારું ધૈર્ય ખૂટી રહ્યું છે અને ખોમિનીએ શરત વગર આત્મસમર્પણ કરવું જોઈએ.
ઈઝરાયેલ અને ઈરાન વચ્ચેનો સંઘર્ષ હવે છઠ્ઠા દિવસે પ્રવેશી ગયો છે અને બંને દેશો એકબીજા પર મિસાઇલ હુમલાઓ કરી રહ્યા છે. મેહર ન્યૂઝ એજન્સી અનુસાર ઈરાને બુધવારે સવારે ઈઝરાયેલ પર ફતાહ મિસાઇલોનો મારો કર્યો છે. ફતાહ મિસાઇલ હાઈપરસોનિક મિસાઇલ છે, જે અવાજની ગતિ કરતાં પાંચ ગણી ઝડપે ચાલે છે.
We must give a strong response to the terrorist Zionist regime.
We will show the Zionists no mercy.— Khamenei.ir (@khamenei_ir) June 17, 2025
રોઇટર્સના જણાવ્યા અનુસાર અમેરિકા મિડલ-ઈસ્ટમાં વધુ લડાકુ વિમાનો તહેનાત કરી રહ્યું છે. ઈરાનના સરકારી મિડિયાએ જણાવ્યું છે કે ઈઝરાયેલી સેના દ્વારા ઈરાનની રાજધાની તહેરાનમાં આવેલી ખોજિર મિસાઇલ ઉત્પાદન સુવિધા પર નિશાન સાધવામાં આવ્યું છે. આ સુવિધા ઈરાન માટે મહત્ત્વની માનવામાં આવે છે, કારણ કે અહીં બેલિસ્ટિક મિસાઇલ્સ સાથે સંકળાયેલે માળખું છે. અહીં ઓક્ટોબર, 2024માં પણ ઈઝરાયેલે હુમલો કર્યો હતો.
