મુંબઈ: મહારાષ્ટ્રમાં મહિલાઓ વિરુદ્ધ અપરાધોમાં સતત વધારો થઈ રહ્યો છે. તાજેતરનો મામલો મુંબઈનો છે. મુંબઈના છત્રપતિ શિવાજી મહારાજ ટર્મિનલ રેલ્વે સ્ટેશનના પરિસર પાસે 29 વર્ષીય મહિલા પર સામૂહિક બળાત્કારની ઘટના સામે આવી છે. મળતી માહિતી મુજબ, 22 સપ્ટેમ્બરની રાત્રે બે અજાણ્યા લોકો પીડિતાને બળજબરીથી ટેક્સી સ્ટેન્ડ પાસે લઈ ગયા અને ધમકી આપીને તેના પર બળાત્કાર ગુજાર્યો હતો. પીડિતાએ આ અંગે રેલવે પોલીસમાં ફરિયાદ કરી છે.
મહિલાનું અપહરણ કરી સામૂહિક બળાત્કાર
મળતી માહિતી મુજબ 22 સપ્ટેમ્બરની રાત્રે પીડિત મહિલા સીએસએમટી સ્ટેશનની બહાર એકલી હતી. એવામાં ત્યાં બે અજાણ્યા શખ્સો આવ્યા. તેમાંથી એકે મહિલાનું મોં પકડી રાખ્યું હતું. મહિલાએ ફરિયાદમાં જણાવ્યું છે કે બંનેએ તેને ધમકી આપી હતી અને સીએસએમટી સ્ટેશનની બહાર ટેક્સી સ્ટેન્ડની પાછળ એક પછી એક તેની સાથે સામૂહિક બળાત્કાર કર્યો હતો.
પોલીસ તપાસમાં લાગી
આ સંબંધમાં પહેલા સીએસએમટી લોહમાર્ગ પોલીસ સ્ટેશનમાં કેસ નોંધવામાં આવ્યો હતો. આ જ કેસ હવે વધુ તપાસ માટે મુંબઈ પોલીસના માતા રમાબાઈ માર્ગ પોલીસ સ્ટેશનમાં ટ્રાન્સફર કરવામાં આવ્યો છે.
પુણેમાં ગેંગ રેપનો મામલો
નોંધનીય છે કે પુણેમાં 21 વર્ષની છોકરી પર સામૂહિક બળાત્કારનો મામલો પણ સામે આવ્યો છે. પીડિત યુવતી તેના મિત્ર સાથે ફરવા ગઈ હતી. મોડી રાત્રે ત્રણ છોકરાઓએ તેમને એક નિર્જન જગ્યાએ પકડીને છોકરી સાથે ગેંગરેપ કર્યો હતો. આરોપીઓએ પીડિતાના મિત્રને પણ માર માર્યો હતો. પોલીસે અજાણ્યા લોકો સામે ગુનો નોંધ્યો છે.
