અમદાવાદ: ઓઢવ વિસ્તારમાં પોલીસ અને આરોપી વચ્ચે એક ફિલ્મી દ્રશ્ય સર્જાયું. જેમાં વોન્ટેડ આરોપીને પકડવા પહોંચેલી આરોપીને પોલીસે પાંચમા માળેથી કૂદી જવાની ધમકી આપી. આ ઘટનાથી આસપાસના લોકો ભેગા થઈ ગયા. પોલીસ હાલ આરોપીને નીચે ઉતરવા માટે સમજાવ્યો અને તેની ધરપકડ માટે પ્રયાસો હાથ ધર્યા. જો કે, પોલીસ અને ફાયરની ટીમ દ્વારા એક કલાકથી વધુની ભારે જહેમત બાદ આરોપીને ઝડપી લેવાયો છે. સમગ્ર ઘટનામાં કોઈ દુર્ઘટના સર્જાઈ નથી.
શું છે ઘટના?
પોલીસ એક વોન્ટેડ આરોપની ધરપકડ કરવા માટે શિવમ આવાસ યોજના નામના ફ્લેટમાં પહોંચી હતી. આ આરોપીનું નામ અભિષેક તોમર હોવાનું સામે આવ્યું છે. આરોપીએ પહેલાં પોલીસથી બચવા માટે ભાગવાનો પ્રયાસ કર્યો હતો જો કે, તેમાં તે સફળ ન થતાં તે પાંચમા માળેથી ગેલેરી દ્વારા બહારના ડક પર આવી ગયો હતો. ત્યાં પહોંચ્યા બાદ કોઈ રસ્તો ન દેખાતા આરોપીએ પોલીસને ધમકી આપવાનું શરૂ કરી દીધું હતુ. આરોપીએ પોલીસને ધમકી આપી રહ્યો હતો કે, જો તમે મારી ધરપકડ કરી તો હું પાંચમા માળેથી પડતું મૂકી આત્મહત્યા કરી દઇશ.
ખોટી કલમો દાખલ કર્યાનો આરોપ
આરોપીનો આક્ષેપ છે કે, પોલીસે ફરિયાદમાં ખોટી કલમો લગાવી મને ફસાવવાનો પ્રયાસ કરી રહી છે. આરોપી ડક પર બેસીને સતત પોલીસ સાથે વાતચીત કરી રહ્યો હતો. પોલીસ અધિકારીઓના સમજાવ્યા છતાં આરોપી કોઈનું સાંભળવા તૈયાર નહતો. આરોપી એક જ વાતનું રટણ કરી રહ્યો હતો કે, જ્યાં સુધી મારી સામેની ખોટી કલમોને ફરિયાદમાંથી દૂર નહીં કરવામાં આવે ત્યાં સુધી હું હાજર નહીં થાવ. 
સાતથી વધુ ગુનામાં વોન્ટેડ જાહેર
અમદાવાદ શહેર ક્રાઇમ બ્રાન્ચની એક ટીમ કૃષ્ણનગર વિસ્તારમાં નોંધાયેલા અપહરણના કેસમાં આરોપીને પકડવા માટે ઓઢવના શિવમ આવાસ યોજના ફ્લેટમાં પહોંચી હતી. આરોપી અપહરણ અને હુમલો સહિતના ઓછામાં ઓછા સાત ગુનાહિત કેસોમાં વોન્ટેડ જાહેર કરાયો છે.
