અમેરિકા: ટાઈમ મેગેઝિનના નવા પ્રિન્ટ કવર પર વિશ્વના સૌથી ધનિક લોકોમાંના એક એલોન મસ્ક ઓવલ ઓફિસમાં રિઝોલ્યુટ ડેસ્ક પર બેઠેલા જોવા મળી રહ્યા છે. અમેરિકાના રાષ્ટ્રપતિ ડોનાલ્ડ ટ્રમ્પે આ અંગે કટાક્ષ કર્યો અને પૂછ્યું, ‘શું ટાઈમ મેગેઝિન હજુ પણ ચાલી રહ્યું છે?’
મસ્ક રાષ્ટ્રપતિની ખુરશી પર બેઠેલા જોવા મળ્યા
કવર પેજ પર મસ્ક હાથમાં કોફીનો કપ પકડીને દેખાય છે. તે રાષ્ટ્રપતિના ડેસ્ક પર બેઠા છે અને પૃષ્ઠભૂમિમાં અમેરિકા અને રાષ્ટ્રપતિના ધ્વજ છે. મેગેઝિનના કવરનું બેગ્રાઉન્ડ લાલ રંગનું છે. શુક્રવારે ટાઈમ મેગેઝિને “ઈનસાઈડ એલોન મસ્કનું વોર ઓન વોશિંગ્ટન” શીર્ષક સાથે એક કવર સ્ટોરી પ્રકાશિત કરી. આ સ્ટોરીમાં ટ્રમ્પે ગયા મહિને 20 જાન્યુઆરીએ સત્તા સંભાળી ત્યારથી સરકારમાં મસ્ક દ્વારા લેવામાં આવેલા પગલાંનો ઉલ્લેખ કરવામાં આવ્યો હતો.
‘શું મેગેઝિન હજુ પણ ચાલે છે?’
જ્યારે ટ્રમ્પને ટાઇમ મેગેઝિન કવર પર મસ્કના ચિત્ર વિશે પૂછવામાં આવ્યું ત્યારે તેમણે કહ્યું, “શું ટાઇમ મેગેઝિન હજુ પણ ચાલી રહ્યું છે? મને આ ખબર નહોતી.” આ બીજી વખત છે જ્યારે મસ્ક મેગેઝિનના કવર પર દેખાયા છે. ગયા વર્ષે નવેમ્બરમાં, તેઓ કવર પર ‘સિટીઝન મસ્ક’ તરીકે દેખાયા હતા. યુરોપિયન સાંસદે મસ્કને નોબેલ પુરસ્કાર માટે નોમિનેટ કર્યા છે.
થોડાં દિવસો પહેલા, યુરોપિયન સંસદના સ્લોવેનિયન સભ્ય (MEP) બ્રેન્કો ગ્રીમ્સે 2025 ના નોબેલ શાંતિ પુરસ્કાર માટે એલોન મસ્કને સત્તાવાર રીતે નામાંકિત કર્યા. ગ્રીમ્સના મતે, આ નામાંકન અભિવ્યક્તિની સ્વતંત્રતાના સમર્થનમાં મસ્કના સતત પ્રયાસો અને વૈશ્વિક શાંતિમાં તેમના યોગદાનને માન્યતા આપવા માટે છે.
