અમદાવાદઃ ઇરાન ઇઝરાયેલની વચ્ચે સીઝફાયર થતાં સપ્તાહના ત્રીજા સેશનમાં ઘરેલુ શેરબજારોમાં તેજી થઈ હતી. મિડકેપ અને સ્મોલકેપ શેરોમાં પણ લેવાલી જોવા મળી હતી. મિડકેપ ઇન્ડેક્સ સતત ચોથા દિવસે વધીને બંધ રહ્યો હતો. IT, ઓટો, ફાર્મા અને FMCG શેરોમાં પણ તેજી થઈ હતી. જોકે ડિફેન્સ, PSE શેરોમાં દબાણ જોવા મળ્યું હતું. રોકાણકારોની સંપત્તિમાં રૂ. ચાર લાખ કરોડનો વધારો થયો હતો.
એશિયાનાં મુખ્ય બજારોમાં તેજીતરફી વલણ રહ્યું હતું દક્ષિણ કોરિયાનો કોસ્પી, ચીનનો શાંઘાઈ કોમ્પોઝિટ અને હોન્ગકોન્ગનો હેન્ગસેન્ગ વધીને બંધ રહ્યા હતા. જેથી સેન્સેક્સ 700 પોઇન્ટની તેજી સાથે 82,755ના મથાળે બંધ રહ્યો હતો, જ્યારે નિફ્ટી 22 પોઇન્ટ ઊછળી 25,244ના સ્તરે બંધ રહ્યો હતો.
ઇરાન-ઇઝરાયેલ વચ્ચે સીઝફાયર થતાં ત્રણ દિવસમાં ક્રૂડ ઓઇલ 13 ટકા ઘટ્યું હતું. બ્રેન્ટ ક્રૂડ પ્રતિ બેરલ 67.99 અને WTI ક્રૂડ પ્રતિ બેરલ 65.24ના મથાળે ટ્રેડ કરતું હતું. આ સાથે ફોરેક્સ બજારમાં ડોલર સામે રૂપિયો 13 પૈસા મજબૂત થઈને 85.92 ટ્રેડ કરતો હતો.
બીજી બાજુ દેશનો વોલેટિલિટી ઇન્ડેક્સ 2.88 ટકા ઘટીને 13.25 પર આવી ગયો હતો. હવે બજારમાં અસ્થિરતા પછી ઘરેલુ બજારમાં સ્થિરતા પરત ફરી રહી છે.
BSE પર કુલ 4162 શેરોમાં કામકાજ થયાં હતાં. એમાં 2818 શેરો તેજી સાથે બંધ થયા હતા અને 1207 શેરોમાં ઘટાડો થયો હતો. આ સાથે 137 શેરો સપાટ બંધ થયા હતા. આ સિવાય 109 શેરોએ નવી 52 સપ્તાહની ઊંચી સપાટી સર કરી હતી, જ્યારે 43 શેરોએ 52 સપ્તાહના નવા નીચલા સ્તરે સ્પર્શ્યા હતા. આ સાથે 301 શેરોમાં અપર સરકિટ લાગી હતી, જ્યારે 211 શેરોમાં લોઅર સરકિટ લાગી હતી.
