અમદાવાદઃ ટેસ્લા ભારતમાં પ્રવેશવા તૈયાર છે. અહેવાલોમાં મુજબ ભારતમાં સૌથી મોટી ઇલેક્ટ્રિક વાહન ઉત્પાદક કંપની સ્થાપના માટે વાતચીત છેલ્લા તબક્કામાં પહોંચી ગઈ છે. ગાંધીનગરમાં યોજાનારી વાઇબ્રન્ટ ગુજરાત સમિટ 2024માં જાન્યુઆરીમાં ભારતમાં ટેસ્લાના પ્રવેશની જાહેરાત કરવામાં આવે એવી સંભાવના છે.
ગુજરાત વેપાર માહોલ માટે એક વ્યૂહાત્મક સ્થળ રહ્યું છે. રાજ્યમાં પહેલેથી જ મારુતિ સુઝુકીનો ઉત્પાદક એકમ છે. ટેસ્લાનો એકમ સાણંદ, બહુચરાજી કે ધોલેરામાં સ્થપાય એવી શક્યતા છે. ટેસ્લાના CEO અને સ્થાપક એલન મસ્ક ભારતમાં EV ઉત્પાદકના પ્રવેશની જાહેરાત કરવા માટે હાજર રહે એવી શકયતા છે.
આ વર્ષના પ્રારંભમાં વડા પ્રધાન નરેન્દ્ર મોદીની USની મુલાકાતમાં એલન મસ્કને મળ્યા બાદ ટેસ્લાએ અગાઉ સંકેત આપ્યો હતો કે તે ભારતમાં મૂડીરોકાણ યોજનાઓ પર પુનર્વિચાર કરી રહી છે. ટેસ્લાએ લગભગ એક વર્ષ પહેલા ભારતમાં ઊંચી આયાત શુલ્કને કારણે ભારતમાં રોકાણ ન કરવાનો નિર્ણય લીધો હતો. અને હવે યુએસ સ્થિત EV ઉત્પાદક આ અભિગમમાં ફેરફાર જોઈ રહ્યા છે. હાલમાં જ કેન્દ્રીય મંત્રી પીયૂષ ગોયલે પણ અમેરિકામાં ટેસ્લા પ્લાન્ટની મુલાકાત લીધી હતી.
ટેસ્લા વાઈબ્રન્ટ ગુજરાત ગ્લોબલ સમિટમાં મેમોરેન્ડમ ઓફ અન્ડરસ્ટેન્ડિંગ (એમઓયુ) પર હસ્તાક્ષર કરે તેવી અપેક્ષા છે. EV નિર્માતાએ અગાઉ કહ્યું હતું કે તે ઈલેક્ટ્રિક કાર સિવાય ભારતમાં બેટરી મેન્યુફેક્ચરિંગ પ્લાન્ટ સ્થાપવા આતુર છે. કાર નિર્માતાએ એવો પણ સંકેત આપ્યો હતો કે તે આ વર્ષના અંત સુધીમાં ભારતમાં તેના ઉત્પાદન પ્લાન્ટ માટે સ્થાન નક્કી કરી શકે છે. કર્ણાટક, મહારાષ્ટ્ર, તમિલનાડુ અને તેલંગાણા સહિત અન્ય ઘણાં રાજ્યો પણ ટેસ્લાને રોકાણ માટે આમંત્રિત કરવાનો પ્રયાસ કરી રહ્યા છે.
