કોઈવાર જોઈતા શાક ન મળે તો મગની દાળ ફ્રાય બનાવી શકાય છે. જે ઘણી જ સ્વાદિષ્ટ બને છે!
સામગ્રીઃ
- મગની દાળ ½ કપ
- હળદર ¼ ટી.સ્પૂન
- મીઠું ½ ટી.સ્પૂન
- તેલ 1 ટે.સ્પૂન
- ઘી ½ ટે.સ્પૂન
- રાઈ 1 ટી.સ્પૂન
- જીરૂ 1 ટી.સ્પૂન
- કળી પત્તાના પાન 6-7
- કાંદો 1
- ટામેટું 1
- હીંગ ¼ ટી.સ્પૂન
- લસણની કળી 10-12
- લાલ મરચાં પાઉડર 2 ટી.સ્પૂન
- ધાણાજીરુ 1 ટી.સ્પૂન
- ગરમ મસાલો ½ ટી.સ્પૂન
- લીંબુનો રસ ¼ ટી.સ્પૂન
રીતઃ મગની દાળને 3-4 પાણીએથી ધોઈને કૂકરમાં 1 કપ પાણી મેળવી તેમજ ¼ ટી.સ્પૂન હળદર અને ½ ટી.સ્પૂન મીઠું મેળવીને કૂકર બંધ કરીને ગેસની મધ્યમ આંચે 2 સીટી કરીને ગેસ બંધ કરીને કૂકર ઠંડું થવા દો.
લસણની કળીને વાટીને તેમાં લાલ મરચાં પાઉડર, ગરમ મસાલો તેમજ ધાણાજીરૂ સાથે 2-3 ચમચી પાણી મેળવીને પેસ્ટ તૈયાર કરી લો.
એક કઢાઈમાં ઘી તેમજ તેલ વઘાર માટે ગરમ કરી તેમાં રાઈ, જીરા તથા કળીપત્તાનો વઘાર કરીને કાંદા સમારીને સાંતળી લો. હવે તેમાં હીંગનો વઘાર કરો. ત્યારબાદ લસણના મસાલાવાળું પેસ્ટ પણ મેળવીને સાંતળી લો.
ટામેટાં નરમ થઈ જાય અને તેમાંથી તેલ છૂટું પડે એટલે બાફેલી દાળ મેળવી દો. 2-3 મિનિટ ગરમ થાય એટલે તેમાં લીંબુના રસના થોડાં ટીપાં મેળવીને સમારેલી કોથમીર ભભરાવીને ગેસ બંધ કરીને દાળ ઉતારી લો.
તૈયાર દાળ ગરમાગરમ પરોઠાં સાથે પીરસો અથવા જીરા રાઈસ સાથે પણ દાળ સારી લાગશે.
