નવી દિલ્હીઃ દિલ્હી પોલીસના સ્પેશિયલ સેલના ઓફિસમાંથી લાખો રૂપિયાની ચોરીનો પર્દાફાશ થયો છે. સ્પેશિયલ સેલના હેડ કોન્સ્ટેબલ ખુદ જ ચોરીની ઘટનાનો અપરાધી નીકળ્યો છે. આરોપી કોન્સ્ટેબલ અગાઉ લોધી રોડ પર આવેલા માલખાનામાં નોકરી પર હતો, જ્યાં ચોરી થઈ હતી. જોકે હવે તેને પૂર્વ દિલ્હી ટ્રાન્સફર કરવામાં આવ્યો છે. સ્પેશિયલ સેલની ટીમે આરોપી કોન્સ્ટેબલની ધરપકડ કરી લીધી છે અને તેની પાસેથી 50 લાખ રૂપિયાની રોકડ રકમ અને મોટી માત્રામાં સોનું જપ્ત કરવામાં આવ્યું છે.
આ ચોરી કરનાર કોન્સ્ટેબલનું નામ HC ખુરશીદ છે, જેની શનિવારે ધરપકડ કરવામાં આવ્યો હતો. પોલીસ સૂત્રો અનુસાર ખુરશીદે ઘણા સમય પહેલાં આ ચોરીની યોજના બનાવી હતી. આ માટે તેણે માલખાનાની નકલી ચાવી બનાવડાવી હતી. આ ચાવીનો ઉપયોગ કરીને તેણે આ ચોરીને અંજામ આપ્યો હતો.
ખુરશીદ પહેલાં સ્પેશિયલ સેલના માલખાનામાં નિમાયેલો હતો. આ કારણે જ્યારે તે માલખાનામાં ચોરી કરવા માટે પહોંચ્યો, ત્યારે કોઈ પોલીસ કર્મચારીએ તેના પર શંકા નહીં કરી. આનો લાભ લઈ ખુરશીદે ચોરીને અંજામ આપ્યો.
ચોરી થયેલ રોકડ અને સોનુ મળ્યું
પોલીસે આરોપીની ધરપકડ કર્યા બાદ તેની પાસેથી ૫૦ લાખ રૂપિયાની રોકડ અને સોનું પણ જપ્ત કર્યું છે. પોલીસે આરોપીની પૂછપરછ શરૂ કરી છે. પ્રાપ્ત માહિતી અનુસાર દિલ્હી પોલીસની સ્પેશિયલ સેલના જે ઓફિસમાંથી ચોરી થઈ છે, ત્યાંથી એન્ટી ટેરર સ્ક્વોડ પણ કાર્યરત છે. અહીંની ટીમ દેશભરમાં આતંકવાદીઓ અને ગેંગસ્ટરો સાથે સંકળાયેલા કેસોની તપાસ કરે છે. આ ઘટનાએ દિલ્હી પોલીસના આંતરિક સુરક્ષા તંત્ર પર પ્રશ્નચિહ્ન ઊભું કર્યું છે. મામલાની તપાસ ચાલુ છે.
