અમદાવાદ: ભારતની ખાનગી ક્ષેત્રની સૌથી મોટી બેંક એચ.ડી.એફ.સી. તેની સી.એસ.આર. પહેલ પરિવર્તન મારફતે ગુજરાતમાં અત્યાર સુધીમાં 58.53 લાખ લોકોના જીવનમાં હકારાત્મક પરિવર્તન લાવી ચૂકી છે. પરિવર્તન પહેલ ગુજરાતમાં વર્ષ 2017થી ચાલી રહી છે. બેંકનો પરિવર્તન પ્રોગ્રામ ગ્રામ્ય વિકાસ, શિક્ષણને પ્રોત્સાહન, કૌશલ્ય વિકાસ અને આજીવિકા વધારવા પર તેમજ આરોગ્ય અને સ્વચ્છતા તથા નાણાકીય સાક્ષરતા અને સમાવેશન સહિતના પાંચ મુખ્ય ફોક્સ એરિયા પર કેન્દ્રીત છે.
બેંકે વર્ષ 2017થી આણંદ, ગાંધીનગર, પંચમહાલ, મહીસાગર, તાપી, વલસાડ, સાબરકાંઠા, નર્મદા, ખેડા, ગીર સોમનાથ, અમરેલી અને કચ્છ જિલ્લામાં એચ.આર.ડી.પી. હેઠળ 205 ગામોને આવરી લીધાં છે. આ ઉપરાંત, તેણે ગુજરાતમાં તેના ફૉકસ ડેવલપમેન્ટ પ્રોજેક્ટ હેઠળ અમદાવાદ, બનાસકાંઠા, ભાવનગર, ડાંગ, જામનગર, જૂનાગઢ, ખેડા, કચ્છ, મહીસાગર, નવસારી, પંચમહાલ, રાજકોટ, સાબરકાંઠા અને સુરેન્દ્રનગર જિલ્લાઓના 417 ગામોને આવરી લઈ રાજ્યમાં સ્થાયી વિકાસને આગળ વધાર્યો છે. આ સિવાય બેંક અરવલ્લી, પાટણ અને બનાસકાંઠા તાલુકાના સરહદી વિસ્તારોના ગામોમાં નવા પ્રોજેક્ટ્સ પણ લૉન્ચ કરવા જઈ રહી છે. ‘પરિવર્તન’ પહેલના કારણે 3.78 લાખ ખેડૂતો, 31,090 વિદ્યાર્થીઓ અને 53,830 મહિલા ઉદ્યોગસાહસિકો લાભાન્વિત થઈ રહ્યાં છે. આ પહેલની પહોંચ ગુજરાતના 33 જિલ્લાઓમાંથી 17 જિલ્લા સુધી છે.
એચડીએફસી બેંકના સી.એસ.આર.ના હેડ નુસરત પઠાણએ જણાવ્યું હતું કે, ‘એચ.ડી.એફ.સી. બેંક રાષ્ટ્રનિર્માણ માટે દ્રઢપણે કટિબદ્ધ છે અને પરિવર્તન એ દેશમાં સ્થાયી વિકાસને આગળ વધારવા અમારું યોગદાન આપવા માટેની એક પહેલ છે. એચડીએફસી બેંક પરિવર્તન પહેલ મારફતે અમે વિવિધ સમુદાયોનું સશક્તિકરણ કરીને અને જમીની સ્તરે હકારાત્મક પરિવર્તન લાવીને સામાજિક-આર્થિક વિકાસને પ્રોત્સાહન આપવા પર ધ્યાન કેન્દ્રીત કર્યું છે.
એચડીએફસી બેંકના ગુજરાત ખાતેના બ્રાન્ચ બેંકિંગ હેડ થોમસન જૉસએ જણાવ્યું હતું કે, ‘અમે સમગ્ર રાજ્યમાં સૌ કોઈને બેંકિંગ સેવાઓ સુલભ થાય તેની ખાતરી કરી અમારી બેંકિંગ સેવાઓની વ્યાપક રેન્જને પૂરી પાડવા માટે કટિબદ્ધ છીએ. અમે સમુદાયોને આગળ વધારવા માટે જરૂરી સંસાધનો, તાલીમ અને માર્ગદર્શન આપવા માટે પણ કટિબદ્ધ છીએ.’
એચડીએફસી બેંક માર્ચ 2024માં પૂરાં થતાં નાણાકીય વર્ષ દરમિયાન દેશમાં સીએસઆર પાછળ સૌથી વધુ ખર્ચ કરનારામાંથી એક હતી. 31 માર્ચ, 2024 સુધીમાં બેંકે સમગ્ર દેશમાં તેની વિવિધ સીએસઆર પહેલ પર રૂ. 945.31 કરોડ ખર્ચ્યા હતાં. આ ઉપરાંત, માર્ચ 2024 સુધીમાં બેંકે સમગ્ર ભારતમાં સંચિત રીતે 10.19 કરોડથી વધારે લાભાર્થીઓ સુધી પહોંચીને તેનું પ્રભાવક્ષેત્ર પણ વિસ્તાર્યું છે.
