રાજસ્થાનનું પ્રખ્યાત હિલ સ્ટેશન માઉન્ટ આબુ હવે ચર્ચાનો વિષય બન્યું છે. મંગળવારે વિધાનસભામાં માઉન્ટ આબુનું નામ બદલી ‘આબુ રાજ તીર્થ’ રાખવાની માંગ કરવામાં આવી હતી. રાજ્ય સરકારના મંત્રી ઓટારામ દેવાસીએ આ મુદ્દો ઉઠાવતા આ સ્થળને પવિત્ર તીર્થસ્થાન જાહેર કરવાની અપીલ કરી હતી. સાથે જ માંસ અને દારૂના વેચાણ પર પ્રતિબંધ મુકવાની પણ માંગ કરવામાં આવી છે.
મંત્રીએ કહ્યું કે માઉન્ટ આબુ પ્રાચીન કાળથી સનાતન ધર્મની આસ્થાનું કેન્દ્ર રહ્યું છે. તેઓએ દલીલ કરી કે અગાઉ આ સ્થળ ‘આબુ રાજ તીર્થ’ તરીકે ઓળખાતું હતું, પરંતુ પાછળથી તેનું નામ બદલીને માઉન્ટ આબુ કરવામાં આવ્યું. અહીં 33 કરોડ દેવ-દેવીતાઓનો વાસ છે, અને તે એક પવિત્ર તીર્થસ્થાન તરીકે પ્રખ્યાત છે. તેથી, આ સ્થળને તેના પ્રાચીન નામથી ઓળખવું જોઈએ.
માઉન્ટ આબુ રાજસ્થાનનું એકમાત્ર હિલ સ્ટેશન છે અને દર વર્ષે મોટી સંખ્યામાં પ્રવાસીઓ અહીં આવી પહોંચે છે. અહીં ગુરુ શિખર, દેલવારા જૈન મંદિર, અર્બુદા માતા મંદિર અને ભગવાન દત્તાત્રેય મંદિર જેવા મહત્વના ધાર્મિક સ્થળો આવેલા છે. મંત્રીએ દલીલ કરી કે આ સ્થળ પર ખુલ્લેઆમ દારૂ અને માંસ વેચાય છે, જે ભક્તોની ધાર્મિક ભાવનાઓને ઠેસ પહોંચાડે છે. તેથી, દારૂ-માંસના વેચાણ પર સંપૂર્ણ પ્રતિબંધ મૂકવો જોઈએ. માઉન્ટ આબુનું નામ બદલવા અને દારૂ-માંસના વેચાણ પર પ્રતિબંધ મૂકવાની માંગણી બાદ રાજકીય અને સામાજિક વર્તુળોમાં ભારે ચર્ચાઓ શરૂ થઈ ગઈ છે. હવે પ્રશ્ન એ છે કે રાજસ્થાન સરકાર આ અંગે શું નિર્ણય લેશે.
