ભારતમાં જાહેર ક્ષેત્રની સૌથી મોટી બેન્ક, સ્ટેટ બેન્ક ઓફ ઈન્ડિયાએ દેશમાં સૌપ્રથમ એવી પોતાની ઈન્ટીગ્રેટેડ લાઈફસ્ટાઈલ અને બેન્કિંગ ડિજિટલ એપ્લિકેશન 23 નવેમ્બર, ગુરુવારે મુંબઈમાં લોન્ચ કરી છે. આ એપ અથવા ડિજિટલ પ્લેટફોર્મનું નામ છે ‘યૂ ઓન્લી નીડ વન’. આ એપને YONO તરીકે પણ ઓળખાવાય છે. મુંબઈમાં એસબીઆઈના મુખ્યાલયમાં એસબીઆઈના ચેરમેન રજનીશ કુમારે આ એપ પત્રકાર પરિષદમાં લોન્ચ કરી હતી. આ એપ મારફત યૂઝર્સ અનેક પ્રકારની નાણાકીય સેવાઓનો લાભ લઈ શકશે તેમજ અનેક પ્રકારની ખરીદી કરી શકશે. આ એપ મારફત યૂઝર્સ સિંગલ પાસવર્ડ લોગિનથી લાઈફસ્ટાઈલ તેમજ ફાઈનાન્સિયલ સેવાઓનો લાભ લઈ શકશે. આ એપ એન્ડ્રોઈડ, આઈઓએસ અને વેબ પર ઉપલબ્ધ છે. યૂઝર ડિજિટલ રીતે પાંચ મિનિટમાં જ એસબીઆઈમાં એકાઉન્ટ ખોલાવી શકશે. ચાર ક્લિકમાં ફંડ ટ્રાન્સફર કરી શકશે. આ એપમાં 60 ઈ-કોમર્સ કંપનીઓ સામેલ છે.