પર્યટન ક્ષેત્રને પ્રોત્સાહન આપવાના ઉદ્દેશ્ય સાથે રાષ્ટ્રીય પાટનગર નવી દિલ્હીમાં રાષ્ટ્રપતિ ભવન તથા એની બાજુમાં આવેલી નોર્થ બ્લોક અને સાઉથ બ્લોક ઈમારતોને બહારના ભાગે ૧૧ ઓક્ટોબર, બુધવારથી રોજ સાંજે આ રીતે ભવ્ય, રંગબેરંગી LED લાઈટિંગથી પ્રકાશિત કરવાનું શરૂ કરવામાં આવ્યું છે. આ નવી ડાઈનેમિક, સ્ટેટિક પ્રકાશ વ્યવસ્થા સાંજે સાત વાગ્યે શરૂ કરાયા બાદ વડાપ્રધાન નરેન્દ્ર મોદીએ પણ એને પ્રત્યક્ષ રીતે નિહાળી હતી. એમની સાથે ગૃહપ્રધાન રાજનાથ સિંહ પણ હતા. આ લાઈટિંગની વિશેષતા એ છે કે એમાં લોકોને ૧ કરોડ ૬૦ લાખ જેટલા વિવિધ રંગ સંયોજનો નિહાળવા મળે છે. આ પ્રકાશ વ્યવસ્થા અંતર્ગત ૨૧,૪૫૦ સ્ક્વેર મીટર ક્ષેત્રને રોજ સાંજે સાત વાગ્યાથી લઈ બીજા દિવસે વહેલી સવારે પાંચ વાગ્યા સુધી આ રીતે ઝળહળીત કરવામાં આવશે. લાઈટિંગમાં પ્રત્યેક સેકંડે નવો રંગ જોવા મળે છે. આ પ્રકાશ વ્યવસ્થામાં વીજળી વપરાશનો બોજો ઓછો કરવા માટે ઓછા વોટના બલ્બ્સનો ઉપયોગ કરવામાં આવ્યો છે.
