લંડનઃ બ્રિટનમાં છેક 18મી સદી જેટલી જૂની અને રીટેલ ક્ષેત્રની જાણીતી કંપની ડેબનમ્સનું ગયા મહિને આર્થિક પતન થઈ ગયું છે. આ ડિપાર્ટમેન્ટ સ્ટોર ચેન કંપનીએ તેના તમામ સ્ટોર્સ બંધ કરી દીધા છે. આને કારણે આશરે 12,000 લોકોની નોકરી જતી રહી છે. ઓનલાઈન રીટેલરો તરફથી તીવ્ર હરીફાઈનો સામનો ન કરી શકતાં ડેબનમ્સનું પતન થયું છે. જોકે બ્રિટનના ઓનલાઈન ફેશન ગ્રુપ બુહૂએ 5 કરોડ પાઉન્ડમાં ડેબનમ્સની બૌદ્ધિક સંપત્તિ ખરીદી લીધી છે, તેથી આ બ્રાન્ડ જીવંત રહેશે.
કોરોના વાઈરસ રોગચાળો ફેલાતાં લોકો ઓનલાઈન માધ્યમથી શોપિંગ કરવા લાગ્યા છે તેથી ડેબનમ્સ આર્થિક રીતે પાયમાલ થઈ ગઈ. બ્રિટનમાં લોકડાઉન સમાપ્ત થશે તે પછી ડેબનમ્સના સ્ટોર્સ બાકી રહેલો સ્ટોક ખતમ થાય ત્યાં સુધી ખોલવામાં આવશે, તે પછી કાયમને માટે બંધ કરી દેવામાં આવશે, એમ વહીવટકારોએ જણાવ્યું છે.
