મુંબઈઃ કોરોના વાયરસના કારણે દરેક ક્ષેત્ર પ્રભાવિત થઈ રહ્યું છે જેમાં ફિલ્મ ઈન્ડસ્ટ્રીનો પણ સમાવેશ થાય છે. કોરોના વાયરસના કહેરથી ફિલ્મ ઈન્ડસ્ટ્રી અને તેની સાથે જોડાયેલા લોકો પર ખૂબ અસર પડી છે. જો કે કોરોના વાયરસને રોકવા માટે ફિલ્મ જગત દ્વારા પણ કેટલાક પગલા ભરવામાં આવ્યા છે કે જેનાથી લોકોને કોઈ નુકસાન ન થાય.
દેશમાં કોરોના વાયરસને લઈને સરકારે થિયેટર્સને બંધ કરાવી દીધા છે. ત્યારે ફિલ્મ કલેક્શનમાં પણ ખૂબ મોટી અસર પડી છે. અત્યાર સુધીમાં દિલ્હી, મુંબઈ, રાજસ્થાન, કેરળ સહિત ઘણી જગ્યાએ થીયેટર્સ બંધ કરી દેવામાં આવ્યા છે. લોકોને એક જગ્યાએ ભેગા થતા રોકવા માટે પગલા ભરવામાં આવ્યા છે.
કોરોના વાયરસના ડરથી ફિલ્મ અને ટીવી સીરિયલના શૂટિંગ પ્રભાવિત થઈ રહ્યા છે. તમામ શૂટિંગ કેન્સલ થઈ ગયા છે કે જેમાં વિદેશમાં ઘણા સિન શૂટ કરવાના હતા. આ સિવાય કાર્તિક આર્યન સ્ટારર ફિલ્મ ભૂલ-ભૂલૈયા-2 અને રણબીર કપૂર, અમિતાભ બચ્ચન સ્ટારર ફિલ્મ બ્રહ્માસ્ત્રનું શૂટિંગ રોકી દેવામાં આવ્યું છે. આ સાથે જ અન્ય પણ ઘણા પ્રોજેક્ટને રોકી દેવામાં આવ્યા છે.
ઈન્સ્ટાગ્રામ પર ઘણા એવા પીક શેર કરવામાં આવી રહી છે કે જેમાં ફિલ્મના સેટ પર લોકો માસ્ક લગાવીને કામ કરી રહ્યા છે. કાર્તિક આર્યન, અભિષેક બચ્ચન, કૃતિ ખરબંદા, પૂજા હેગડેએ માર્ક પહેરેલો પોતાનો ફોટો શેર કર્યો છે. તો ઘણી ટીવી સિરીયલના સેટ્સ પરથી પણ આ પ્રકારના ફોટોગ્રાફ્સ સામે આવી રહ્યા છે કે જેમાં કાસ્ટ અને ક્રૂ મેમ્બર માસ્ક લગાઈને આવ્યા હોય તેવું દેખાઈ આવે છે.
