અમેરિકા: ભારતીય મૂળના અમેરિકન અવકાશયાત્રી સુનિતા વિલિયમ્સ અવકાશમાં નવ મહિના વિતાવ્યા પછી 18 માર્ચે પૃથ્વી પર પરત ફર્યા. અવકાશમાંથી પાછા ફર્યા બાદ, સુનિતા વિલિયમ્સે મંગળવારે સોશિયલ મીડિયા પર પોતાની પહેલી પોસ્ટ પોસ્ટ કરી, જેમાં તેમનું તેમના ડોગ્સ ઉત્સાહપૂર્વક સ્વાગત કરતા જોવા મળે છે. સુનિતા આને અત્યાર સુધીની સૌથી શ્રેષ્ઠ ઘર વાપસી ગણાવી રહ્યા છે. આ વીડિયોમાં સુનિતા તેમના ડોગ્સ સાથે મસ્તી કરતા જોવા મળી રહ્યા છે. વિડીયોમાં જોઈ શકાય છે કે સુનિતા ઘરમાં પ્રવેશતાની સાથે જ બે કૂતરાઓ તેમને ઘેરી લે છે અને તેમના હાથ પર ચઢવાનો પ્રયાસ કરે છે. આ વિડીયો શેર કરતાં તેમણે લખ્યું, ‘અત્યાર સુધીનું શ્રેષ્ઠ ઘર વાપસી.’
Best homecoming ever! pic.twitter.com/h1ogPh5WMR
— Sunita Williams (@Astro_Suni) April 1, 2025
સુનિતા વિલિયમ્સે મસ્ક અને ટ્રમ્પનો આભાર માન્યો
સોમવારે, પહેલી વાર મીડિયા સાથે વાતચીત કરતા સમયે, તેમણે અવકાશમાં નવ મહિના વિતાવવાનો પોતાનો અનુભવ શેર કર્યો. આ દરમિયાન, તેમણે અને બુચ વિલ્મોરે અમેરિકી રાષ્ટ્રપતિ ડોનાલ્ડ ટ્રમ્પ અને સ્પેસએક્સના માલિક એલોન મસ્કનો આંતરરાષ્ટ્રીય અવકાશ મથક (ISS) પરથી પાછા લાવવામાં મદદ કરવા બદલ આભાર માન્યો.
તેમણે એમ પણ કહ્યું કે, અમને પૃથ્વી પર પાછા ફર્યાને લગભગ બે અઠવાડિયા થઈ ગયા છે. હવે અમને પૂછવામાં આવી રહ્યું છે કે અમે શું કરી રહ્યા છીએ? તો હું તમને કહી દઉં કે અમે નવા પડકારો માટે તૈયારી કરી રહ્યા છીએ. નવા મિશનની તૈયારી. મેં ગઈકાલે જ ત્રણ માઈલ દોડ્યું, તેથી હું ચોક્કસપણે મારી પીઠ થપથપાવી શકું છું.
તમે પહેલા શું કર્યું?
તે જ સમયે, જ્યારે સુનિતા વિલિયમ્સને પૂછવામાં આવ્યું કે પૃથ્વી પર પાછા ફર્યા પછી તેમણે સૌથી પહેલા શું કર્યું, ત્યારે તેમણે કહ્યું કે સૌપ્રથમ પતિ અને કૂતરાઓને ગળે લગાવ્યા. ઘરે પાછા આવ્યા પછી, મેં ગ્રીલ્ડ ચીઝ સેન્ડવિચનો સ્વાદ ચાખ્યો. સાથે જ પિતાજીને યાદ પણ કર્યા.
આ ઉપરાંત, જ્યારે તેમને ભારતની મુલાકાત વિશે પૂછવામાં આવ્યું ત્યારે સુનિતાએ કહ્યું કે તે ચોક્કસપણે તેના પિતાના દેશ ભારતની મુલાકાત લેશે. તે ભારતીય અવકાશયાત્રીના એક્સિઓમ મિશન પર જવા અંગે ઉત્સાહિત છે. મને આશા છે કે હું ક્યારેક તેમને મળીશ અને ભારતમાં શક્ય તેટલા વધુ લોકો સાથે મારો અનુભવ શેર કરી શકીશ. ભારત એક મહાન દેશ છે અને એક અદ્ભુત લોકશાહી છે જે અવકાશમાં પોતાનું સ્થાન બનાવવાનો પ્રયાસ કરી રહ્યું છે. અમે તેનો ભાગ બનીને ભારતને મદદ કરવા માંગીએ છીએ.
