ગાઝિયાબાદઃ ભોજપુરી અભિનેત્રી આકાંક્ષા દુબે વારાણસીની એક હોટેલની રૂમમાં ગળાફાંસો ખાધેલી હાલતમાં મૃત મળી આવ્યાને અમુક દિવસો વીતી ગયા બાદ આજે સવારે પોલીસે આકાંક્ષાનાં બોયફ્રેન્ડ અને ગાયક સમર સિંહની ગાઝિયાબાદમાં ધરપકડ કરી છે. તે ઉપરાંત સમરના ભાઈને પકડવા માટે પોલીસે લૂકઆઉટ નોટિસ બહાર પાડી છે.
સમર સિંહ પર આરોપ છે કે એણે આકાંક્ષાને આત્મહત્યા કરવા માટે મજબૂર કરી હતી. ગઈ 26 માર્ચે આકાંક્ષા મૃત્યુ પામી એ દિવસથી સમર સિંહ ફરાર હતો. આકાંક્ષાની માતાએ પોલીસમાં ફરિયાદ નોંધાવી છે અને તેની દીકરીનાં મૃત્યુ માટે સમર સિંહ અને એનો ભાઈ સંજય સિંહ જવાબદાર હોવાનો આરોપ મૂક્યો છે.
માતાનો આરોપ છે કે સમર અને સંજય આકાંક્ષાને હેરાન કરતાં હતાં. સમર એની મારપીટ કરતો હતો અને સંજયે એને જાનથી મારી નાખવાની ધમકી આપી હતી. 25 વર્ષીય આકાંક્ષાનાં પોસ્ટ-મોર્ટમ રિપોર્ટમાં જાણવા મળ્યું છે કે એનાં પેટમાં કોઈક અજ્ઞાત પ્રવાહી હતું અને એનાં હાથનાં કાંડા ઉપર અમુક ઈજાનાં નિશાન પણ મળી આવ્યા હતા.
