નવી દિલ્હીઃ ઇઝરાયેલ અને ઈરાન વચ્ચેનો સંઘર્ષ યથાવત્ છે. બંને દેશો સતત એકબીજા પર હુમલા કરી રહ્યા છે અને મધ્ય-પૂર્વમાં તણાવની સ્થિતિ ઊભી થઈ છે. ઇઝરાયેલી અધિકારીઓ અને અમેરિકાના રાષ્ટ્રપતિ ડોનાલ્ડ ટ્રમ્પનો દાવો છે કે ઇઝરાયેલનું ઈરાનના આકાશ પર પૂરું નિયંત્રણ છે. ભારતે ઈરાનમાં રહેતા વિદ્યાર્થીઓને ત્યાંથી બહાર કાઢી લીધા છે અને ઈરાની હવાઈ વિસ્તારમાંથી ઉડાનને ડાયવર્ટ કરી દીધી છે.
ઈરાનના વિદેશ મંત્રાલયના પ્રવક્તા ઇસ્માઈલ બાઘેઈએ જણાવ્યું છે કે જો ઈઝરાયેલ સાથે ચાલી રહેલા યુદ્ધમાં અમેરિકા દખલ કરશે તો વિશાળ યુદ્ધ શરૂ થઈ જશે. ઇસ્માઈલ બાઘેઈએ આ ટિપ્પણી અલ જઝીરાના સાથે ઇન્ટરવ્યુ દરમિયાન કરી હતી. બીજી બાજુ, અમેરિકાના રાષ્ટ્રપતિ ડોનાલ્ડ ટ્રમ્પે ઈરાનના સુપ્રીમ લીડર ખોમિનીને શરત વિના આત્મસમર્પણ કરવા માટે કહ્યું છે. ટ્રમ્પે જણાવ્યું છે કે અમે સારી રીતે જાણીએ છીએ કે સુપ્રીમ લીડર ક્યાં છુપાયેલા છે. અમે તેમને મારવા જઈ રહ્યા નથી – ઓછામાં ઓછું અત્યારે તો નહીં. ટ્રમ્પે કહ્યું હતું કે હવે અમારી ધીરજ ખૂટી રહી છે. તેમણે ઉમેર્યું હતું કે ખોમિનીએ શરત વિના આત્મસમર્પણ કરી દેવું જોઈએ.
આ પહેલાં સતત થઈ રહેલા હુમલાઓની વચ્ચે ઈરાને તેલ અવિવમાં ઇઝરાયેલની ગુપ્તચર એજન્સી મોસાદની ઓફિસને નિશાન બનાવી હતી તો બીજી તરફ ઇઝરાયલે પણ બોમ્બવર્ષા ચાલુ રાખી છે.
વિશ્વના અનેક નેતાઓ કેનેડામાં યોજાયેલા G7 શિખર સંમેલનમાં ભાગ લેવા માટે એકઠા થયા હતા, અને આ સંમેલનમાં ઇઝરાયેલ અને ઈરાન વચ્ચે વધી રહેલો તણાવ મુખ્ય ચર્ચાનો વિષય રહ્યો હતો. G7 દેશોએ ઇઝરાયેલને ટેકો આપ્યો અને ઈરાનને મધ્ય-પૂર્વમાં અસ્થિરતા માટે જવાબદાર ઠેરવ્યો.
