નવી દિલ્હીઃ ઈરાને ઇઝરાયલ પર હવાઈ હુમલાઓ વધુ તેજ કરી દીધા હતા. ઇઝરાયલનાં અનેક શહેરો અને રહેણાક વિસ્તારોને નિશાન બનાવતાં તેણે આશરે 20 મિસાઇલોનો મારો કર્યો હતો. તેલ અવિવમાં એક હોસ્પિટલ પર મિસાઇલ પડી છે. ઈરાનના આ હુમલાઓને કારણે ઇઝરાયલમાં ભારે તબાહી અને લોકોનાં મોત થયાની માહિતી મળી છે. હુમલાઓ પછી ભાગદોડ અને ભયનો માહોલ જોવા મળ્યો છે અને લોકોને હોસ્પિટલની નજીક ન જવા માટે અપીલ કરવામાં આવી છે. ઇઝરાયલ પર આ અત્યાર સુધીનો સૌથી મોટો હુમલો ગણવામાં આવી રહ્યો છે.
ઈરાનના રાષ્ટ્રીય ટેલિવિઝન ચેનલના હવાલાથી જણાવ્યું છે કે ઇઝરાયલે ઈરાનના અરાક હેવી વોટર રિએક્ટર પર હુમલો કર્યો છે. તે પહેલાં ઇઝરાયલની સેના દ્વારા ગુરુવારે લોકોને અરાક સ્થિત હેવી વોટર રિએક્ટરના આજુબાજુના વિસ્તારો ખાલી કરવા માટે ચેતવણી આપવામાં આવી હતી. સોશિયલ મિડિયા પ્લેટફોર્મ X પર પોસ્ટ કરી આ સૂચના જાહેર કરવામાં આવી હતી.
ઇઝરાયલના હુમલામાં 639 લોકોનાં મોત
અમેરિકા સ્થિત એક માનવાધિકાર સંગઠને ગુરુવારે જણાવ્યું કે ઈરાન પર ઇઝરાયલના હુમલાઓમાં ઓછામાં ઓછા 639 લોકોનાં મોત થયાં છે અને 1329 લોકો ઘાયલ થયા છે. ઇઝરાયલની સેનાએ હેવી વોટર રિએક્ટર ખાલી કરાવાની ચેતવણી આપતી એક ઉપગ્રહ તસવીર પણ શેર કરી હતી. અરાકમાં આવેલા આ રિએક્ટરનું સ્થાન તહેરાનથી લગભગ 250 કિલોમીટર દક્ષિણ-પશ્ચિમમાં છે.
હેવી વોટર રિએક્ટર શું કરે છે?
પરમાણુ રિએક્ટરને ઠંડું રાખવા માટે હેવી વોટર રિએક્ટરનો ઉપયોગ થાય છે, પરંતુ એ પ્લુટોનિયમ પણ બનાવી શકે છે, જેને પરમાણુ હથિયારોમાં ઉપયોગમાં લઈ શકાય છે. સંયુક્ત રાષ્ટ્રની પરમાણુ નિરીક્ષણ સંસ્થા (IAEA)એ ઇઝરાયલને ઈરાનનાં પરમાણુ કેન્દ્રો પર હુમલો ન કરવાની વિનંતી કરી છે.
