ઈન્ડિયન સ્પેસ રિસર્ચ ઓર્ગેનાઈઝેશન (ISRO) એ શનિવારે જણાવ્યું હતું કે ચંદ્રયાન-3 સફળતાપૂર્વક ચંદ્રની ભ્રમણકક્ષામાં પ્રવેશી ચૂક્યું છે. ઈસરોએ શુક્રવારના રોજ જણાવ્યું હતું કે સ્પેસક્રાફ્ટને ચંદ્રની ભ્રમણકક્ષામાં મૂકવાની પ્રક્રિયા 5 ઓગસ્ટના રોજ સાંજે 7 વાગ્યે પૂર્ણ થશે. ઈસરોએ શુક્રવારે કહ્યું કે ચંદ્રયાન-3 અવકાશયાન 14 જુલાઈના રોજ લોન્ચ થયા બાદથી ચંદ્રના લગભગ બે તૃતીયાંશ અંતરને કવર કરી ચૂક્યું છે. અત્યાર સુધીમાં ચંદ્રયાન-3 એ પાંચ વખત ભ્રમણકક્ષા વધારવાની પ્રક્રિયા સફળતાપૂર્વક પૂર્ણ કરી છે.
ચંદ્રયાન-3 ક્યારે સોફ્ટ લેન્ડિંગ કરશે?
1 ઓગસ્ટના રોજ, અવકાશયાનને પૃથ્વીની ભ્રમણકક્ષાથી ચંદ્ર તરફ ઉપાડવાની પ્રક્રિયા સફળતાપૂર્વક પૂર્ણ થઈ અને વાહનને ‘ટ્રાન્સલુનર ઓર્બિટ’માં મૂકવામાં આવ્યું. અગાઉ, ISROએ કહ્યું હતું કે તે 23 ઓગસ્ટે ચંદ્રની સપાટી પર ચંદ્રયાન-3નું ‘સોફ્ટ લેન્ડિંગ’ કરવાનો પ્રયાસ કરશે.
