અમદાવાદ : ગુજરાતભરમાં શ્રીકૃષ્ણ જન્માષ્ટમીના પાવન પર્વ નિમિત્તે ભક્તિ અને આનંદનો માહોલ જોવા મળ્યો હતો. દ્વારકા, ડાકોર અને શામળાજી સહિત રાજ્યના મુખ્ય કૃષ્ણધામોમાં ભગવાન શ્રીકૃષ્ણનો 5253મો જન્મોત્સવ અત્યંત ભવ્યતા અને શ્રદ્ધા સાથે ઉજવવામાં આવ્યો છે. 
મધરાતે ૧૨ વાગ્યે કાન્હાનો જન્મ થતાં જ મંદિર પરિસરો ‘જય કનૈયા લાલ કી, નંદ ઘેર આનંદ ભયો’ અને ‘જય દ્વારકાધીશ’ના જયઘોષથી ગુંજી ઊઠ્યા હતા.
-
દ્વારકા: દ્વારકાધીશ જગત મંદિરમાં વહેલી સવારથી જ શ્રદ્ધાળુઓનો મહાસાગર ઉમટી પડ્યો હતો. ભગવાનને વિશેષ સ્નાન કરાવ્યા બાદ આકર્ષક શૃંગાર કરવામાં આવ્યો હતો. મધરાતે જન્મોત્સવ આરતી અને વિશેષ પંચામૃત અભિષેકના દર્શન કરી લાખો ભક્તોએ ધન્યતા અનુભવી હતી.
-
ડાકોર: ખેડા જિલ્લાના પ્રખ્યાત યાત્રાધામ ડાકોરમાં રાજા રણછોડરાયજીને દિવ્ય વસ્ત્રો અને સુવર્ણ આભૂષણોથી સજ્જ કરવામાં આવ્યા હતા. મધરાતે જન્મોત્સવ બાદ ભક્તોને માખણ-મિસરીનો પ્રસાદ વહેંચવામાં આવ્યો હતો.
-
શામળાજી: અરવલ્લીમાં આવેલ શામળાજી ધામ ખાતે પણ કૃષ્ણ જન્મોત્સવ પ્રસંગે મંદિરને રંગબેરંગી રોશનીથી શણગારાયું હતું. શંખનાદ અને ઘંટારવ વચ્ચે બાળ સ્વરૂપના દર્શન માટે મોડી રાત સુધી ભક્તોની લાંબી કતારો જોવા મળી હતી.
રાતના બરાબર 12ના ટકોરે શંખનાદ, મહાઆરતી અને ‘નંદ ઘેર આનંદ ભયો, જય કનૈયા લાલ કી’ના ગગનભેદી નારાઓ સાથે ભગવાન શ્રીકૃષ્ણનો ભવ્ય જન્મોત્સવ ઉજવવામાં આવ્યો હતો. પ્રભુના પ્રાગટ્યના આ આનંદમાં ઠેર-ઠેર આકાશમાં ફટાકડા ફોડીને ભવ્ય ઉજવણી કરવામાં આવી હતી. મહાઆરતી બાદ ભક્તોએ ચરણામૃત અને પ્રસાદ ગ્રહણ કરીને ધન્યતા અનુભવી હતી.
