અમદાવાદ : અમેરિકાના પ્રમુખ ડોનાલ્ડ ટ્રમ્પ આજે અમદાવાદની મુલાકાતે આવ્યા અને છવાઈ ગયા. બપોરે મોટેરા સ્ટેડિયમમાં તેઓ એમના પત્ની અને ફર્સ્ટ લેડી મેલાનિયા ટ્રમ્પ તથા વડા પ્રધાન નરેન્દ્ર મોદી સાથે હાજર રહ્યા હતા. 1,10,000 જેટલા દર્શકોથી ખીચોખીચ ભરાયેલા સ્ટેડિયમમાં ‘નમસ્તે ટ્રમ્પ’ નામક કાર્યક્રમમાં ટ્રમ્પે 28-મિનિટ સંબોધન કર્યું હતું.
આ સંબોધનમાં એમણે બોલીવૂડની ફિલ્મોનો પણ ઉલ્લેખ કર્યો હતો.
સ્ટેડિયમનું ઉદઘાટન કર્યા બાદ પોતાના સંબોધનમાં એ બે હિન્દી ફિલ્મના નામ બોલ્યા હતા – ‘દિલવાલે દુલ્હનિયા લે જાયેંગે’ અને ‘શોલે’.
એમણે ભારતીય ફિલ્મ ઉદ્યોગ તથા બોલીવૂડની રચનાત્મકતાની પ્રશંસા કરી હતી.
તાળીઓના ગડગડાટ સાથે ટ્રમ્પે કહ્યું કે, આ એવો દેશ છે જ્યાં રચનાત્મક્તાના કેન્દ્ર સમું બોલીવૂડ એક વર્ષમાં 2000 જેટલી ફિલ્મો બનાવે છે. આખી પૃથ્વી પર લોકો ભાંગડા નૃત્ય, સંગીત, રોમાન્સ અને ડ્રામાનાં દ્રશ્યો જોવામાં અને DDLJ અને શોલે જેવી જૂની ભારતીય ફિલ્મો જોવાનો આનંદ માણે છે.
ટ્રમ્પનું કહેવું હતું કે ભારતીય સિનેમાનું કદ બહુ જ વિશાળ છે. દર વર્ષે અહીં બે હજાર જેટલી ફિલ્મો બને છે. ફિલ્મોમાં ભાંગડા અને સંગીત બહુ જ સરસ હોય છે.
ઉલ્લેખનીય છે કે, અમેરિકાના ભૂતપૂર્વ પ્રમુખ બરાક ઓબામા જ્યારે પ્રમુખપદે હતા અને ભારત આવ્યા હતા ત્યારે એમણે પણ શાહરૂખ ખાન અને કાજોલ અભિનીત DDLJ ફિલ્મનો ઉલ્લેખ કર્યો હતો.
ટ્રમ્પે કહ્યું હતું કે ભારત દેશે દુનિયાને સચીન તેંડુલકર અને વિરાટ કોહલી જેવા મોટા ખેલાડીઓની ભેટ આપી છે.
