આ વર્ષે બોલીવૂડ હસ્તીઓની દિવાળી ઓછી ધામધૂમવાળી

મુંબઈઃ હિન્દી ફિલ્મ ઉદ્યોગની હસ્તીઓ 14 નવેમ્બર, શનિવારે દિવાળી તહેવારને ઉજવવા સજ્જ બની છે, પરંતુ આ વવર્ષની દિવાળી ઉજવણીમાં ધામધૂમ ઓછી હશે. ઘણાં કલાકારોએ કોરોના વાઈરસને લગતા નિયંત્રણોને કારણે સાત મહિના બાદ એમની ફિલ્મી પ્રવૃત્તિઓ ફરી શરૂ કરી છે અને તેઓ દિવાળી પર્વના અઠવાડિયાના દિવસોમાં પણ કામ કરી રહ્યાં છે. તેથી આ વખતે દિવાળીની ઉજવણી એમનાં શૂટિંગ લોકેશન્સ ખાતે જ કરી લેશે.

કોરોના વાઈરસ રોગચાળો હજી સંપૂર્ણપણે દૂર થયો નથી, તેથી આ વર્ષે બોલીવૂડમાં ઘણી મોટી દિવાળી પાર્ટીઓને રદ કરી દેવામાં આવી છે. ઘણી હસ્તીઓએ આ વર્ષે દિવાળી તહેવાર પોતપોતાનાં સ્વજનો સાથે સાદાઈથી ઉજવવાનું નક્કી કર્યું છે. કરીના કપૂર-ખાન અને સૈફ અલી ખાન એમનાં પુત્ર તૈમુરની સાથે હિમાચલ પ્રદેશના ધર્મશાલામાં કુદરતી સાંન્નિધ્યમાં દિવાળીની ઉજવણી કરવા ગયાં છે. સૈફ અલી ખાન એ જ સ્થળે એની નવી ફિલ્મ ‘ભૂત પોલીસ’નું શૂટિંગ કરી રહ્યો છે. કરીના પુત્ર તૈમુરની સાથે ધર્મશાલા જવા મુંબઈથી રવાના થઈ છે.

સંજય દત્ત એના પરિવારજનો સાથે દુબઈ ગયો છે. ત્યાં પણ કોરોના નિયંત્રણો લાગુ હોવાથી એમની દિવાળીની ઉજવણી જરાય ઝાકઝમાળભરી નહીં હોય. એવી જ રીતે, અભિનેત્રી દીપિકા પદુકોણ પણ આ વખતે દિવાળી સાદાઈપૂર્વક ઉજવવાનાં છે. એ ઘરમાં જ રહેવાની છે અને પરિવારજનો સાથે એક સિમ્પલ પૂજા કરવાની છે. ટાઈગર શ્રોફ અને એની ગર્લફ્રેન્ડ દિશા પટની હાલ માલદીવ ગયાં છે અને ત્યાં જ દિવાળી ઉજવશે. એમની સાથે ત્યાં કદાચ ટાઈગરની બહેન ક્રિષ્ના અને એનો બોયફ્રેન્ડ એબન હેમ્સ પણ જોડાશે.

[ અમને ફોલો કરો:    Facebook   | Twitter   | Instagram  | Telegram 

તમારા મોબાઇલમાં 9820649692 આ નંબર Chitralekha નામે સેવ કરી અમને વ્હોટસએપ પર તમારું નામ અને ઈ-મેઈલ લખીને મોકલો અને તમને મનગમતી વાંચન સામગ્રી મેળવો .]