અમદાવાદઃ થોડા દિવસ ઠંડીએ વિરામ લીધા બાદ ફરીથી ઠંડી પોતાનું જોર પકડી રહી છે. હવામાન વિભાગ દ્વારા આગામી ચાર દિવસ સુધી ઠંડી વધવાની આગાહી કરવામાં આવી છે. હવામાન વિભાગના જણાવ્યા અનુસાર તાપમાન હજી 3 થી 4 ડિગ્રી જેટલું ગગડી શકે છે.
ઉલ્લેખનીય છે કે વેસ્ટર્ન ડિસ્ટર્બન્સની સાથે અપરએર સરક્યુલેશનના કારણે રાજ્યમાં ઠંડીનું જોર ઘટ્યું હતું. પરંતુ આગામી 24 કલાકમાં વેસ્ટર્ન ડિસ્ટર્બન્સની અસર ઘટતાં રાજ્યમાં ફરીથી ઠંડીનો રાઉન્ડ શરૂ થવાની શક્યતા હવામાન વિભાગ દ્વારા વ્યક્ત કરવામાં આવી છે.
મહત્વનું છે કે અત્યારે ઉત્તર ભારતમાં ભારે હિમવર્ષા જોવા મળી છે. જેમાં જમ્મૂ-કાશ્મીર અને હિમાચલ પ્રદેશમાં ભારે હિમવર્ષાના કારણે લોકોની મુશ્કેલીમાં વધારો જોવા મળ્યો છે. ભારે હિમવર્ષાના પગલે વાતાવરણમાં ઠંડકતા પ્રસરતાં તાપમાનનો પારો ગગડતો જોવા મળ્યો છે.
