ગરમાગરમ દહીં લચ્છા પરોઠા નાસ્તામાં જો ખાવા મળે તો દિવસ સુધરી જાય અને જમવામાં જો હોય તો પણ મઝા આવે એવા સ્વાદિષ્ટ બને છે!
સામગ્રીઃ
- ઘઉંનો લોટ 2 કપ
- અજમો ¼ ટી.સ્પૂન
- હીંગ ¼ ટી.સ્પૂન
- ચાટ મસાલો ¼ ટી.સ્પૂન
- ફુદીનાના પાન અથવા તેનો સૂકો પાઉડર 2 ટી.સ્પૂન
- કાળું મીઠું ¼ ટી.સ્પૂન
- શેકેલા જીરાનો પાઉડર ½ ટી.સ્પૂન
- કોથમીર સમારેલી 2 ટે.સ્પૂન
- ઘી 1 ટી.સ્પૂન
- દહીં 1 કપ
- પરોઠા શેકવા માટે ઘી અથવા તેલ
પરોઠા ઉપર ભભરાવવા માટેઃ
- ચાટ મસાલો
- લાલ મરચાં પાઉડર
- ફુદીનાના પાન બારીક સમારેલાં
- સમારેલી કોથમીર
રીતઃ ઘઉંના લોટમાં અજમો, હીંગ, ચાટ મસાલો, ફુદીનાના પાન, કાળું મીઠું, જીરા પાઉડર, કોથમીર મેળવી દો. હવે તેમાં દહીં મેળવીને લોટ બાંધી લો. જો લોટ વધુ ઢીલો હોય તો થોડો લોટ તેમાં ઉમેરી દો. પરોઠાનો લોટ બંધાઈ જાય એટલે ઘીનું મોણ તેમાં આપી, લોટ ઢાંકીને 20 મિનિટ રહેવા દો.
ત્યારબાદ પરોઠા માટે લૂવો લઈ તેની મોટી રોટલી વણી લો. આખી રોટલી ઉપર ઘી ચોપડી લો. અને લચ્છા પરોઠા માટે રોટલીની એક કિનારેથી એક સે.મીની ઘડી વાળી લઈ બીજા કિનારે સુધીના બંને છેડા થોડા દબાવીને પેક કરીને ચકરીની જેમ રોલ વાળી લઈ હાથમાં લૂવો ચપટો કરીને તેને વેલણ વડે સહેજ જાડું પરોઠું વણી લો.
પરોઠાને ત્રિકોણ અથવા ચોરસ આકારમાં પણ રોટલીને આકાર આપીને બનાવી શકાય છે.
તવાને ગેસ ઉપર ગરમ કરવા મૂકો. તવો ગરમ થાય એટલે ગેસની આંચ ધીમી કરી પરોઠાને તવા ઉપર શેકવા મૂકો. પરોઠું શેકાય એટલે બંને બાજુએ ઘી લગાડતા જાઓ. ધીમો તાપ રાખવો. જેથી પરોઠું અંદરથી સરખું શેકાય.
પરોઠા બધા શેકાઈ જાય એટલે પ્લેટમાં મૂકીને દરેક પરોઠા ઉપર ચાટ મસાલો તેમજ લાલ મરચાં પાઉડર ભભરાવી ફુદીનાના પાનથી પરોઠાં સજાવીને નાસ્તામાં ચા સાથે અથવા જમવામાં પંજાબી સબ્જી અને અથાણાં સાથે પીરસો.
