Home Blog Page 397

વિદ્યાર્થીઓને ગજનવીની ક્રૂરતા વધુ ઊંડાણપૂર્વક NCERTની પુસ્તિકામાં બતાવાશે

નવી દિલ્હીઃ મહેમૂદ ગજનવીએ ભારત પર કેટલા હુમલા કર્યા? કેટલીવાર ખજાના લૂટ્યા? કેટલાં મંદિરોને તોડ્યાં? NCERTએ આ તમામ મુદ્દાઓ પર આધારિત નવો પાઠ તૈયાર કર્યો છે, જેને હવે ધોરણ સાતના વિદ્યાર્થીઓ ભણશે. તાજેતરમાં રિલીઝ થયેલી NCERT ધોરણ સાતની સોશિયલ સાયન્સની નવી પુસ્તિકામાં ‘ગજનવીના હુમલા’ પરનો વિભાગ વધારે વિસ્તૃત બનાવવામાં આવ્યો છે, જેથી વિદ્યાર્થીઓને મહેમૂદ ગજનવી વિશે વિગતવાર માહિતી મળી શકશે. પહેલી પુસ્તિકામાં તેનો માત્ર એક નાનો પરિચ્છેદ જ હતો.

મહેમૂદ ગજનવીએ ભારત પર કેટલા હુમલા કર્યા?

નવી પુસ્તિકામાં જણાવવામાં આવ્યું છે કે મહેમૂદ ગજનવીએ ભારત પર 17 વાર હુમલો કર્યા હતા. દરેક વખતે તે શહેરોને લૂંટી ખજાનો લઈને પાછો ચાલ્યો જતો હતો. આ પુસ્તિકામાં મથુરા, કન્નૌજ અને સોમનાથ પર કરેલાં હુમલા અને લૂંટફાટ વિશે વિગતવાર લખાયું છે.

ગજનવીએ મંદિરોને બનાવ્યાં નિશાન

ધોરણ સાતની નવી પુસ્તિકા કહે છે કે પોતાની શક્તિ વધારવા અને સંપત્તિ એકઠી કરવા માટે તેણે મંદિરોને નિશાન બનાવ્યાં. ‘ગજનવીના હુમલા’ નામનો આ નવો વિભાગ છ પાનાંનો છે, જેમાં ચિત્રો અને જાણકારીના બોક્સ સામેલ છે. તેમાં મથુરા, કન્નૌજ અને ગુજરાતના સોમનાથ મંદિર પર થયેલાં અભિયાનોની વિગતો આપવામાં આવી છે.

આ પુસ્તિકામાં વધુમાં જણાવવામાં આવ્યું છે કે આજનું સોમનાથ મંદિર 1950માં ફરીથી બનાવવામાં આવ્યું હતું અને તેની ઉદઘાટન વિધિ રાષ્ટ્રપતિ ડો. રાજેન્દ્ર પ્રસાદે કરી હતી – સાથે જ વિદ્યાર્થીઓને વિચાર કરાવવામાં આવ્યું છે કે તે માટે જનતાથી દાન શા માટે લેવામાં આવ્યું હશે.

હિંસા અને ધાર્મિક કારણો

આ પુસ્તિકા મહેમૂદના હુમલાઓનાં ક્રૂર પરિણામો બતાવવામાં અચકાતી નથી. તેમાં ‘હજારો સામાન્ય લોકોનો હત્યાકાંડ’ અને બાળકો સહિતના કેદીઓને પકડીને મધ્ય એશિયાનાં ગુલામ બજારોમાં વેચી દેવાના ઉલ્લેખ છે.

રાજ્ય સરકારનો મહત્વપૂર્ણ નિર્ણય, હોમગાર્ડઝ જવાનોની વયનિવૃત્તિ ૫૮ વર્ષ કરાઈ

ગાંધીનગર: રાજ્યના મુખ્યમંત્રી ભૂપેન્દ્ર પટેલના દિશાનિર્દેશ હેઠળ નાયબ મુખ્યમંત્રી હર્ષ સંઘવીએ આજે હોમગાર્ડ જવાનોની નિવૃત્તિ વયમર્યાદામાં ત્રણ વર્ષનો વધારો કરવા અંગે એક મહત્વપૂર્ણ નિર્ણય લીધો છે. રાજ્ય સરકારે મુંબઇ હોમગાર્ડ્ઝ રૂલ્સ, ૧૯૫૩ના નિયમ- ૯માં આ અંગે સુધારો કરવા નિર્ણય લીધો છે. જેને પરિણામે હવે હોમગાર્ડઝ સભ્યોની નિવૃત્તિ વયમર્યાદા ૫૫ વર્ષથી વધારીને ૫૮ વર્ષ થશે. બૃહદ મુંબઇ રાજ્યમાં ૬ઠ્ઠી ડીસેમ્બર, ૧૯૪૭ના રોજ પોલીસની મદદમાં કાયદો અને વ્યવસ્થા જાળવવાના હેતુસર તેમજ કુદરતી અને માનવસર્જિત આપત્તિઓમાં આંતરિક સુરક્ષા માટે હોમગાર્ડઝ દળની રચના કરવામાં આવી હતી.નાયબ મુખ્યમંત્રી હર્ષ સંઘવીએ જણાવ્યું છે કે, રાજ્યમાં આ દળ પોલીસના પૂરક બળ તરીકે ઉત્તમ કામગીરી કરી રહ્યું છે. હોમગાર્ડઝના જવાનો માનદ સેવા આપીને ચૂંટણી બંદોબસ્ત, ટ્રાફિક ફરજો, રાત્રી પેટ્રોલિંગ, વી.આઈ.પી. બંદોબસ્ત, ધાર્મિક/મેળા બંદોબસ્ત સહિતની દૈનિક તમામ ફરજો પોલીસ સાથે ખંતપૂર્વક નિભાવે છે. આ નિર્ણયથી હોમગાર્ડઝ સભ્યોમાં રાષ્ટ્ર-સેવા કરવા માટેનો જુસ્સો વધશે, અને તેઓ વધુ ત્રણ વર્ષ માટે પોતાની ફરજો નિષ્ઠાપૂર્વક બજાવી શકશે.

આ નિર્ણયથી હોમગાર્ડઝ સભ્યોને વધુ ત્રણ વર્ષ રાષ્ટ્ર અને સમાજની સેવા કરવાનો મોકો મળશે. એટલું જ નહીં, હોમગાર્ડઝના સભ્યો માનદ હોય છે અને તેમના પર કૌટુંબિક જવાબદારીઓ હોય છે. નિવૃત્તિ વયમર્યાદા વધવાથી તેઓ વધુ સારી રીતે પોતાની કૌટુંબિક અને સામાજિક જવાબદારીઓ નિભાવી શકશે. હોમગાર્ડ્ઝ સભ્યો ક્ષેત્રીય કક્ષાએ ભૌગોલિક અને સામાજિક રીતે લોકો સાથે જોડાયેલા હોવાથી, તેઓ રાજ્યની કાયદો અને વ્યવસ્થાની કામગીરી વધુ સારી રીતે પાર પાડવા પોલીસને વધુ મદદ કરી શકશે.

PMAY કૌભાંડ: ઘર ખરીદદારો સાથે 222 કરોડ રૂપિયાની છેતરપિંડી

નવી દિલ્હીઃ પ્રધાન મંત્રી આવાસ યોજના (PMAY)માં થયેલી છેતરપિંડી અને મની લોન્ડરિંગના મામલે ED ટૂંક સમયમાં ઓસિયન સેવન બિલ્ડટેક (Ocean Seven Buildtech Pvt. Ltd- OSBPL) અને તેના વડા સામે ચાર્જશીટ દાખલ કરે એવી શક્યતા છે.

EDના જણાવ્યાનુસાર કંપનીના MD સ્વરાજ સિંહ યાદવે ખોટી પદ્ધતિઓ અપનાવીને 222 કરોડ રૂપિયાની ગેરરીતિઓ આચરી હતી. પ્રાપ્ત માહિતી મુજબ EDએ આરોપ લગાવ્યો છે કે યાદવે PMAY હેઠળ ઘર ખરીદદારો પાસેથી વસૂલી થયેલી રકમ યોજનાના હેતુઓથી વિરુદ્ધ શેલ કંપનીઓ મારફતે બહાર મોકલી દીધી. આરોપ મુજબ કંપનીએ એક જ ફ્લેટને વારંવાર વધુ કિંમતમાં વેચીને અને કેશ પ્રીમિયમ તરીકે મોટી રકમ વસૂલ કરીને –ડબલ કિંમત વસૂલ કરી હતી.

PMAYને નામે છેતરપિંડી

તપાસ એજન્સી કહે છે કે PMAYના એક ફ્લેટની કિંમત લગભગ 26.5 લાખ રૂપિયા નક્કી કરવામાં આવી હતી, પરંતુ ચુકવણી ન થયાને બહાને કંપનીએ ખરીદદારોનું એલોટમેન્ટ રદ કર્યું અને એ જ ફ્લેટને 40–50 લાખ રૂપિયામાં ફરીથી વેચી દેવામાં આવ્યો. વળી, પહેલા ખરીદદારોને પૈસા પરત પણ આપવામાં આવ્યા નથી.

EDએ વધુમાં જણાવ્યું કે યાદવે પાર્કિંગની વેચાણ પ્રક્રિયામાં પણ બેન્કિંગ ચેનલની બહાર રોકડ પ્રીમિયમ લેવા જેવી ગેરરીતિ અપનાવી હતી. તપાસમાં વધુમાં બહાર આવ્યું કે યાદવે પોતાની પત્નીના બેન્ક ખાતા મારફતે હવાલા પદ્ધતિથી અમેરિકા પૈસા ટ્રાન્સફર કર્યા હતા.

MD સ્વરાજ સિંહની ધરપકડ

EDએ યાદવને 13 નવેમ્બરે ધરપકડ કરી હતી અને ત્યાર બાદ તેને ન્યાયિક કસ્ટડીમાં મોકલાયો છે. EDનું કહેવું છે કે યાદવે છેલ્લા કેટલાક દિવસોમાં ગુડગાંવ, મહારાષ્ટ્ર અને રાજસ્થાનમાં પોતાની વ્યક્તિગત તેમ જ કંપનીની મિલકતો ઝડપથી વેચવાનો પ્રયત્ન કર્યો હતો, જેથી ગેરકાયદે કમાણી સુરક્ષિત રહી શકે. એજન્સી કંપની અને તેના પ્રમોટરોની મિલકતનું મૂલ્યાંકન કરી રહી છે. જેથી મની લોન્ડરિંગ કાયદા હેઠળ જપ્ત કરી શકાય અને ભવિષ્યમાં પીડિતોને નુકસાનની ભરપાઈ કરવામાં મદદ મળી શકે.

ગૌરવ ગાથા અને સ્વાવલંબનનું પ્રતિક બન્યું ખાદી

ગાંધીનગર: ગાંધીજીના સ્વદેશી અને આત્મનિર્ભરતાના વિચારનું જીવંત સ્વરૂપ એટલે ‘ખાદી’. રાજ્યમાં ખાદીને પ્રોત્સાહન આપવા રાજયની સ્થાપનાથી ‘ગુજરાત રાજ્ય ખાદી ગ્રામોદ્યોગ બોર્ડ’ની રચના એક વૈધાનિક બોર્ડ તરીકે કરવામાં આવી હતી. રાજ્યમાં ખાદી પ્રવૃત્તિ સાથે સંકળાયેલી વિવિધ સંસ્થાઓ દ્વારા છેલ્લા ત્રણ વર્ષ એટલે કે વર્ષ ૨૦૨૨-૨૩થી ૨૦૨૪-૨૫ દરમિયાન રૂ. ૧,૭૦૦ કરોડથી વધુનું વેચાણ કરીને સ્વદેશી અભિયાનમાં વિશેષ સિદ્ધિ હાંસલ કરી છે. જેમાં વર્ષ ૨૦૨૪-૨૫માં અંદાજે રૂ. ૬૮૩ કરોડથી વધુ ખાદી ઉત્પાદનોનું વેચાણ કરવામાં આવ્યું છે. જે દર્શાવે છે કે,  ખાદી ઉત્પાદન પ્રવૃત્તિ ક્ષેત્રે સંકળાયેલા હજારો કાંતનાર-વણનાર કારીગરોને સતત રોજગારી મળી રહી છે.વડાપ્રધાન નરેન્દ્રભાઈ મોદીના માર્ગદર્શનમાં દેશભરમાં ’હર ઘર સ્વદેશી, ઘર ઘર સ્વદેશી’ અભિયાન ચાલી રહ્યું છે. ત્યારે મુખ્યમંત્રી ભૂપેન્દ્ર પટેલના નેતૃત્વમાં ગુજરાત સમગ્ર દેશમાં ખાદીનું વેચાણ કરનાર રાજ્ય તરીકે અગ્રેસર બની રહ્યું છે. ખાદી બોર્ડ સાથે સંકળાયેલી સંસ્થાઓ દ્વારા ગ્રામીણ કારીગરોને રોજગારી પૂરી પાડીને તેમજ વિરાસતરૂપી આ કળાને જીવંત રાખીને રાજ્યના આર્થિક-સામાજિક વિકાસમાં ખુબ જ મહત્વનું યોગદાન આપવામાં આવી રહ્યું છે.

આજે આધુનિક યુગમાં પણ યુવાઓની પહેલી પસંદ ખાદી રહી છે, ત્યારે ગાંધીજીની જન્મજયંતિની ઉજવણીના ભાગરૂપે ઓક્ટોબરથી ડિસેમ્બરના ત્રિમાસિક ગાળા દરમિયાન ૧૦ ટકા ઉપરાંત વધારાનું ૨૦ ટકા બજાર પ્રોત્સાહન સંસ્થાઓને આપવામાં આવે છે. આ પ્રોત્સાહન, સંસ્થાએ છૂટક વેચાણ દરમિયાન ગ્રાહકોને આપવાનું હોય છે. જેથી આમ નાગરિકોને ખાદી ઉત્પાદનો મૂળ કિંમત પર ૩૦ ટકાના ડિસ્કાઉન્ટ ભાવે મળે છે. જેના પરિણામે મોટા પ્રમાણમાં નાગરિકો ખાદી ખરીદવા આકર્ષાય છે.આ ઉપરાંત રાજ્ય સરકાર દ્વારા ખાદી ઉત્પાદન સાથે સંકળાયેલી માન્ય સંસ્થાઓને અન્ય યોજનાઓ દ્વારા પણ વિવિધ સહાય આપવામાં આવે છે. આમ, ખાદી, કુટીર અને ગ્રામોદ્યોગ મંત્રી નરેશભાઇ પટેલ અને રાજ્ય મંત્રી સ્વરૂપજી ઠાકોરના સબળ નેતૃત્વમાં રાજ્ય સરકાર દ્વારા ખાદીના ઉત્પાદન અને ઉપયોગને પ્રોત્સાહન આપીને આત્મનિર્ભર ગુજરાત થકી આત્મનિર્ભર ભારતના સંકલ્પને વધુ મજબૂત અને સુદ્રઢ કરવામાં આવી રહ્યો છે.

ખાદી એન્ડ વિલેજ ઇન્ડસ્ટ્રીઝ કમિશન–KVIC માન્ય ખાદી સંસ્થાના વેચાણ કેન્દ્રો દ્વારા સુતરાઉ, સિલ્ક, વૂલન અને પોલીવસ્ત્ર ખાદી તેમજ સાડી, ધોતી-કુર્તા, જેકેટ, શાલ, હેન્ડીક્રાફ્ટ જેવી વિવિધ વસ્તુઓનું વેચાણ પણ કરવામાં આવે છે.

આજે ગુજરાતની ખાદી ફક્ત ગુજરાતમાં જ નહીં, પરંતુ સમગ્ર દેશ અને વિદેશમાં પણ પોતાની ગુણવત્તા અને ડિઝાઇન માટે જાણીતી બની છે. દરેક ગુજરાતીના મનમાં ખાદી પ્રત્યે વિશેષ ગૌરવની અને સ્વાભિમાનની લાગણી છે, તેમ ખાદી બોર્ડની યાદીમાં જણાવાયું છે.

મહારાષ્ટ્ર, મધ્ય પ્રદેશ અને છત્તીસગઢ ઝોન નક્સલ મુક્ત

નવી દિલ્હી: કુખ્યાત નક્સલી કમાન્ડર રામધેર મજ્જીએ આજે સવારે છત્તીસગઢના બકરકટ્ટામાં આત્મસમર્પણ કર્યું છે. રામધેર મજ્જી હિડમાના સમકક્ષનો નક્સલી માનવામાં આવે છે. તેની સાથે 12 અન્ય ખતરનાક નક્સલીઓએ પણ આત્મસમર્પણ કર્યું છે. સેન્ટ્રલ કમિટી સભ્ય (CCM) રામધેર મજ્જી પર એક કરોડ રૂપિયાનું ઇનામ હતું. આ નક્સલીઓના આત્મસમર્પણ સાથે મહારાષ્ટ્ર, મધ્ય પ્રદેશ અને છત્તીસગઢ ઝોન સંપૂર્ણપણે નક્સલ મુક્ત બની ગયું છે.

આત્મસમર્પણ કરનારા નક્સલીઓમાં રામધેર મજ્જી સિવાય ત્રણ ડિવિઝનલ વાઇસ કમાન્ડર અને અન્ય મુખ્ય સભ્યોનો સમાવેશ થાય છે. તેમની પાસેથી AK-47, INSAS અને SLR જેવાં ઘાતક હથિયારો પણ જપ્ત કરવામાં આવ્યાં છે.

નોર્થ બસ્તર ડિવિઝનમાં સક્રિય હતો મજ્જી

પ્રાપ્ત માહિતી અનુસાર રામધેર મજ્જી નોર્થ બસ્તર ડિવિઝનમાં સક્રિય હતો. તેણે ખૈરાગઢના કુમ્હી ગામ, બર્કટ્ટા પોલીસ સ્ટેશનમાં પોલીસ સમક્ષ આત્મસમર્પણ કર્યું હતું. તેની સાથે ડિવિઝનલ કમિટી મેમ્બર (DVCM) રેન્કના ચંદુ ઉસેંડી, લલિતા, જાનકી, પ્રેમ જેવા ખતરનાક નક્સલીઓએ પણ પોલીસ સમક્ષ હથિયાર મૂક્યા હતા. આમાંથી બે નક્સલીઓ પાસે AK-47 અને INSAS જેવાં હથિયારો હતાં. એ ઉપરાંત એરિયા કમિટી મેમ્બર (ACM) સ્તરના નક્સલી રામસિંહ દાદા, સુકેશ પોટ્ટમે પણ આત્મસમર્પણ કર્યું. જ્યારે પાર્ટી મેમ્બર (PM) લક્ષ્મી, શીલા, યોગિતા, સાગર અને કવિતાએ પણ પોલીસ સમક્ષ સમર્પણ કર્યું. પોલીસ આ તમામ નક્સલીઓની પૂછપરછ કરી રહી છે જેથી તેમના નેટવર્ક અને પ્રવૃત્તિઓ અંગે વધુ માહિતી મળી શકે.

31 માર્ચ, 2026 સુધીનો લક્ષ્યાંક

કેન્દ્ર સરકારે નક્સલવાદને સંપૂર્ણ ખતમ કરવા માટે 31 માર્ચ, 2026 સુધીનો સમયમર્યાદા નક્કી કરી છે. સુરક્ષા દળોએ પોતાના અભિયાનને વધુ તેજ બનાવ્યું છે અને છેલ્લા થોડા મહિનાઓથી નક્સલીઓ પર કડક કાર્યવાહી કરી રહી છે.

આ વર્ષમાં અત્યાર સુધી કેટલા નક્સલી મરાયા?

અધિકારીઓના જણાવ્યા મુજબ આ વર્ષે અત્યાર સુધી છત્તીસગઢમાં 281 નક્સલી અથડામણમાં મરાયા છે.

પિતાના જન્મદિવસ પર સની દેઓલે શેર કર્યો ધર્મેન્દ્રનો અનસીન વીડિયો

ધર્મેન્દ્રના અવસાન પછી સની દેઓલ અને અભય દેઓલે હિમેનની જન્મજયંતિ પર તેમની પહેલી પ્રતિક્રિયાઓ શેર કરી છે. તેમણે ઇન્સ્ટાગ્રામ પર ધર્મેન્દ્રની અનસીન ઝલક દર્શાવતી પોસ્ટ્સ શેર કરી છે.

ધર્મેન્દ્રના મૃત્યુથી બોલિવૂડને ખૂબ જ આઘાત લાગ્યો છે અને તેમનો આખો પરિવાર હજુ પણ ભાવનાત્મક રીતે શોકમાં છે. 24 નવેમ્બરના રોજ જ્યારે ધર્મેન્દ્ર દુનિયા છોડી ગયા, ત્યારે તેમના બાળકોએ તેમના અંતિમ સંસ્કાર શાંતિથી અને ખાનગી રીતે કર્યા. પરિવારના કોઈ સભ્ય તરફથી કોઈ જાહેર પ્રતિક્રિયા આવી ન હતી. હવે, તેમના મૃત્યુના 14 દિવસ પછી તેમની જન્મજયંતિ નિમિત્તે, તેમની પુત્રી એશા દેઓલ પછી, તેમના પુત્રો સની દેઓલ અને અભય દેઓલે પણ પોસ્ટ શેર કરી છે. આ પોસ્ટ્સમાં, ત્રણેય પોતાની લાગણીઓ ખુલ્લેઆમ વ્યક્ત કરતા જોવા મળે છે.

સની દેઓલની પહેલી પ્રતિક્રિયા

 

View this post on Instagram

 

A post shared by Sunny Deol (@iamsunnydeol)

સની દેઓલે ધર્મેન્દ્રનો એક સુંદર વીડિયો શેર કર્યો છે. આ વીડિયો પર્વતોનો છે, જ્યાં ધર્મેન્દ્ર ખીણો વચ્ચે બેસીને કુદરતી સૌંદર્યની પ્રશંસા કરતા જોવા મળે છે. વીડિયોમાં, સની દેઓલ તેમને પૂછે છે, “પાપા, શું તમે મજા કરી રહ્યા છો?” ધર્મેન્દ્ર જવાબ આપે છે, “હું મજા કરી રહ્યો છું, મારા દીકરા. આ સુંદર છે.” વીડિયોમાં, તમે તેમને ગરમ કોટ અને ટોપી પહેરેલા જોઈ શકો છો. હાલમાં ફક્ત સનીનો અવાજ સંભળાય છે; તે વીડિયોમાં દેખાતો નથી. વીડિયો શેર કરતા તેણે કેપ્શનમાં લખ્યું, “આજે મારા પિતાનો જન્મદિવસ છે. પપ્પા હંમેશા મારી સાથે છે, તે મારી અંદર છે. લવ યુ, પપ્પા. મિસ યુ.”

અભય દેઓલની ભાવનાત્મક પોસ્ટ

 

View this post on Instagram

 

A post shared by Abhay Deol (@abhaydeol)

ધર્મેન્દ્રના ભત્રીજા અભય દેઓલે પણ એક પ્રેમાળ, ભાવનાત્મક પોસ્ટ શેર કરી છે. તેમના મોટા પિતાને યાદ કરતા, તેમણે તેમના બાળપણ અને ધર્મેન્દ્રના જુવાનીના દિવસોનો એક જૂનો ફોટો શેર કર્યો. ધર્મેન્દ્ર અભય દેઓલને ખોળામાં લઈને બેઠા છે. પોસ્ટ શેર કરતા તેમણે કેપ્શનમાં લખ્યું,”તે કદાચ 1985 કે ’86 ની વાત છે. મને ઠપકો મળ્યો હતો, તેથી હું દુઃખી હતો. તેમણે મને બોલાવ્યો, મને તેમની બાજુમાં બેસાડ્યો, અને કહ્યું, ‘પ્રકાશ તરફ જુઓ’, અને ફોટોગ્રાફરને આ ફોટો ક્લિક કરવા કહ્યું. હું તે ક્ષણની રાહ જોઈ રહ્યો છું જ્યારે મારો સમય આવે અને હું તેમને ફરીથી તે શબ્દો કહેતા સાંભળીશ. આ દિવસે તેમનો જન્મદિવસ હતો.”

ઈન્ડિગો સંકટ પર તાત્કાલિક સુનાવણી કોર્ટનો ‘સુપ્રીમ’ ઈનકાર

નવી દિલ્હીઃ ઈન્ડિગો દ્વારા સેંકડો ફ્લાઇટ્સ રદ કરવામાં આવી રહી હોવાને મામલે સુપ્રીમ કોર્ટે દખલ કરવાની માગ કરતી અરજી પર તરત સુનાવણી કરવા તૈયાર નથી. કોર્ટે કહ્યું હતું કે અમે એરલાઇન નથી ચલાવી શકતા. ભારત સરકાર આ મુદ્દાથી પહેલેથી જ માહિતગાર છે અને સમયસર કાર્યવાહી કરી છે. ત્યાર બાદ આ મામલો બુધવાર માટે લિસ્ટ કરવામાં આવ્યો હતો.

ઈન્ડિગો ફ્લાઇટ્સમાં સતત સાતમા દિવસે પણ અવરોધ ચાલુ છે. એરલાઇન કંપનીએ સોમવારે દિલ્હી-બેંગલુરુ એરપોર્ટ પરથી 250થી વધુ ઉડાનો રદ કરી દીધી હતી.

સુપ્રીમ કોર્ટના મુખ્ય ન્યાયાધીશે સ્વીકાર્યું હતું કે ફ્લાઇટ રદ થવાથી અનેક મુસાફરોને ગંભીર આરોગ્ય સંબંધિત સમસ્યાઓનો સામનો કરવો પડ્યો છે. અરજદાર વકીલ નરેન્દ્ર મિશ્રાએ અરજી કરીને ટોચની કોર્ટને કેસની વહેલી સુનાવણી કરવાની માગ કરી હતી. તેમની દલીલ હતી કે 2500થી વધુ ફ્લાઇટ્સ રદ થઈ ગઈ છે અને દેશભરનાં મોટા ભાગનાં એરપોર્ટ્સ અસરગ્રસ્ત છે, તેથી સુપ્રીમ કોર્ટે જરૂરી હસ્તક્ષેપ કરવો જોઈએ.

બીજી ડિસેમ્બરથી ચાલુ ઈન્ડિગો સંકટ

ઈન્ડિગોએ બીજી ડિસેમ્બરથી અત્યાર સુધી સેંકડો ફ્લાઇટ્સ રદ કરી છે, જેને કારણે એરલાઇનને હજારોથી વધુ મુસાફરોના રોષનો સામનો કરવો પડી રહ્યો છે. કંપનીએ આ રદ થવા માટે પાઈલોટ્સની નવી ફ્લાઇટ ડ્યૂટી અને નિયમોમાં બદલાવને જવાબદાર ઠેરવ્યા છે, જેને કારણે દેશભરમાં લાખો મુસાફરો એરપોર્ટ્સ પર અડવાયા હતા.

શરૂઆતના ત્રણ દિવસ સુધી રાહુલ ભાટિયાની આંશિક હિસ્સેદારી ધરાવતી આ એરલાઇન  ભારે પ્રમાણમાં થઈ રહેલી રદ ફ્સાઇટ્સને સ્વીકારવામાં નિષ્ફળ રહી હતી. માત્ર એક જ દિવસે (શુક્રવારે) એરલાઇને 1600 ફ્લાઇટ્સ રદ કરી હતી — જે ભારતીય ઉડ્ડયનના ઇતિહાસમાં એક રેકોર્ડ છે. ત્યાર બાદ CEO પીટર એલ્બર્સે મુસાફરોને થઈ રહેલી અસુવિધા બદલ માફી માગતો એક વિડિયો જાહેર કર્યો હતો.

હૈદરાબાદમાં ટ્રમ્પના નામ પરથી રસ્તાનું નામ રાખવાની જાહેરાત, ભાજપ ભડકી

તેલંગાણાના મુખ્યમંત્રી રેવંત રેડ્ડીએ હૈદરાબાદમાં એક શેરીનું નામ અમેરિકન રાષ્ટ્રપતિ ડોનાલ્ડ ટ્રમ્પના નામ પર રાખવાનો પ્રસ્તાવ મૂક્યો છે. જોકે, આ જાહેરાતથી ભાજપ ગુસ્સે ભરાયું છે, તેમણે મુખ્યમંત્રી પર કટાક્ષ કર્યો છે, જેમણે માંગ કરી છે કે તેઓ પહેલા હૈદરાબાદનું નામ બદલીને ભાગ્યનગર કરે.

તેલંગાણાના મુખ્યમંત્રી એ. રેવંત રેડ્ડીએ હૈદરાબાદમાં એક રસ્તાનું નામ અમેરિકન રાષ્ટ્રપતિ ડોનાલ્ડ ટ્રમ્પના નામ પર રાખવાનો પ્રસ્તાવ મૂક્યો છે. આ નિર્ણય તેલંગાણા રાઇઝિંગ ગ્લોબલ સમિટ દરમિયાન આંતરરાષ્ટ્રીય ધ્યાન ખેંચવાનો પ્રયાસ હોય તેવું લાગે છે. જોકે, આનાથી તેમના વિરોધીઓ ટીકા કરી રહ્યા છે. તેલંગાણા ભાજપે મુખ્યમંત્રીના પ્રસ્તાવની ટીકા કરી છે.

હૈદરાબાદ રોડનું નામ ‘ડોનાલ્ડ ટ્રમ્પ એવન્યુ’ રાખવામાં આવશે

મુખ્યમંત્રી રેવંત રેડ્ડીએ પ્રસ્તાવ મૂક્યો છે કે હૈદરાબાદમાં યુએસ કોન્સ્યુલેટ જનરલ તરફ જતા રસ્તાનું નામ ‘ડોનાલ્ડ ટ્રમ્પ એવન્યુ’ રાખવામાં આવે. જો આવું થાય, તો દુનિયામાં પહેલી વાર કોઈ પણ દેશમાં આ રીતે કોઈ વર્તમાન અમેરિકન રાષ્ટ્રપતિનું સન્માન કરવામાં આવશે. એ નોંધનીય છે કે હૈદરાબાદમાં ગુગલ સ્ટ્રીટ જેવી શહેરના વિકાસમાં યોગદાન આપનારા રાજકારણીઓ અને વૈશ્વિક કંપનીઓના નામ પર રસ્તાઓનું નામ આપવાની પરંપરા છે, જે હૈદરાબાદમાં ગુગલની મજબૂત હાજરી દર્શાવે છે. તેવી જ રીતે, ‘માઈક્રોસોફ્ટ રોડ’ અને ‘વિપ્રો જંકશન’ પણ છે.

ભાજપનો કટાક્ષ – હૈદરાબાદનું નામ બદલીને ભાગ્યનગર

તેલંગાણાના ભાજપ સાંસદ અને કેન્દ્રીય મંત્રી બાંડી સંજય કુમારે તેલંગાણાના મુખ્યમંત્રીના પ્રસ્તાવની ટીકા કરી અને હૈદરાબાદનું નામ બદલીને ભાગ્યનગર કરવાની માંગ કરી. સોશિયલ મીડિયા પર શેર કરેલી પોસ્ટમાં બાંડી સંજય કુમારે લખ્યું, “હૈદરાબાદનું નામ પાછું ભાગ્યનગર કરો. જો કોંગ્રેસ સરકાર નામ બદલવા માટે આટલી જ ઉત્સુક છે, તો તેમણે એવું કંઈક કરવું જોઈએ જેનો વાસ્તવિક ઇતિહાસ અને અર્થ હોય.” “આપણે કેટલી ભયંકર પરિસ્થિતિમાં જીવીએ છીએ – એક તરફ, કેટી રામા રાવ કેસીઆરના જીવંત હોવા છતાં તેમની મૂર્તિઓ બનાવવામાં વ્યસ્ત છે. બીજી તરફ, રેવંત રેડ્ડી ટ્રેન્ડિંગ વ્યક્તિઓના નામ પરથી સ્થળોના નામ બદલી રહ્યા છે. દરમિયાન, ભાજપ એકમાત્ર એવો પક્ષ છે જે ખરેખર સરકાર પર સવાલ ઉઠાવે છે અને વિરોધ પ્રદર્શનો દ્વારા લોકોના વાસ્તવિક મુદ્દાઓ ઉઠાવે છે.”

ત્રણ ‘બાબરી મસ્જિદ’ સાથે હોસ્પિટલ અને સ્મારક બનાવવાની પણ તૈયારી

કોલકાતાઃ પશ્ચિમ બંગાળમાં બાબરી મસ્જિદને લઈને રાજકીય તોફાન ઊભું થયું છે. તૃણમૂલ કોંગ્રેસના સસ્પેન્ડ કરાયેલા વિધાનસભ્ય હુમાયૂ કબીરએ જાહેરાત કરી છે કે રાજ્યમાં ત્રણ મોટી મસ્જિદો બનાવવામાં આવશે, જેમાંથી પ્રથમ મસ્જિદની પાયો મુર્શિદાબાદમાં મુકાઈ ચૂક્યો છે.

કેટલો ખર્ચ થશે?

મુર્શિદાબાદની મસ્જિદ પર અંદાજિત ખર્ચ- રૂ. 300 કરોડ

ત્રણ મસ્જિદો પર કુલ ખર્ચ- રૂ. 1000 કરોડ

ફંડિંગ પર સવાલો

  • શિલાન્યાસ દરમિયાન 60 હજાર બિરયાનીનાં પેકેટ વહેંચાયા
  • પહેલા જ દિવસે 100 ટ્રેક્ટર ઈંટ અને સામાન પહોંચ્યો
  • દાવો: એક વ્યક્તિએ રૂ. 80 કરોડનું દાન આપ્યું
  • આરબ દેશોમાંથી આવેલા મૌલાનાઓ પણ કાર્યક્રમમાં જોડાયા
  • શું ખાડી દેશોમાંથી ફંડિંગ થઈ રહી છે?

આ પરિસ્થિતિમાં સવાલ ઊઠે છે કે હુમાયૂં મુસલમાનોના મત બેંકને લક્ષ્ય બનાવી રહ્યા છે? અને તેમના ફંડિંગને લઈને દેશભરમાં ચર્ચા થઈ રહી છે.

કયા જિલ્લાઓમાં મસ્જિદ?પ્રાપ્ત માહિતી પ્રમાણે મુર્શિદાબાદમાં જ્યાં હુમાયુ ‘બાબરી મસ્જિદ’ બનાવવા કહે છે ત્યાં 70 ટકા મુસ્લિમ વસ્તી છે. આ ઉપરાંત બીજા જિલ્લામાં માલદામાં મુસ્લિમ વસ્તી 51 ટકા છે, જ્યારે બીરભૂમ જિલ્લામાં 35 ટકા મુસ્લિમ વસ્તી છે.

રાજકીય ટકરાવ તેજ

બાબરી મસ્જિદને લઈને દેશભરમાં રાજકીય તાપમાન વધ્યું છે. ભાજપે આ મુદ્દે મમતા બેનર્જી અને હુમાયુ પર હુમલા તેજ કર્યા છે. ભાજપ સાંસદ સમ્બિત પાત્રાએ કહ્યું છે કે મમતા અને હુમાયુ તુષ્ટીકરણનું રાજકારણ કરી રહ્યાં છે. જ્યારે TMC નેતા શત્રુઘ્ન સિન્હાનું કહેવું છે કે ભાજપ ધર્મના નામે હંગામો મચાવી રહ્યો છે. એ ઉપરાંત, UPના ઉપ મુખ્ય મંત્રી કેશવ પ્રસાદ મૌર્યએ સ્પષ્ટ કહ્યું છે કે અમારો મસ્જિદથી કોઈ વિરોધ નથી, પરંતુ જો બાબરને નામે મસ્જિદ બનશે તો અમે વિરોધ કરીશું.

પણ બાબરી સ્મારકનું એલાન

બંગાળ બાદ હવે હૈદરાબાદમાં પણ બાબરી સ્મારકની જાહેરાત થઈ છે. તહરિક મુસ્લિમ શબ્બાન સંસ્થા દ્વારા કહેવામાં આવ્યું છે કે ગ્રેટર હૈદરાબાદમાં બાબરી સ્મારક બનશે, એ સાથે જ હોસ્પિટલ અને સ્કૂલ પણ બનાવવામાં આવશે.

 

1...396397398...5,122Page 397 of 5,122