વડોદરા: દર વર્ષે 12મી મે ના દિવસે નર્સિંગ સમુદાયની સેવાઓને પ્રોત્સાહિત કરવા વિશ્વ નર્સિંગ દિવસની ઉજવણી કરવામાં આવે છે. આમ તો, 11 મી મે થી સાત દિવસના નર્સિંગ સપ્તાહની ઉજવણી કરવામાં આવે છે, અને નર્સિંગ વ્યવસાયના રોલ મોડેલ ફ્લોરેન્સ નાઈટિંગેલના જન્મ દિવસે એનું સમાપન કરવામાં આવે છે.
નર્સિગમાં માતૃત્વની મમતાના ગુણ આધારિત હોવાથી મોટાભાગે આમાં મહિલાઓ જ જોવા મળે છે તેમ છતાં,આ ક્ષેત્રમાં પુરુષોના પ્રવેશની મનાઈ નથી અને ભલે ખૂબ ઓછી સંખ્યામાં પરંતુ, જેમ નર્સ બહેનોને સિસ્ટર તરીકે ઓળખવામાં આવે છે તેમ બ્રધર તરીકે ઓળખાતા પુરૂષ નર્સ ભાઈઓ પણ આ વ્યવસાયમાં છે. નર્સિંગ ના વ્યવસાયની કર્તવ્ય પરાયણતાનું ઉજળું ઉદાહરણ ગોત્રી હોસ્પિટલમાં છેલ્લા 4 વર્ષથી ફરજ બજાવતા અર્ચનાબેન જોષી એ પ્રસ્તુત કર્યું છે.
હાલમાં કોરોનાનો કહેર છે ત્યારે હોસ્પિટલમાં જતાં પણ ડર લાગે એવા સમયે તેઓ ગર્ભાવસ્થાના આઠમા મહિને પણ નર્સ તરીકેની તેમની ફરજ બજાવી રહ્યા છે. એમણે જણાવ્યું કે તકેદારીના ભાગરૂપે સગર્ભા બહેનોને કોરોના વોર્ડની ડ્યુટીમાંથી બાકાત રાખવામાં આવે છે .પરંતુ હાલ નર્સિંગ સ્ટાફની ખૂબ જ જરૂર છે તેને અનુલક્ષીને થાય ત્યાં સુધી સેવા આપવાનો મારો નિર્ધાર છે. હાલમાં હું ઓપરેશન થિયેટર માટે પાટાપીંડી તૈયાર કરવા,સાધનોને ઓટોકલેવ કરવાની કામગીરી સાથે સંકળાયેલા વિભાગમાં કામ કરું છું.
અર્ચનાબહેન વધુમાં કહે છે કે, ભલે તમે કોરોના વોર્ડમાં કામના કરતાં હો પરંતુ હાલમાં હોસ્પિટલમાં અવર જવર કરતાં લોકોમાં સંક્રમિત વ્યક્તિઓ હોવાની શક્યતા રહે છે. અને મારે તો મારી સાથે આવનારા બાળકની સુરક્ષા કરવાની છે એટલે ખૂબ સાવચેતી લઉં છું. સેનિટાઈઝર સાથે જ રાખું છું અને ડગલે ને પગલે તેનો ઉપયોગ કરું છું.
હાલમાં ચેપમુક્ત રહેવાની તકેદારી રૂપે લિફ્ટ વાપરવી હિતાવહ નથી. પણ હું આ અવસ્થામાં દાદરા ન ચડી શકું એટલે લિફ્ટનો ઉપયોગ કરતી વખતે ટિસ્યુ પેપર સાથે રાખું છું. લિફ્ટના હેન્ડલને હાથથી સીધો સ્પર્શ ન કરતા ટિસ્યુ પેપરથી પકડું છું અને બહાર નીકળીને તુરત જ સેનેટાઈઝ કરું છું.
તેઓ કહે છે કે આ અમે સ્વેચ્છા એ સ્વીકારેલી જોબ છે એટલે સંજોગો ગમે તેવા અઘરાં હોય અમારે ફરજો બજાવવી જોઇએ. તેમણે જણાવ્યું કે હાલમાં જોખમી અને અઘરી ગણાતી કોરોના વોર્ડની ફરજો બાળ બચ્ચા અને પરિવારથી અળગી રહીને નર્સિંગની બહેનો અદા કરી રહી છે. અહી સતત સાત દિવસ ફરજો બજાવવાની હોય છે અને ચેપ પ્રસરતો અટકાવવા ઘેર જવાને બદલે હોસ્ટેલમાં રહેવું પડે છે.
મહત્વનું છે કે, વર્ષ 2020ને વિશ્વ આરોગ્ય સંસ્થાએ નર્સિંગના સેવા વ્યવસાયને સમર્પિત કર્યું છે અને કુદરત પણ જાણે એમની નિષ્ઠાની કસોટી કરતી હોય તેમ આ વર્ષે જ વિશ્વ કોરોનાની વિરાટ મહામારીના રૂપમાં આરોગ્ય કટોકટીનો સામનો કરી રહ્યું છે.
