ટોચની બોલીવૂડ અભિનેત્રી દીપિકા પદુકોણે 5 જાન્યુઆરી, રવિવારે પોતાનો 34મો જન્મદિવસ ઉજવ્યો.
સવારે મુંબઈ એરપોર્ટ ખાતે દીપિકા એનાં અભિનેતા પતિ રણવીર સિંહ સાથે આવી ત્યારે ત્યાં હાજર એનાં એક પ્રશંસકે એને કેક ખવડાવી હતી. દીપિકાએ તે ખાધી હતી અને રણવીરને પણ ખવડાવી હતી. બાદમાં બંને જણ ફ્લાઈટમાં બેસીને લખનઉ ગયાં હતાં.
એરપોર્ટ પર બર્થડે કેક કટિંગ કાર્યક્રમ વખતે રણવીર સિંહે એના સ્પીકર્સ કાઢ્યા હતા અને સૌથી લોકપ્રિય બર્થડે ગીત વગાડ્યું હતું 'બાર બાર દિન યે આયે'... એણે પોતે પણ ગીત ગાયું હતું એમની સાથે ત્યાં હાજર રહેલા પ્રેસ ફોટોગ્રાફરો અને મિડિયાકર્મીઓ પણ જોડાયા હતા.
આગામી હિન્દી ફિલ્મ 'છપાક'ની ટીમ તરફથી દીપિકાનો બર્થડે ઉજવવામાં આવ્યો હતો અને દીપિકાએ એને ખૂબ ભાવતી ચોકલેટ બર્થડે કેક કાપી હતી. એ પ્રસંગે ફિલ્મનાં નિર્દેશિકા મેઘના ગુલઝાર તથા અન્યો પણ ઉપસ્થિત રહ્યાં હતાં. 'છપાક' ફિલ્મ 10 જાન્યુઆરીએ રિલીઝ થવાની છે.
