જમ્મુ અને કાશ્મીરના પવિત્ર નગર માતા વૈષ્ણો દેવીમાં દારૂ પીવા બદલ ઓરી મુશ્કેલીમાં મુકાયો છે. માતા વૈષ્ણો દેવી મંદિરના બેઝ કેમ્પ કટરા ખાતે એક હોટલમાં દારૂ પીવા બદલ પોલીસે ઓરી અને અન્ય સાત લોકો સામે કેસ નોંધ્યો છે. જમ્મુ અને કાશ્મીર પોલીસે જે આઠ લોકો સામે ગુનો નોંધ્યો છે તેમાં રશિયન નાગરિક અનાસ્તાસિલા અરઝામાસ્કીનાનો સમાવેશ થાય છે, જે ઓરી અને તેના મિત્રો સાથે કટરા આવી હતી.
જિલ્લા મેજિસ્ટ્રેટ (DM) ના આદેશનું ઉલ્લંઘન કરવા અને ધાર્મિક લાગણીઓને ઠેસ પહોંચાડવા બદલ ઓરી, દર્શન સિંહ, પાર્થ રૈના, ઋત્વિક સિંહ, રાશિ દત્તા, રક્ષિતા ભોગલ, શગુન કોહલી અને અનાસ્તાસિલા અરઝામસ્કીના વિરુદ્ધ કટરા પોલીસ સ્ટેશનમાં FIR (નંબર 72/25) નોંધવામાં આવી હતી. તેમની સામે ભારતીય દંડ સંહિતા (BNSS) ની કલમ 223 હેઠળ ગુનો નોંધવામાં આવ્યો છે.
ઓરી અને મિત્રો વિરુદ્ધ FIR દાખલ
રિયાસી પોલીસે જણાવ્યું હતું કે કટરાના કોટેજ સ્યુટ વિસ્તારમાં દારૂ અને માંસાહારી ખોરાક પર કડક પ્રતિબંધ હોવા છતાં, તેઓ તેમની હોટલની અંદર દારૂ પીતા જોવા મળ્યા હતા. ફરિયાદ મળ્યા બાદ, SSP રિયાસી પરમવીર સિંહ (JKPS) એ ગુનેગારો સામે કડક કાર્યવાહીનો નિર્દેશ આપ્યો, ધાર્મિક સ્થળોની પવિત્રતાને અપવિત્ર કરતા કોઈપણ કૃત્ય માટે શૂન્ય-સહિષ્ણુતાની નીતિ પર ભાર મૂક્યો.
પોલીસ તપાસ શરૂ
રિયાસી પોલીસે જણાવ્યું હતું કે, આ મામલાની તપાસ માટે એસપી કટરા, ડીએસપી કટરા અને એસએચઓ કટરાની દેખરેખ હેઠળ એક ખાસ ટીમ બનાવવામાં આવી હતી. ઓરી સહિત તમામ આરોપીઓને નોટિસ મોકલવામાં આવશે, જેમાં તેમને તપાસમાં જોડાવા માટે નિર્દેશ આપવામાં આવશે. એસએસપી રિયાસીએ પુનરોચ્ચાર કર્યો છે કે કાયદાનું ઉલ્લંઘન કરનાર કોઈપણ વ્યક્તિ, ખાસ કરીને ધાર્મિક સ્થળોએ દારૂ અથવા ડ્રગ્સનું સેવન જેવી પ્રવૃત્તિઓમાં સંડોવાયેલા, તેની સામે કડક કાર્યવાહી કરવામાં આવશે.
નેતા સુનિલ શર્માએ પણ નિંદા કરી
જમ્મુ અને કાશ્મીરના વિપક્ષી નેતા સુનિલ શર્માએ આ ઘટનાની સખત નિંદા કરી અને કહ્યું કે બોલિવૂડ સેલિબ્રિટીએ ધાર્મિક લાગણીઓને ઠેસ પહોંચાડી છે તે દુર્ભાગ્યપૂર્ણ છે. તેમણે કહ્યું કે લાખો લોકો માટે આસ્થાનું પ્રતીક એવા માતા વૈષ્ણો દેવી પર આવું કૃત્ય ક્યારેય ન થવું જોઈએ. સુનીલ શર્માએ પોલીસ કાર્યવાહી પર કહ્યું કે એફઆઈઆર નોંધવામાં આવી છે અને તેમાં સામેલ તમામ લોકો સામે કડક કાર્યવાહીની માંગ કરવામાં આવી છે. તેમણે વધુમાં કહ્યું કે આવા પવિત્ર સ્થળે દારૂ અને માંસાહારી ખોરાકનું સેવન સંપૂર્ણપણે અસ્વીકાર્ય છે અને તેને સહન ન કરવું જોઈએ.
