રથયાત્રા નજીકમાં, ગુજરાતને હાથી મોકલવા મુદ્દે આસામ અને કેન્દ્રને કોર્ટ નોટિસ

0
1521

ગુવાહાટીઃ જુલાઈમાં યોજાનારી રથયાત્રા માટે ચાર હાથીઓને તિનસુકિયાથી અમદાવાદ મોકલવા બાબતે ગુવાહાટી હાઈકોર્ટે કેન્દ્ર સરકાર અને આસામની રાજ્ય સરકારને નોટિસ પાઠવીને સ્પષ્ટતા માગી છે. એનિમલ એક્ટિવિસ્ટ તરફથી આ હાથીઓને મોકલવાના સરકારના નિર્ણયને પડકારતી પિટિશન કરવામાં આવી હતી.

આ પિટિશનની સુનાવણીમાં હાઈ કોર્ટે સુપ્રીમ કોર્ટે આપેલા ઓર્ડરને ટાંકી સ્પષ્ટતા માગી છે. અગાઉ સુપ્રીમ કોર્ટે એક ઓર્ડરમાં હાથીની રાજ્યબહાર હેરફેર કે ટ્રાન્સફરની મનાઈ ફરમાવેલી છે.

આ ઉપરાંત ગુજરાતનું વાતાવરણ તથા ટ્રેનની સફર હાથીના સ્વાસ્થ્ય માટે ખાસ અનુકૂળ ન હોવાની બાબત પણ પિટિશનરના વકીલે કોર્ટ સામે મૂકી છે. પિટિશન સાથેની એફિડેવિટમાં એ તરફ પણ ધ્યાન દોરવામાં આવ્યું છે કે ગુજરાતના જગન્નાથ મંદિરનો હાથીઓની સાચવણી બાબતેનો રેકોર્ડ ખાસ સરાહનીય નથી. અત્યારે તો સરકારના આદેશ પ્રમાણે ચાર હાથીઓ છ મહિના માટે ગુજરાતને આપવામાં આવશે એ પછી આસામને પરત કરાશે.