સૌથી પૌષ્ટિક જુવારના લોટના ઢોસા બહુ જ ઝડપથી બની જાય છે! કારણ કે, લોટને આથો લાવવાની પણ તેમાં જરૂર નથી!
સામગ્રીઃ
- જુવારનો લોટ 1 કપ
- રવો ¼ કપ
- ટામેટું 1
- સિમલા મરચું 1 નાનું
- કાંદો 1
- લીલા મરચાં 2-3
- સમારેલી કોથમીર 1 કપ
- રાઈ ¼ ટી.સ્પૂન
- તેલ પૂડલા સાંતળવા માટે
રીતઃ જુવારનો લોટ તથા રવો એક વાસણમાં મેળવીને તેમાં લગભગ 2½ જેટલું પાણી થોડું થોડું ઉમેરતા જઈ લોટમાં ગઠ્ઠા ના પડે તે રીતે લોટ મિક્સ કરતા જાવ. ખીરુ પાતળું હોવું જોઈએ.
કાંદો, ટામેટું, સિમલા મરચું નાના ચોરસ ટુકડામાં સમારી લો. લીલા મરચાં ગોળ સમારી લો.
એક પેનમાં 1 ટી.સ્પૂન તેલ ગરમ કરી તેમાં રાઈ તતડાવો. ત્યારબાદ તેમાં કાંદો 2 મિનિટ સાંતળીને થોડો નરમ થાય એટલે સમારેલાં લીલા મરચાં તેમજ સિમલા મરચું તેમજ ટામેટું મેળવીને 2-3 મિનિટ સાંતળીને કોથમીર મેળવીને ગેસ બંધ કરી દો. સાંતળેલા વેજીટેબલ્સને જુવારના ખીરામાં મેળવી દો.
ગેસ પર ફ્રાઈ પેન ગરમ કરવા મૂકો. તેમાં એક ચમચી જેટલું તેલ ફરતે લગાડી દો. જુવારના પૂડલા માટેનું ખીરું એક કળછી અથવા વાટકીમાં લઈ પેનમાં ચારેકોર પાથરી દો. 2 મિનિટ બાદ ઢોસો થોડો બ્રાઉન રંગનો શેકાઈ એટલે તેને ઉથલાવીને બીજી બાજુએથી પણ શેકી લો.
આ ગરમાગરમ ઢોસા ટામેટાં-લસણની કે કોથમીરની તીખી ચટણી સાથે પીરસો.
