અમદાવાદઃ ભારત-પાકિસ્તાન વચ્ચે સંઘર્ષવિરામ અને પ્રોત્સાહક વૈશ્વિક સંકેતોને પગલે ઘરેલુ શેરબજારમાં આગઝરતી તેજી થઈ હતી. નિફ્ટીમાં ત્રણ વર્ષની સૌથી મોટી ઇન્ટ્રા-ડે તેજી જોવા મળી હતી. મિડકેપ અને સ્મોલકેપ ઇન્ડેક્સ ચાર ટકાથી વધુની તેજી થઈ હતી. BSEના બધા સેક્ટર ઇન્ડેક્સમાં તેજી જોવા મળી હતી. IT ઇન્ડેક્સમાં પાંચ વર્ષની સૌથી મોટી ઇન્ટ્રા-ડે તેજી થઈ હતી. નિફ્ટી બેન્ક અને ઓટો ઇન્ડેક્સ ત્રણ ટકાથી વધુ વધ્યા હતા. રોકાણકારોની એક દિવસમાં ચાર વર્ષની સૌથી મોટી કમાણી થઈ હતી. રોકાણકારોની સંપત્તિમાં રૂ. 16 લાખ કરોડનો વધારો થયો હતો.
બીજી બાજુ અમેરિકા અને ચીન વચ્ચેનું ટ્રેડ અને ટેરિફ વોર 90 દિવસ સુધી ટાળવામાં આવતાં પણ સેન્ટિમેન્ટ તેજીતરફી થયું હતું. સેન્સેક્સ 2975 પોઇન્ટની તેજી સાથે 82,430ના મથાળે બંધ થયો હતો. નિફ્ટી 917 પોઇન્ટ ઊછળી 24,925ના સ્તરે બંધ થયો હતો. નિફ્ટી બેન્ક 1788 પોઇન્ટની તેજી સાથે 55,383ના મથાળે બંધ થયો હતો, જ્યારે નિફ્ટી મિડકેપ ઇન્ડેક્સ 2193 પોઇન્ટની તેજી સાથે 55,416ના સ્તરે બંધ થયો હતો. ટેરિફના નિર્ણય પછી IT અને મેટલ શેરોમાં તેજી થઈ હતી. નિફ્ટી ITમાં સૌથી વધુ સાત ટકાની તેજી થઈ હતી, જે ઇન્ડેક્સ માટે પાંચ વર્ષની સૌથી મોટી તેજી હતી.ફેબ્રુઆરી, 2021 પછી સૌપ્રથમ વાર સેન્સેક્સ અને નિફ્ટી એક દિવસમાં ચાર ટકાની તેજી સાથે બંધ થા હતા. BSEમાં લિસ્ટેડ કેપિટલાઇઝેશનમાં રૂ. 16 લાખ કરોડનો વધારો થયો હતો. એ સાથે નિફ્ટી અને સેન્સેક્સ સાત મહિનાના ઊંચા સ્તરે પહોંચ્યા હતા, જે હવે વર્ષ 2025નું સૌથી ટોચનું સ્તર છે.
BSE પર કુલ 4254 શેરોમાં કામકાજ થયાં હતાં. એમાં 3545 શેરો તેજી સાથે બંધ થયા હતા અને 576 શેરોમાં ઘટાડો થયો હતો. આ સાથે 133 શેરો સપાટ બંધ થયા હતા. આ સિવાય 110 શેરોએ નવી 52 સપ્તાહની ઊંચી સપાટી સર કરી હતી, જ્યારે 48 શેરોએ 52 સપ્તાહના નવા નીચલા સ્તરે સ્પર્શ્યા હતા. આ સાથે 12 શેરોમાં અપર સરકિટ લાગી હતી, જ્યારે 9 શેરોમાં લોઅર સરકિટ લાગી હતી.
