રિલાયન્સની સ્વદેશી 5G સેવા આવતા વર્ષેઃ મુકેશ અંબાણીનું એલાન

મુંબઈઃ રિલાયન્સ ઇન્ડસ્ટ્રીઝ લિમિટેડ (RIL)ની 43મી વાર્ષિક સામાન્ય સભા (AGM) આજે યોજવામાં આવી હતી. કોરોના વાઈરસના ફેલાવાને કારણે આ વખતે આ એજીએમ દર વખતની જેમ, દક્ષિણ મુંબઈના બિરલા માતુશ્રી સભાગૃહમાં નહીં, પરંતુ વર્ચ્યુઅલ માધ્યમથી યોજવામાં આવી હતી. કંપનીના ચેરમેન અને મેનેજિંગ ડિરેક્ટર મુકેશ અંબાણીએ એલાન કર્યું હતું કે રિલાયન્સ ઈન્ડસ્ટ્રીઝ આવતા વર્ષે સ્વદેશી 5G સેવા શરૂ કરવા ધારે છે. કંપનીએ 5G ટેક્નોલોજીને એક નવા આરંભ સાથે સંપૂર્ણપણે વિકસિત કરી લીધી છે. સંપૂર્ણપણે ભારતમાં વિકસિત કરાયેલી આ 5G ટેક્નોલોજીને 5G સ્પેક્ટ્રમ મળે તે પછી એક જ વર્ષમાં લોન્ચ કરવામાં આવશે.

જિયોને લઈને અંબાણીએ અનેક જાહેરાત કરી હતી. તેમણે કહ્યું હતું કે કોરોના સંકટના દોરમાં વેપાર-ધંધાને બહુ નુકસાન થયું છે. વિશ્વભરનાં અર્થતંત્રો પર એની પ્રતિકૂળ અસર પડી છે. જોકે મને તેમ છતાં એ વિશ્વાસ છે કે આપણે કોરોનાને હરાવીને સમૃદ્ધિના દોરમાં પહોંચીશું. મને વિશ્વાસ છે કે દરેક મુશ્કેલીના સમયમાં કેટલીય તકો છુપાયેલી હોય છે.

AGM જિયોમીટ દ્વારા વર્ચ્યુઅલ મીટિંગ

રિલાયન્સ ઇન્ડસ્ટ્રીઝ લિ.ની AGM જિયોમીટ દ્વારા વર્ચ્યુઅલ કરવામાં આવી હતી. અત્યાર સુધી 50 લાખથી વધુ લોકો જિયોમીટને ડાઉનલોડ કરી ચૂક્યા છે. જિયોમીટ પહેલી અને એકમાત્ર ક્લાઉડ બેઝ્ડ વિડિયો કોન્ફરન્સિંગ એપ છે. માત્ર બે મહિનામાં જિયો પ્લેટફોર્મની યંગ ટીમે એને તૈયાર કરી છે. આ એપના રિલીઝ કેટલાક દિવસો પછી એને 50 લાખ લોકો દ્વારા ડાઉનલોડ કરવામાં આવી છે.

ચાર બાબતોથી મને સંતોષઃ અંબાણી

કંપનીના ચેરમેને કહ્યું હતું કે ચાર બાબતોથી મને સંતોષ છે. આ ચાર બાબતો- 1 અમારા જિયોમાર્ટના 12,000 સ્ટોરના આશરે બે તૃતીયાંશ સ્ટોર ટિયર II, ટિયર III, ટિયર IV શહેરોમાં છે. બીજી, હજ્જારો ખેડૂતોના મજબૂત સાથથી અમે 80 ટકા ફળ અને શાકભાજી ખરીદીએ છીએ. અમે અન્ય કોઈ પણ સંગઠિત રિયેલર કરતાં વધુ ફળ અને શાકભાજી વેચીએ છીએ. ત્રીજી, અમે લાખ્ખો લોકોને રોજગારી આપીએ છીએ. ચોથું, અમારું ગ્રોથ મોડલ નાના મર્ચન્ટ્સ અને દુકાનદારોની સાથે ભાગીદારી આધારિત છે.

તેમણે કહ્યું હતું કે કંપની 2021ના પ્રારંભના મહિનાઓમાં ઓઇલ ટુ કેમિકલ બિઝનેસને અલગ કંપની બનાવશે.

AGMમાં કરવામાં આવેલી મહત્ત્વની જાહેરાતો નીચે મુજબ છેઃ
  • રિલાયન્સના ચેરમેન મુકેશ અંબાણીએ કહ્યું હતું કે રિલાયન્સ પહેલી એવી ભારતીય કંપની બની ગઈ છે, જેનું માર્કેટ કેપ 150 અબજ ડોલર છે.
  • ગૂગલ જિયો પ્લેટફોર્મ્સમાં 33,737 કરોડ રૂપિયાના રોકાણ દ્વારા 7.7 ટકાનો હિસ્સો લીધો છે.
  • નવ મહિના પહેલાં રિલાયન્સની બેલેન્સશીટમાં સંપૂર્ણ રીતે દેવામુક્ત બની છે.
  • મુકેશ અંબાણીએ એલાન કર્યું હતું કે જિયોએ સ્ક્રેચથી 5G સોલ્યુશન્સ ડેવલપ કર્યું છે. આનાથી દેશમાં વર્લ્ડ ક્લાસ 5G સર્વિસ લોન્ચ કરી શકાશે. જિયોની 5G સર્વિસ આગામી વર્ષે શરૂ થવાની શક્યતા છે. જિયોની 5G પ્રોડક્ટ માટે ટૂંક સમયમાં સ્પેક્ટ્રમ મળશે. કંપની એની ટ્રાયલ જલદી શરૂ કરશે.
  • રિલાયન્સે જિયો પ્લેટફોર્મનો 32.94 ટકા હિસ્સો વેચીને 1,52,056 કરોડ એકત્ર કર્યા
  • ઇશા અંબાણી અને આકાશ અંબાણીએ નવા જિયો ટીવીની ખાસિયત બતાવી હતી. નવા JIO TVમાં નેટફ્લિક્સ, એમેઝોન, પ્રાઇમ વિડિયો, હોટસ્ટાર જેવા OTT ચેનલ હશે. આમાં લોગઇન માટે અલગ-અલગ ID પાસવર્ડની જરૂર નહીં. JIO TVની સાથે તમે માટે એક ક્લિકથી OTT પર કંઈ પણ જોઈ શકો છો.
  • AGMમાં જિયો ગ્લાસ લોન્ચ કરવામાં આવ્યો. આ ગ્લાસનું વજન માત્ર 75 ગ્રામ છે. આ એક કેબલથી જોડાયેલો હશે. આ ગ્લાસમાં 25 એપ હશે, જેમાં આગામી સમયમાં કેટલીય એપ ઉમેરી શકાશે.
  • કંપનીમાં 12 સપ્તાહમાં જિયો માટે 1.52 લાખ કરોડથી વધુ ફંડ એકત્ર થયું.
  • આ રોકાણમાં રાઇટ્સ ઇશ્યુ અને BP દ્વારા રોકાણનો ઉમેરો કકરીએ તો કંપનીએ 2.13 લાખ કરોડનું ફંડ એકત્ર કર્યું છે.
  • કંપનીનો EBITDA એક લાખ કરોડ રૂપિયા થયો છે. કન્ઝ્યુમર EBITDA ગ્રોથ 49 ટકા રહ્યો છે.
  • રિલાયન્સે જિયો પ્લેટફોર્મનો 32.94 ટકા હિસ્સો વેચીને 1,52,056 કરોડ એકત્ર કર્યા
  • રિલાયન્સ ગૂગલની સાથે મળીને 4G-5Gના સ્માર્ટ ફોન બનાવશે. કંપની એન્ડ્રોઇડ બેઝ્ડ ફોન બનાવશે. JIO અને ગૂગલ ભારતને 2Gમુક્ત કરશે
  •  રિલાયન્સે 2000 કરોડથી વધુની નિકાસ કરી છે.
  • રિલાયન્સ સૌથી વધુ GST આપતી કંપની છે. કંપનીએ 69,372 કરોડ રૂપિયા GST તરીકે ચૂકવે છે.
  • મુકેશ અંબાણીએ કહ્યું હતું કે અમે ભારતને 2G મુક્ત બનાવવા ઇચ્છીએ છીએ. દેશમાં હાલ 35 કરોડ લોકો 2Gનો ઉપયોગ કરી રહ્યા છે. કંપનીએ એના માટે ગૂગલથી કરાર કર્યા છે.

રિલાયન્સની AGMમાં રિલાયન્સ ફાઉન્ડેશનનાં ચેરમેન નીતા અંબાણીએ પણ રિલાયન્સની AGMને સંબોધિત કરી હતી. આ તેમનું પહેલું સંબોધન હતું. તેમણે કહ્યું હતું કે રિલાયન્સના બે લાખથી વધુ કર્મચારીઓએ કોરોના સંકટના દોરમાં આગળ આવીને લોકોને મદદ કરી છે.