મુંબઈ – 2017ના ડિસેંબરમાં એક વિમાન સફર દરમિયાન બોલીવૂડ અભિનેત્રી ઝાયરા વસીમની કથિતપણે છેડતી કરવા બદલ વિકાસ સચદેવ નામના એક ઉદ્યોગપતિને સ્થાનિક કોર્ટે 3 વર્ષની જેલની સજા ફરમાવી છે.
સચદેવે પોતાના બચાવમાં કહ્યું હતું કે એણે ભૂલથી ઝાયરાને સ્પર્શ કર્યો હતો. પરંતુ, સચદેવે જાણીજોઈને પોતાની છેડતી કરી હતી એવા ઝાયરાનાં આરોપને કોર્ટે માન્ય રાખ્યો છે અને સ્પેશિયલ પ્રોટેક્શન ઓફ ચિલ્ડ્રન ફ્રોમ સેક્સ્યૂઅલ ઓફેન્સીસ (POSCO) કાયદા હેઠળ 3 વર્ષની સજા ફરમાવી છે.
આ ઘટના બની હતી ત્યારે ઝાયરા સગીર વયની – 17 વર્ષની હતી. એ દિલ્હીથી મુંબઈ ફ્લાઈટમાં આવી રહી હતી ત્યારે એ ઘટના બની હતી. મુંબઈ એરપોર્ટ પર ઉતરીને એણે પોતાનાં ઈન્સ્ટાગ્રામ એકાઉન્ટ પર વિડિયો મૂકીને જણાવ્યું હતું કે પોતે જ્યારે સીટ પર ઊંઘી ગઈ હતી ત્યારે પાછળની સીટ પર બેઠેલા વિકાસ સચદેવે પોતાને અયોગ્ય રીતે સ્પર્શ કર્યો હતો.
ઝાયરાએ 2016માં આવેલી ‘દંગલ’ ફિલ્મમાં આમિર ખાન સાથે અભિનય કર્યો હતો. ત્યારબાદ એણે ‘સીક્રેટ સુપરસ્ટાર’માં પણ અભિનય કર્યો હતો. પરંતુ ગયા વર્ષે એણે જાહેરાત કરી હતી તે પોતાને એના ધર્મ પ્રત્યે વધારે લગાવ હોવાથી એ ફિલ્મલાઈનને છોડી રહી છે.
