મુંબઈઃ અહીં બાન્દ્રા-વરલી સી લિન્ક પર ગઈ કાલે મોડી રાતે લગભગ 10 વાગ્યે એક ભીષણ અકસ્માતમાં એક કાર બીજા અનેક વાહનો સાથે અથડાતાં ત્રણ જણનું મરણ થયું છે અને બીજા 6 જણને ઈજા થઈ છે. વરલીથી બાન્દ્રા તરફ ધસમસતી આવેલી ટોયોટા ઈનોવા કાર સી લિન્ક પરના ટોલ પ્લાઝા ખાતે બીજા પાંચ વાહનો સાથે અથડાઈ હતી. ઈનોવા કારના ડ્રાઈવરે પહેલા એક મર્સિડીઝ કારને ટક્કર મારી હતી. અકસ્માત કર્યા બાદ ડ્રાઈવરે ભાગી જવાનો પ્રયાસ કર્યો હતો. એમાં તે કાર ટોલ ચૂકવણી માટેની લાઈનમાં રહેલા બીજા વાહનો સાથે અથડાઈ હતી.
ભયાનક અકસ્માતમાં કુલ છ જણને ગંભીર ઈજા થઈ હતી. તમામને સારવાર માટે હોસ્પિટલમાં દાખલ કરવામાં આવ્યા હતા. બાદમાં એમાંની બે મહિલા અને એક પુરુષનું મૃત્યુ થયું હતું. બે જણની હાલત ગંભીર છે. ચાર જણની હાલત સ્થિર છે. ટોલ પ્લાઝા ખાતે હાજર પોલીસોએ તરત જ ઈનોવા કારના ડ્રાઈવરની ધરપકડ કરી હતી. તેનું નામ સરફરાઝ હોવાનું કહેવાય છે. પોલીસે તેની કાર જપ્ત કરી છે.
