અમદાવાદ: દેશભરમાં યોજાનારી લોકસભાની સામાન્ય ચૂંટણીના પગલે ચૂંટણી પંચ દ્વારા C-Vigil મોબાઈલ એપ્લિકેશન અને પોર્ટલ શરૂ કરવામાં આવ્યા છે. નિષ્પક્ષ મતદાન થાય તથા તમામ નાગરિકો પોતાના મતાધિકારનો ઉપયોગ કરી શકે તે માટે રાજ્ય ચૂંટણીપંચના દિશાનિર્દેશ અનુસાર જિલ્લા ચૂંટણી તંત્ર સુસજ્જ છે. મતદારો અને જાગૃત નાગરિકોને વિવિધ એપ્લિકેશન અને વેબ પોર્ટલના માધ્યમથી અલગ અલગ પ્રકારની સુવિધા આપવામાં આવી રહી છે. C-Vigil મોબાઈલ એપ્લિકેશન અને પોર્ટલ પણ આવી જ એક સુવિધા છે. આ બંને માધ્યમો દ્વારા કોઈપણ જાગૃત નાગરિક તેમના ધ્યાને આવતા આચારસંહિતા ઉલ્લંઘનના કિસ્સાને ચૂંટણી વહીવટી તંત્ર સુધી મોકલી શકે છે. નાગરિકો આચારસંહિતા ઉલ્લંઘનના ફોટોગ્રાફ અને લોકેશન સહિતની જાણકારી ઓનલાઈન મોકલી શકે છે. જે મળ્યા બાદથી ૧૦૦ મિનિટમાં આ ફરિયાદનું નિવારણ લાવવા માટે તંત્ર કાર્યરત થઈ જાય છે.
શું છે C-Vigil એપ?
C-Vigil એ યુઝર ફ્રેન્ડલી અને ઓપરેટ કરવામાં સરળ એન્ડ્રોઇડ એપ્લિકેશન છે. જેનો ઉપયોગ લોકસભા ચૂંટણીની સૂચનાની તારીખથી ઉલ્લંઘનની જાણ કરવા માટે થઈ રહ્યો છે. આ એપની એક વિશેષતા એ છે કે, ફ્લાઈંગ સ્કવોડ્સ સમયસર તેમનું કામ કરે તેની ખાતરી કરવા માટે તે ડિજિટલ પુરાવા પ્રદાન કરશે. એપ ઓટો લોકેશન કેપ્ચર સાથે લાઈવ ફોટા/વીડિયો લેવાની પરવાનગી આપે છે. તેને પ્લે સ્ટોર પરથી ડાઉનલોડ કરી શકાય છે.
કેવી રીતે કામ કરશે?
આ એપ કેમેરા, સારા ઈન્ટરનેટ કનેક્શન અને GPS સાથે કોઈપણ એન્ડ્રોઈડ સ્માર્ટફોનમાં ઈન્સ્ટોલ કરી શકાય છે. C-Vigil સતર્ક નાગરિકોને જિલ્લા કંટ્રોલ રૂમ, રિટર્નિંગ ઓફિસર અને ફિલ્ડ યુનિટ / સ્ટેટિક સર્વેલન્સ ટીમો સાથે જોડે છે. જેનાથી ઝડપી અને સચોટ રિપોર્ટિંગ, કાર્યવાહી અને મોનિટરિંગ સિસ્ટમ સક્ષમ બને છે.
- પ્રથમ પગલામાં, કોઈ વ્યક્તિ ફોટો લઇને અથવા 2 મિનિટનો વીડિયો રેકોર્ડ કરે છે. ફોટો/વિડિયોને જિયોગ્રાફિક ઇન્ફર્મેશન સિસ્ટમ દ્વારા ઑટોમેટેડ લોકેશન મેપિંગ સાથે એપ પર અપલોડ કરવામાં આવે છે. સફળ સબમિશન પછી, વ્યક્તિને નીચેના ફોલો-અપ અપડેટ્સ પ્રાપ્ત કરવા અને ટ્રૅક કરવા માટે તેના મોબાઇલ પર એક અન્ય ID મળે છે.
- બીજા તબક્કામાં, સિટીઝન એપની ફરિયાદ નોંધવા પર, માહિતી જિલ્લા કંટ્રોલ રૂમમાં બીપ થાય છે જ્યાંથી તેને ફીલ્ડ યુનિટને સોંપવામાં આવે છે. ફિલ્ડ યુનિટમાં ફ્લાઈંગ સ્ક્વોડ, એક સ્થિર સર્વેલન્સ ટીમ, રિઝર્વ ટીમ વગેરેનો સમાવેશ થાય છે. દરેક ફીલ્ડ યુનિટ પાસે C-Vigil Investigator નામની GIS-આધારિત મોબાઈલ એપ્લિકેશન હોય છે. જે GIS અને નેવિગેશન ટેક્નોલોજીને અનુસરીને અને પગલાં લઈને ફિલ્ડ યુનિટને ઘટનાસ્થળ તરફ દિશામાન કરે છે.
- ત્રીજા તબક્કામાં, ફિલ્ડ યુનિટ ફરિયાદ પર કાર્યવાહી કરે છે. પછી, તેમના દ્વારા ફિલ્ડ રિપોર્ટ તપાસ અને નિકાલ માટે સંબંધિત રિટર્નિંગ ઓફિસરને ઇન્વેસ્ટિગેટર એપ દ્વારા ઑનલાઇન મોકલવામાં આવે છે. જો ઘટના સાચી હોવાનું જાણવા મળે છે, તો આ માહિતી ભારતીય ચૂંટણી પંચના રાષ્ટ્રીય ફરિયાદ પોર્ટલને આગળની કાર્યવાહી માટે મોકલવામાં આવે છે અને તેની માહિતી 100 મિનિટમાં જાગૃત નાગરિકને આપવામાં આવે છે.
આચારસંહિતા લાગુ થઈ ત્યારથી એટલે કે 16મી માર્ચથી લઈને ૨૫મી માર્ચ દરમિયાન મોબાઈલ એપ્લિકેશન અને વેબપોર્ટલના માધ્યમથી અમદાવાદમાં આવી કુલ બાવન ફરિયાદ નોંધાઇ છે. જેમાંથી કુલ ૪૭ નિકાલપાત્ર ફરિયાદોમાંથી મોટાભાગની ફરિયાદોનો નિકાલ ૧૦૦ મિનિટની સમયાવધિમાં કરાયો છે. આમ, ટેકનોલોજીના યથાર્થ ઉપયોગ થકી નિષ્પક્ષ અને તટસ્થ લોકસભા ચૂંટણી માટે C-vigil મોબાઈલ એપ્લિકેશન અને પોર્ટલ ખૂબ જ ઉપયોગી સાબિત થઈ રહ્યા છે.
