મુંબઈ: ‘આનંદ’ અને ‘કોરા કાગઝ’ સહિત અનેક ફિલ્મોમાં ભજવેલી ભૂમિકા માટે જાણીતાં પીઢ અભિનેત્રી સીમા દેવનું ઘડપણ સંબંધિત બીમારીઓને કારણે આજે સવારે અહીં બાન્દ્રા ઉપનગરમાં એમનાં નિવાસસ્થાને નિધન થયું છે. તેઓ 81 વર્ષનાં હતાં. એમનાં ફિલ્મ નિર્માતા પુત્ર અભિનય દેવ તરફથી આ સમાચાર રિલીઝ કરવામાં આવ્યા છે. સીમા દેવે 80થી વધારે હિન્દી અને મરાઠી ફિલ્મોમાં અભિનય કર્યો હતો.
સીમા દેવનાં અંતિમ સંસ્કાર આજે સાંજે પાંચ વાગ્યે દાદરના શિવાજી પાર્ક સ્મશાનભૂમિ ખાતે કરવામાં આવશે.
સીમા દેવનાં અભિનેતા પતિ રમેશ દેવનું ગયા વર્ષે નિધન થયું હતું. તેઓ 93 વર્ષના હતા. એમણે પણ અનેક હિન્દી તથા મરાઠી ફિલ્મોમાં અભિનય કર્યો હતો. દંપતીના પરિવારમાં બે પુત્ર – અજિંક્ય અને અભિનય દેવ છે.
